ଦୁଷ୍କର୍ମ ମାମଲା: ପ୍ରଜ୍ବଳଙ୍କ ବିରୋଧରେ ଚାର୍ଜଫ୍ରେମ୍

ବେଙ୍ଗାଲୁରୁ: ବେଙ୍ଗାଲୁରୁର ଏକ ସ୍ଥାନୀୟ ଅଦାଲତ ଏକ ହାଇପ୍ରୋଫାଇଲ ଦୁଷ୍କର୍ମ ମାମଲାରେ ଜନତା ଦଳ(ଏସ୍‌)ର ପୂର୍ବତନ ସାଂସଦ ପ୍ରଜ୍ୱଳ ରେବନ୍ନାଙ୍କ ବିରୋଧରେ ଆନୁଷ୍ଠାନିକ ଭାବେ ଚାର୍ଜଫ୍ରେମ୍ କରିଛନ୍ତି। ଶନିବାର ଅତିରିକ୍ତ ସିଟି ସିଭିଲ ଆଣ୍ଡ ସେସନ୍ସ ଜଜ୍ ସନ୍ତୋଷ ଗଜାନନ ଭଟ୍ଟ କହିଛନ୍ତି ଯେ ରେବନ୍ନା ଭାରତୀୟ ପିଙ୍ଗଳ କୋଡ୍ (ଆଇପିସି) ଓ ସୂଚନା ପ୍ରଯୁକ୍ତି (ଆଇଟି) ଆଇନର ଏକାଧିକ ଧାରା ଅନୁଯାୟୀ ଗୁରୁତର ଅଭିଯୋଗର ସମ୍ମୁଖୀନ ହେଉଥିବାରୁ ଶୁଣାଣି ପାଇଁ ପର୍ଯ୍ୟାପ୍ତ ତଥ୍ୟ ରହିଛି।

ରେବନ୍ନାଙ୍କ ବିରୋଧରେ ଦଫା ୩୭୬(୨)(କେ) (ପ୍ରଭାବଶାଳୀ ବ୍ୟକ୍ତିଙ୍କ ଦ୍ୱାରା ଦୁଷ୍କର୍ମ), ୩୭୬(୨)(ଏନ୍) (ବାରମ୍ବାର ଦୁଷ୍କର୍ମ), ୩୫୪(ଏ) (ଯୌନ ନିର୍ଯାତନା), ୩୫୪(ବି) (ଅସଦାଚରଣ ଉଦ୍ଦେଶ୍ୟରେ ଆକ୍ରମଣ କିମ୍ବା ବଳ ପ୍ରୟୋଗ), ୩୫୪(ସି) (ଯୌନକାର୍ଯ୍ୟ ବା ନଗ୍ନତା ଦେଖି ଆନନ୍ଦ ନେବା), ୫୦୬ (ଆପରାଧିକ ଧମକ) ଏବଂ ୨୦୧ (ପ୍ରମାଣ ଲୋପ କରିବା) ରହିଛି। ଏହାବ୍ୟତୀତ ପୀଡ଼ିତାଙ୍କ ବିନା ଅନୁମତିରେ ଅନ୍ତରଙ୍ଗ ଭିଡିଓ ପ୍ରସାରଣ କରି ପୀଡ଼ିତାଙ୍କ ଗୋପନୀୟତା ଉଲ୍ଲଂଘନ କରିଥିବା ଅଭିଯୋଗରେ ରେବନ୍ନାଙ୍କ ବିରୋଧରେ ଆଇଟି ଆଇନର ଧାରା ୬୬(ଇ) ଅନୁଯାୟୀ ମାମଲା ରୁଜୁ ହୋଇଛି। ରେବନ୍ନା ପରିବାର ମାଲିକାନାରେ ଥିବା ଫାର୍ମ ହାଉସରେ ଚାକରାଣୀ ଭାବେ କାମ କରୁଥିବା ଜଣେ ମହିଳାଙ୍କ ଅଭିଯୋଗରୁ ଏହି ମାମଲା ସାମ୍ନାକୁ ଆସିଛି।

ସେ ଦାବି କରିଛନ୍ତି ଯେ ୨୦୨୧ ମସିହାରୁ କୋଭିଡ୍-୧୯ ଲକ୍‌ଡାଉନ୍ ସମୟରେ ରେବନ୍ନା ତାଙ୍କୁ ବାରମ୍ବାର ଦୁଷ୍କର୍ମ କରିଥିଲେ ଏବଂ ଏହାର ଭିଡିଓ ଉତ୍ତୋଳନ କରିଥିଲେ। ପରେ ରେବନ୍ନା ତାଙ୍କୁ  ଚୁପ୍ କରାଇବା ପାଇଁ ଭିଡିଓର ବ୍ୟବହାର କରିଥିଲେ। ଯୌନ ନିର୍ଯାତନାର ଭିଡିଓ ଲିକ୍ ହେବା ପର୍ଯ୍ୟନ୍ତ ସେ ଚୁପ୍ ରହିଥିଲେ। ଏକାଧିକ ମହିଳାଙ୍କୁ ନେଇ ୨୯୦୦ରୁ ଅଧିକ ଭିଡିଓ ସୋସିଆଲ ମିଡିଆ ପ୍ଲାଟଫର୍ମରେ ପ୍ରସାରିତ ହେବା ପରେ ସେ ଆନୁଷ୍ଠାନିକ ଅଭିଯୋଗ କରିଥିଲେ। ଦୃଢ଼ ପ୍ରମାଣ ସତ୍ତ୍ୱେ ରେବନ୍ନାଙ୍କ ଆଇନଜୀବୀ ଦଳ ଯୁକ୍ତି ବାଢ଼ିଥିଲେ ଯେ ପ୍ରମାଣ ପର୍ଯ୍ୟାପ୍ତ ନୁହେଁ ଏବଂ ଏହି ଅଭିଯୋଗ ରାଜନୈତିକ ଉଦ୍ଦେଶ୍ୟ ପ୍ରଣୋଦିତ।