ବେଜିଂ : ଶାସକଙ୍କ ବିରୋଧରେ ଲୋକମାନଙ୍କ ବିରୋଧ, ବିକ୍ଷୋଭ ପ୍ରଦର୍ଶନ ଗଣତାନ୍ତ୍ରିକ ଦେଶରେ ଏକ ସାଧାରଣ କଥା । କାରଣ ଏହା ଲୋକମାନଙ୍କ ଗଣତାନ୍ତ୍ରିକ ଅଧିକାର । କିନ୍ତୁ ଚୀନ ପରି ଏକଛତ୍ରବାଦୀ ଦେଶରେ ଏହା ଏକ ବିରଳ ଘଟଣା । ଏପରି ବିରଳ ଘଟଣା ଏବେ ଚୀନରେ ଘଟିବାରେ ଲାଗିଛି ।
Sambad is now on WhatsApp
Join and get latest news updates delivered to you via WhatsApp
ଚୀନର ରାଜଧାନୀ ବେଜିଂ ଏବେ କମ୍ୟୁନିଷ୍ଟ ପାର୍ଟିର ୨୦ତମ ଜାତୀୟ କଂଗ୍ରେସ ଚାଲିଥିବାବେଳେ ରାଷ୍ଟ୍ରପତି ସି ଜିନପିଙ୍ଗଙ୍କ ବିରୋଧରେ ଦେଶର କେତେକ ସ୍ଥାନରେ ଲୋକମାନେ ବିକ୍ଷୋଭ ପ୍ରଦର୍ଶନ କରୁଥିବା ଜଣାପଡ଼ିଛି । ଲୋକମାନେ ପ୍ଲାକାର୍ଡ ଧରି ସରକାର ବିରୋଧୀ ସ୍ଲୋଗାନ ଦେଉଛନ୍ତି । ଲୋକମାନେ ଧରି ଥିବା ପ୍ଲାକାର୍ଡରେ ଲେଖାଯାଇଛି- “ଆମେ ଖାଦ୍ୟ ଚାହୁଁ, ପିସିଆର ଟେଷ୍ଟ ନୁହେଁ ; ଆମେ ସ୍ବାଧୀନତା ଚାହୁଁ.. ଲକଡାଉନ ନୁହେଁ ; ଆମେ ସମ୍ମାନ ଚାହୁଁ, ମିଛ ନୁହେଁ ।
ଚୀନ ସରକାର ଏସବୁ ବିକ୍ଷୋଭ ଖବରକୁ ଚାପିଦେବାକୁ ଉଦ୍ୟମ କରିଚାଲିଛନ୍ତି । ଏହା ସତ୍ତ୍ବେ ଅନ୍ତର୍ଜାତୀୟ ଗଣମାଧ୍ୟମରେ ଏ ନେଇ କେତେକ ଖବର ପ୍ରକାଶିତ ହୋଇଛି । ରିପୋର୍ଟ ଅନୁସାରେ ‘ଭଏସ୍ ଅଫ ଚାଇନା’ ନାମକ ଏକ ଗ୍ରୁପ ପକ୍ଷରୁ ଏସବୁ ବିକ୍ଷୋଭ କରାଯାଉଛି । ଉଭୟ ଅନଲାଇନ ଓ ସଡ଼କରେ ଏହି ବିରୋଧ ପ୍ରଦର୍ଶନ କରାଯାଉଛି । ସାଂଘାଇ, ବେଜିଂ, ସେନଜେନ, ଗୁଆନଝୁ ଓ ହଂକଂରେ ଏପରି ବିକ୍ଷୋଭ ପ୍ରଦର୍ଶନ କରାଯାଇଛି । ଚୀନ ସୋସିଆଲ ମିଡିଆ ଓ୍ବେବୋରେ ଏ ସଂପର୍କିତ ଖବର ଓ ପୋଷ୍ଟକୁ ପ୍ରଶାସନ ପକ୍ଷରୁ ସେନସର କରାଯାଉଛି ।