ଶାହୀନଙ୍କୁ ହଟାଇବା ପରେ ହିଁ ଦଳ ଭଲ ପ୍ରଦର୍ଶନ କରିବ: ରସିଦ୍ ଲତିଫ୍

ଇସଲାମାବାଦ: ଶାହୀନଙ୍କ ପାଇଁ ହାରୁଛି ପାକିସ୍ତାନ। ତାଙ୍କୁ ଦଳରୁ ହଟାଅ। ପାକିସ୍ତାନ କ୍ରିକେଟ ଦଳର ପୂର୍ବତନ ୱିକେଟକିପର ରଶିଦ ଲତିଫ ଏହି ବୟାନ ଦେଇଛନ୍ତି। ସେ ବିଶ୍ୱାସ କରନ୍ତି ଯେ, ଯଦି ଶାହୀନ ଆଫ୍ରିଦିଙ୍କୁ ଦଳରୁ ବାହାର କରିଦିଆଯାଏ ତେବେ ପାକିସ୍ତାନ ଦଳ ଏକ ଭଲ ଦଳ ହୋଇପାରିବ। କେବଳ ଏତିକି ନୁହେଁ ଲତିଫ ଏହା ମଧ୍ୟ ବିଶ୍ୱାସ କରନ୍ତି ଯେ, ବାମହାତୀ ଦ୍ରୁତ ବୋଲର ଏପର୍ଯ୍ୟନ୍ତ କୌଣସି ମ୍ୟାଚ୍‌ରେ ମ୍ୟାଚ୍ ବିଜୟୀ ପ୍ରଦର୍ଶନ କରିନାହାଁନ୍ତି। ଚାମ୍ପିଅନ୍ସ ଟ୍ରଫି ପୂର୍ବରୁ ପାକିସ୍ତାନ, ଦକ୍ଷିଣ ଆଫ୍ରିକା ଏବଂ ନ୍ୟୁଜିଲାଣ୍ଡ ମଧ୍ୟରେ ଖେଳାଯାଇଥିବା ସିରିଜରେ ପାକ୍ ଦଳ ଶାହୀନଙ୍କଠାରୁ ବହୁତ ଆଶା ରଖିଥିଲା। କିନ୍ତୁ ସେ ଭଲ ପ୍ରଦର୍ଶନ କରିପାରିନଥିଲେ। ସିରିଜ୍ ସମୟରେ, ସେ ତିନୋଟି ମ୍ୟାଚ୍‌ରେ ୩୩.୧୬ ହାରରେ ମାତ୍ର ୬ଟି ୱିକେଟ୍ ନେଇଥିଲେ।

ସିରିଜରେ ବିଫଳତା ପରେ, ପାକିସ୍ତାନ ଦଳ ୨୦୨୫ ଚାମ୍ପିଅନ୍ସ ଟ୍ରଫିରେ ଶାହୀନ ଆଫ୍ରିଦିଙ୍କଠାରୁ ଭଲ ପ୍ରଦର୍ଶନ ଆଶା କରିଥିଲା। କିନ୍ତୁ ଏଠାରେ ମଧ୍ୟ ସେ ସମସ୍ତଙ୍କୁ ନିରାଶ କରିଥିଲେ। ସେ ଏହି ସମ୍ମାନଜନକ ଟୁର୍ଣ୍ଣାମେଣ୍ଟରେ ତାଙ୍କ ଦଳ ପାଇଁ ମୋଟ ଦୁଇଟି ମ୍ୟାଚ୍ ଖେଳିଥିଲେ। ଏହି ସମୟରେ, ସେ ଦୁଇଟି ଇନିଂସରେ ୭୧ ହାରରେ ଦୁଇଟି ୱିକେଟ୍ ନେବାରେ ସଫଳ ହୋଇଥିଲେ। ତାଙ୍କର ଏଭଳି ଖରାପ ପ୍ରଦର୍ଶନ ଦେଖି ଲତିଫ୍ କହିଛନ୍ତି, 'ଶାହିନ କେବେ ମ୍ୟାଚ୍ ବିଜୟୀ ପ୍ରଦର୍ଶନ କରିଥିଲେ? ତାଙ୍କୁ ହଟାଇ ଦିଆଯିବା ଉଚିତ, ତେବେ ହିଁ ଦଳରେ ଉନ୍ନତି ହେବ। ପିସିବିକୁ ନୂଆ ବୋଲର ଖୋଜି ଦଳକୁ ଆଣିବାକୁ ପଡିବ।'

କେବଳ ଲତିଫ୍ ନୁଅନ୍ତି ଚାମ୍ପିଅନ୍ସ ଟ୍ରଫିରେ ପାକିସ୍ତାନର ନୈରାଶ୍ୟଜନକ ପ୍ରଦର୍ଶନ ପରେ, ପୂର୍ବତନ ପାକିସ୍ତାନୀ କ୍ରିକେଟରମାନେ ବର୍ତ୍ତମାନର ଖେଳାଳିମାନଙ୍କ ଉପରେ କ୍ଷୁବ୍ଧ ଅଛନ୍ତି। ପାକିସ୍ତାନ ଆଗକୁ ନ୍ୟୁଜିଲ୍ୟାଣ୍ଡ ଗସ୍ତ କରିବ। ସେଠାରେ ଦଳକୁ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ଏବଂ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଖେଳିବାକୁ ପଡିବ। ପାକିସ୍ତାନୀ ଖେଳାଳିମାନେ ମାର୍ଚ୍ଚ ୧୨ରେ ନ୍ୟୁଜିଲାଣ୍ଡ ଗସ୍ତ ପାଇଁ ଉଡ଼ାଣ କରିବେ।