ରାବଣ ଠିକ୍ କରିଛନ୍ତି, ମାତା ସୀତାଙ୍କ ଅପହରଣ ପ୍ରେମର ପ୍ରତିଶୋଧ !: ମୁକେଶ ଛାବ୍ରାଙ୍କ ବିବାଦୀୟ ମନ୍ତବ୍ୟ

ମୁମ୍ବାଇ: ରଣବୀର କପୁରଙ୍କ ଆଗାମୀ ଚଳଚ୍ଚିତ୍ର 'ରାମାୟଣ'ର କାଷ୍ଟିଂ ନିର୍ଦ୍ଦେଶକ ମୁକେଶ ଛାବ୍ରା ଏକ ବିବାଦୀୟ ମନ୍ତବ୍ୟ ପ୍ରଦାନ କରିଛନ୍ତି। ଏକ ସାକ୍ଷାତକାରରେ ରାବଣ କରିଥିବା କାର୍ଯ୍ୟକୁ ଠିକ୍ ବୋଲି କହିଛନ୍ତି। ମାତା ସୀତାଙ୍କୁ ଅପହରଣ କରିବା ତାଙ୍କ ଭଉଣୀ ପ୍ରତି ରାବଣଙ୍କ ପ୍ରେମର ପ୍ରତିଶୋଧ ଥିଲା। କିନ୍ତୁ ତାଙ୍କ ମନ୍ତବ୍ୟକୁ ଏବେ ସମାଲୋଚନା କରାଯାଉଛି। ସୋସିଆଲ ମିଡିଆରେ ଲୋକମାନେ ନିର୍ଦ୍ଦେଶକ ମୁକେଶ ଛାବ୍ରାଙ୍କ ଏହି ମନ୍ତବ୍ୟକୁ ଭୁଲ ବୋଲି କହୁଛନ୍ତି।

ରାବଣ ବିଷୟରେ ଦେଇଥିବା ମନ୍ତବ୍ୟ ଯୋଗୁ ବଲିଉଡ ନିର୍ଦ୍ଦେଶକ ମୁକେଶ ଛାବ୍ରାଙ୍କ ପାଇଁ ସମସ୍ୟା ସୃଷ୍ଟି ହୋଇପାରେ ବୋଲି ଚର୍ଚ୍ଚା ହେଉଛି। ଏଭଳି ମନ୍ତବ୍ୟ ପ୍ରଦାନ କରି ସେ ବିବାଦରେ ଛନ୍ଦି ହୋଇଥିବା ଜଣାପଡିଛି। ନୀତୀଶ ତିୱାରୀଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର 'ରାମାୟଣ' କ୍ରମାଗତ ଭାବରେ ହେଡଲାଇନରେ ରହିଛି। ଏହି ଚଳଚ୍ଚିତ୍ରରେ ରଣବୀର କପୁର ପ୍ରଭୁ ରାମ ଭୂମିକାରେ ନଜର ଆସିବାକୁ ଥିବାବେଳେ ସାଇ ପଲ୍ଲଭି ସୀତା ଭୂମିକାରେ ଅଭିନୟ କରିବେ। ରାବଣର ଭୂମିକାରେ କେଜିଏଫ୍ ଚଳଚ୍ଚିତ୍ର ଅଭିନେତା ୟଶ ଅଭିନୟ କରିବାକୁ ଯାଉଛନ୍ତି।

ଏହି ଚଳଚ୍ଚିତ୍ର ଏବଂ ଚଳଚ୍ଚିତ୍ରର କାଷ୍ଟିଂ ନିର୍ଦ୍ଦେଶକ ମୁକେଶ ଛାବ୍ରା ରଣବୀର ଆହ୍ଲାବାଦିଆଙ୍କୁ ଦେଇଥିବା ସାକ୍ଷାତକାରରେ ଅନେକ କଥା କହିଛନ୍ତି। ଏହି ସମୟରେ ଯେତେବେଳେ ତାଙ୍କୁ ପଚରାଗଲା ଯେ ରାବଣ କାଷ୍ଟିଂ ସମୟରେ ସେ କେଉଁ ବିଷୟ ଉପରେ ଧ୍ୟାନ ଦେଇଛନ୍ତି? ଏହାର ଉତ୍ତରରେ ମୁକେଶ ଛାବ୍ରା କହିଥିଲେ, ସେ ମଧ୍ୟ ପ୍ରେମରେ ଥିଲେ, ନୁହେଁ କି? ସେ ପ୍ରତିଶୋଧ ଚାହୁଁଥିଲେ, କିନ୍ତୁ ସେ ମଧ୍ୟ ପ୍ରେମରେ ଥିଲେ।

ମୁଁ ଯେତେ ଦୂର ରାବଣଙ୍କୁ ବୁଝିପାରୁଛି, ସେ ଦୁଷ୍ଟ ଏବଂ ପ୍ରତିଶୋଧପରାୟଣ ଥିଲେ। କିନ୍ତୁ ତାଙ୍କ ପ୍ରତିଶୋଧ ତାଙ୍କ ଭଉଣୀଙ୍କ ପ୍ରତି ପ୍ରେମ ଦ୍ୱାରା ପ୍ରେରିତ ହୋଇଥିଲା। ସେ ଯାହା କରିଥିଲେ ତାହା ତାଙ୍କ ଭଉଣୀ ପାଇଁ କରିଥିଲେ। ସେ ତାଙ୍କ କାର୍ଯ୍ୟରେ ଠିକ୍ ଥିଲେ। ଯୁଦ୍ଧରେ ଉଭୟ ପକ୍ଷ ଅନୁଭବ କରିଥିଲେ ଯେ ସେମାନେ ଠିକ୍, କିନ୍ତୁ ଶେଷରେ ରାବଣ ପ୍ରେମ ଦ୍ୱାରା ପ୍ରେରିତ ହୋଇଥିଲେ।

ମୁକେଶ ଛାବ୍ରାଙ୍କ ଏହି ମନ୍ତବ୍ୟ ପରେ ଅନୁମାନ କରିବା କଷ୍ଟସାଧ୍ୟ ନୁହେଁ ଯେ ତାଙ୍କ ମନ୍ତବ୍ୟ ସାରା ଦେଶରେ ପସନ୍ଦ ହେବ ନାହିଁ। ସୋସିଆଲ ମିଡିଆରେ ଏ ସମ୍ପର୍କରେ ମନ୍ତବ୍ୟ ମଧ୍ୟ ଆରମ୍ଭ ହୋଇଛି। ମୁକେଶ ଛାବ୍ରାଙ୍କ ଏହି ମନ୍ତବ୍ୟକୁ ତୀବ୍ର ସମାଲୋଚନା କରାଯାଉଛି। ଏଭଳି ପରିସ୍ଥିତିରେ କୁହାଯାଇପାରେ ଯେ ମୁକେଶ ଛାବ୍ରାଙ୍କ ଏହି ମନ୍ତବ୍ୟ ବିବାଦ ଘେରରେ ରହିଛି। ଫଳରେ ରାମାୟଣ ଚଳଚ୍ଚିତ୍ର ଆରମ୍ଭ ହେବା ପୂର୍ବରୁ ବିବାଦରେ ଛନ୍ଦି ହୋଇପାରେ ବୋଲି ‌ଚର୍ଚ୍ଚା ହେଉଛି।