ଲୋକସଭାରେ ନାଗରିକତା ସଂଶୋଧନ ବିଲ୍ ଗୃହୀତ ହେବା ପରେ ପାକିସ୍ତାନୀ ହିନ୍ଦୁଙ୍କ ମଧ୍ୟରେ ଖୁସିର ଲହରୀ
ଜୈସଲମେର : ଲୋକସଭାରେ ସୋମବାରଦିନ ନାଗରିକତା ସଂଶୋଧନ ବିଲ-୨୦୧୯ ଗୃହୀତ ହେବା ପରେ ଭାରତରେ ରହୁଥିବା ପାକିସ୍ତାନୀ ହିନ୍ଦୁମାନଙ୍କ ଜୀବନରେ ଏକ ଆଶାର ଆଲୋକ ଦେଖାଦେଇଛି । ପାକିସ୍ତାନରେ ଅତ୍ୟାଚାରିତ ହୋଇ ସେମାନେ ଭାରତକୁ ପଳାଇଆସିଥିଲେ । ତେବେ ବର୍ଷ ବର୍ଷ ଧରି ଭାରତରେ ରହୁଥିଲେ ମଧ୍ୟ ସେମାନଙ୍କର କୌଣସି ଅଧିକାର ନଥିଲା । ଏହି ବିଲଟି ଗୃହୀତ ହୋଇ ଆଇନରେ ପରିଣତ ହେବା ପରେ ସେମାନେ ଭାରତର ନାଗରିକତା ପାଇପାରିବେ ।
Sambad is now on WhatsApp
Join and get latest news updates delivered to you via WhatsApp
ଗତକାଲି ଲୋକସଭାରେ ଏହି ବିଲ୍ ଗୃହୀତ ହେବା ପରେ ରାଜସ୍ଥାନର ଜୈସଲମେରରେ ରହୁଥିବା ପାକିସ୍ତାନୀ ହିନ୍ଦୁମାନେ ଉତ୍ସବ ପାଳନ କରିଛନ୍ତି, ପରସ୍ପର ମଧ୍ୟରେ ମିଠା ବାଣ୍ଟିଛନ୍ତି । ବିଗତ କିଛି ବର୍ଷ ଧରି ସେମାନେ ଭାରତରେ ରହୁଥିଲେ ମଧ୍ୟ ସେମାନେ ଏପର୍ଯ୍ୟନ୍ତ କୌଣସି ଅଧିକାର ପାଇନାହାନ୍ତି । ଏଥିପାଇଁ ସେମାନେ ବ୍ୟାଙ୍କ ଖାତା ଖୋଲିପାରୁନାହାନ୍ତି, ନିଜ ସନ୍ତାନମାନଙ୍କୁ ସ୍କୁଲ ପଠାଇପାରୁନାହାନ୍ତି, ସ୍ୱାସ୍ଥ୍ୟସେବା ପାଇପାରୁନାହାନ୍ତି । ଏହା ସତ୍ତ୍ୱେ ସେମାନେ ପାକିସ୍ତାନ ଫେରିବାକୁ ଚାହୁଁନାହାନ୍ତି । କାରଣ ପାକିସ୍ତାନ ଗଲେ ସେଠାରେ ବଳପୂର୍ବକ ଧର୍ମାନ୍ତରଣ, ମହିଳାମାନଙ୍କ ଅପହରଣ, ହତ୍ୟା ଆଦିର ସମ୍ମୁଖୀନ ହେବାକୁ ପଡିବ ।