ଇଣ୍ଡିଆ ମେଣ୍ଟ ଆବାହକ ପଦକୁ ନୀତୀଶଙ୍କ ‘ନା’ ପଛର କାରଣ: ବିଳମ୍ବିତ ପ୍ରସ୍ତାବ, ସହମତି ନାହିଁ, ଅଧିକ ଗୁରୁତ୍ବପୂର୍ଣ୍ଣ ଭୂମିକା ଚାହୁଛନ୍ତି

ନୂଆଦିଲ୍ଲୀ: ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ସୁପ୍ରିମୋ ନୀତୀଶ କୁମାରଙ୍କୁ ଇଣ୍ଡିଆ ମେଣ୍ଟର ରାଷ୍ଟ୍ରୀୟ ଆବାହକ କରିବା ପାଇଁ ତାଙ୍କ ଦଳର ନେତାମାନେ ଗତ କିଛିଦିନ ହେବ ଜୋର ଦେଇ ଆସୁଥିଲେ। ତଥାପି ଶନିବାର ଯେତେବେଳେ କଂଗ୍ରେସ ପକ୍ଷରୁ ପ୍ରସ୍ତାବ ଆସିଲା, ନୀତୀଶ ଏହାକୁ ପ୍ରତ୍ୟାଖ୍ୟାନ କରିବା ବିଶେଷ ଆଶ୍ଚର୍ଯ୍ୟଜନକ ନ ଥିଲା।
ତାଙ୍କର ଏହି ‘ନା’ ପଛରେ ୪ଟି ପ୍ରମୁଖ କାରଣ ରହିଛି।
କଂଗ୍ରେସ ପକ୍ଷରୁ ସ୍ପଷ୍ଟ ସଙ୍କେତ ମିଳିଥିଲେ ମଧ୍ୟ ଗତ ସପ୍ତାହରେ ନୀତୀଶଙ୍କୁ ଆବାହକ ଭାବେ ଘୋଷଣା କରାଯାଇ ନ ଥିଲା। ନୀତୀଶଙ୍କ ସ୍ଥିତି ବିଷୟରେ ପଚାରିବାରୁ କଂଗ୍ରେସ ମୁଖ୍ୟ ମଲ୍ଲିକାର୍ଜୁନ ଖଡ଼ଗେ ଯେଉଁ ପ୍ରତିକ୍ରିୟା ରଖିଥିଲେ ତାହା ତାଙ୍କୁ ଅପମାନଜନକ ମନେ ହୋଇଥିଲା। ସେ ପ୍ରଶ୍ନ କରିଥିଲେ ଯେ ଏହା ‘କେବିସି ପ୍ରଶ୍ନ କି’? ଜେଡିୟୁ ମୁଖପାତ୍ର କେସି ତ୍ୟାଗୀ କଂଗ୍ରେସକୁ ବଡ଼ ନିଷ୍ପତ୍ତି ନେବାରେ ତତ୍ପରତା ପ୍ରଦର୍ଶନ କରିବାକୁ କହିଥିଲେ। ରାହୁଲ ଗାନ୍ଧିଙ୍କ ଭାରତ ଯୋଡୋ ନ୍ୟାୟ ଯାତ୍ରା ପରିବର୍ତ୍ତେ ଜେଡିୟୁ ଇଣ୍ଡିଆ ଯାତ୍ରା ପାଇଁ ଦାବି କରିଥିବାବେଳେ ତ୍ୟାଗୀଙ୍କ ଆକ୍ରମଣାତ୍ମକ ଆଭିମୁଖ୍ୟ କଂଗ୍ରେସକୁ ଭଲ ଲାଗି ନ ଥିଲା। ତେଣୁ ଶେଷରେ କଂଗ୍ରେସ ଯେତେବେଳେ ପ୍ରସ୍ତାବ ଦେଲା, ସେତେବେଳେ ଜେଡିୟୁ ନେତାମାନେ ଏଥିରେ ଆନ୍ତରିକତାର ଅଭାବ ଅନୁଭବ କରିଥିଲେ।

ମିଳିଥିବା ସୂଚନା ଅନୁଯାୟୀ, ନୀତୀଶ କୁମାର ମେଣ୍ଟରେ ତାଙ୍କର ଭୂମିକାକୁ ନେଇ ସର୍ବଦା ସହମତି ପାଇଁ ପ୍ରୟାସ କରିଆସିଛନ୍ତି। ଦିଲ୍ଲୀରେ ଇଣ୍ଡିଆ ମେଣ୍ଟର ଶେଷ ବୈଠକ ପୂର୍ବରୁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲଙ୍କୁ ଭେଟିବା ନେଇ ତାଙ୍କର ଆପତ୍ତି ଥିଲା। ଯେତେବେଳେ ମମତା ବାନାର୍ଜୀ ବିରୋଧୀ ମେଣ୍ଟର ନେତୃତ୍ୱ ନେବା ପାଇଁ ଖଡ଼ଗେଙ୍କ ନାମ ପ୍ରସ୍ତାବ ଦେଲେ, ଏହା ତାଙ୍କୁ ଆହୁରି ଅସନ୍ତୁଷ୍ଟ କରିଥିଲା। ସେଥିପାଇଁ ସେ ଶନିବାର ଭର୍ଚୁଆଲ୍ ବୈଠକରେ ତାଙ୍କ ପାଇଁ ଏକ ପଦ ପ୍ରସଙ୍ଗରେ ସହମତି ମାଗିଥିଲେ।

ରାଜନୀତିରେ ପୋଖତ ନୀତୀଶ କୁମାର କଂଗ୍ରେସକୁ କଳିବାରେ ଭୁଲ୍ କରିବେ ନାହିଁ। ଅଯୋଧ୍ୟା ମନ୍ଦିର ପ୍ରତିଷ୍ଠା ସମାରୋହରୁ ଦୂରେଇ ରହିବା ପାଇଁ କଂଗ୍ରେସର ଆଭିମୁଖ୍ୟକୁ ସେ ଏପର୍ଯ୍ୟନ୍ତ ସମର୍ଥନ କରିବାକୁ ମନା କରିଦେଇଛନ୍ତି। ଏହା ସହିତ କଂଗ୍ରେସ ତାଙ୍କୁ ମେଣ୍ଟରେ ଅଧିକ ଗୁରୁତ୍ୱପୂର୍ଣ୍ଣ ଭୂମିକା ପ୍ରଦାନ କରିବ ବୋଲି ସେ ଅପେକ୍ଷା କରିଥିବା ଜଣାପଡିଛି। ଜେଡିୟୁର ଜଣେ ନେତା କହିଛନ୍ତି, ନୀତୀଶ ଆଶା କରନ୍ତି ଯେ କଂଗ୍ରେସ ସମସ୍ତ ଗୁରୁତ୍ୱପୂର୍ଣ୍ଣ ସହଯୋଗୀଙ୍କ ସହ କଥାବାର୍ତ୍ତା କରିବ ଏବଂ ତା’ପରେ ତାଙ୍କୁ ଏକ ନିର୍ଦ୍ଦିଷ୍ଟ ଭୂମିକା ସହିତ ଆବାହକ ପଦ ଗ୍ରହଣ କରିବାକୁ ରାଜି କରାଇବ।

ଶେଷରେ, ଜେଡିୟୁ ଏହାର ଇବିସି (ଅତ୍ୟନ୍ତ ପଛୁଆ ବର୍ଗ) ପିଚ୍‌କୁ ବଢ଼ାଇବା ଉପରେ ଧ୍ୟାନ ଦେବାକୁ ଚାହୁଛି, ଯାହା ବିହାର ଜାତି ସର୍ବେକ୍ଷଣର ମୁଖ୍ୟ ବିଷୟ, ଯେଉଁଥିରେ ଇବିସିକୁ ଜନସଂଖ୍ୟାର ୩୬.୧ ପ୍ରତିଶତ ଅଂଶ ଭାବରେ ସର୍ବବୃହତ୍‌ ସାମାଜିକ ଗୋଷ୍ଠୀ ଭାବରେ ଦର୍ଶାଯାଇଛି। ନୀତୀଶ ଜାନୁଆରି ୨୪ରେ ଇବିସିର ଆଇକନ୍ ତଥା ପୂର୍ବତନ ମୁଖ୍ୟମନ୍ତ୍ରୀ କର୍ପୁରୀ ଠାକୁରଙ୍କ ଜନ୍ମ ଶତବାର୍ଷିକୀ ପାଳନ ଅବସରରେ ଜେଡିୟୁ ନେତାମାନେ ଦୁଇଦିନ ପୂର୍ବରୁ କର୍ପୁରୀ ଠାକୁରଙ୍କ ପୈତୃକ ଗ୍ରାମ କର୍ପୁରୀରେ ଏକ ଉତ୍ସବରେ ଯୋଗ ଦେବେ। ଯଦିଓ ସରକାର ପ୍ରତିବର୍ଷ ଏହି କାର୍ଯ୍ୟକ୍ରମ ଆୟୋଜନ କରନ୍ତି, ତଥାପି ଶତବାର୍ଷିକୀ ଉତ୍ସବରେ ମୁଖ୍ୟମନ୍ତ୍ରୀଙ୍କଠାରୁ କିଛି ଗୁରୁତ୍ୱପୂର୍ଣ୍ଣ ଘୋଷଣା ହୋଇପାରେ ବୋଲି ସୂତ୍ରରୁ ପ୍ରକାଶ।