ଏବେ ସାଉଦି ଆରବରେ କିଣିହେବ ଜମି

ରିୟାଦ: ସାଉଦି ଆରବ ସରକାର ବିଦେଶୀ ନାଗରିକ ଏବଂ କମ୍ପାନୀଗୁଡ଼ିକୁ ଦେଶରେ ସମ୍ପତ୍ତି କିଣିବାକୁ ଅନୁମତି ଦେଇଛନ୍ତି। କେବଳ ବ୍ୟକ୍ତିଗତ କାମ ପାଇଁ ଜମି କିଣିହେବ। ଏହି ପରିବର୍ତ୍ତନ ୨୦୩୦ ଭିଜନ ଅଧୀନରେ କରାଯାଇଛି, ଯାହା ଦେଶର ଅର୍ଥନୀତିକୁ ତେଲ ଉପରେ ନିର୍ଭରଶୀଳତାରୁ ବାହାର କରିବାକୁ ଲକ୍ଷ୍ୟ ରଖିଛି।

୨୫ ଜୁଲାଇ ୨୦୨୫ରେ ସାଉଦି ସରକାରୀ ଗେଜେଟ୍ ଉମ୍ ଅଲ୍-କୁରାରେ ପ୍ରକାଶିତ ଏହି ଆଇନ ଅନୁଯାୟୀ, ବିଦେଶୀ ନାଗରିକମାନେ ଏବେ ଦେଶର ଅନେକ ଅଞ୍ଚଳରେ ସମ୍ପତ୍ତି କିଣିପାରିବେ। ଏହି ଆଇନ କାର୍ଯ୍ୟକାରୀ ହେବା ପୂର୍ବରୁ ୧୮୦ ଦିନର ପ୍ରସ୍ତୁତି ଅବଧି ରଖାଯାଇଛି, ଅର୍ଥାତ୍, ଏହି ଆଇନ ଜାନୁଆରୀ ୨୦୨୬ରୁ ପ୍ରଭାବଶାଳୀ ଭାବରେ କାର୍ଯ୍ୟକାରୀ ହେବ। ତେବେ ପବିତ୍ର ସହର ମକ୍କା ଓ ମଦିନାରେ ବିଦେଶୀମାନେ ଜମି କିଣିପାରିବେ ନାହିଁ । ଏହି ଦୁଇ ସହରର ଧାର୍ମିକ ଓ ସାଂସ୍କୃତିକ ପବିତ୍ରତା ବଜାୟ ରଖିବାକୁ ପୂର୍ବରୁ ଜାରି ରହିଥିବା କଟକଣା ଜାରି ରହିବ । ଆହୁରି ମଧ୍ୟ ଜମି କେବଳ ବ୍ୟକ୍ତିଗତ କାମ ପାଇଁ କିଣାଯାଇପାରିବ ।