କରୋନା ସଂକ୍ରମଣ ଭିତରେ ଆୟୋଜିତ ହେବ ଅମରନାଥ ଯାତ୍ରା, ଏପ୍ରିଲ ପହିଲାରୁ ପଞ୍ଜିକରଣ ଆରମ୍ଭ
ନୂଆଦିଲ୍ଲୀ: କରୋନା ମହାମାରୀ ଭିତରେ ଜୁନ୍ ୨୮ ତାରିଖରୁ ଆରମ୍ଭ ହେବାକୁ ଥିବା ଅମରନାଥ ଯାତ୍ରା ପାଇଁ ପଞ୍ଜିକରଣ ତାରିଖ ଘୋଷଣା କରାଯାଇଛି । ଏପ୍ରିଲ ପହିଲାରୁ ପଞ୍ଜିକରଣ ଆରମ୍ଭ ହେବ ବୋଲି ସୂଚନା ରହିଛି । ଏଥର ଅମରନାଥକୁ ଯିବା ପାଇଁ ଦୁଇଟି ରାସ୍ତା ସ୍ଥିର କରାଯାଇଛି । ଯାତ୍ରୀମାନେ ବାଲଟାଲ ଓ ପହଲଗାମ ଦେଇ ଦୁଇଟି ରାସ୍ତାରେ ଅମରନାଥ ଯାଇପାରିବେ । ଅମରନାଥ ଯାତ୍ରା କରିବାକୁ ଇଚ୍ଚୁକ ଯାତ୍ରୀ ପଞ୍ଜାବ ନ୍ୟାସନାଲ ବ୍ୟାଙ୍କର ୩୧୬ଟି ବ୍ରାଞ୍ଚ, ଜମ୍ମୁ-କାଶ୍ମୀର ବ୍ୟାଙ୍କର ୯୦ଟି ବ୍ରାଞ୍ଚ ଓ ୟେସ ବ୍ୟାଙ୍କର ୪୦ଟି ବ୍ରାଞ୍ଚରେ ପଞ୍ଜିକରଣ କରିପାରିବେ । ଏଥର ଅମରନାଥ ଯାତ୍ରା ୫୬ ଦିନ ଧରି ଚାଲିବ ଏବଂ ଜୁନ ୨୮ ତାରିଖରେ ଆରମ୍ଭ ହୋଇ ଅଗଷ୍ଟ ୨୨ ତାରିଖରେ ଶେଷ ହେବ।
Sambad is now on WhatsApp
Join and get latest news updates delivered to you via WhatsApp
ଶ୍ରୀଅମରନାଥ ମନ୍ଦିର ବୋର୍ଡର ସିଇଓ ନିତୀଶ୍ୱର କୁମାର ଏ ସଂକ୍ରାନ୍ତରେ ବିସ୍ତୃତ ସୂଚନା ଦେଇଛନ୍ତି । ସେ କହିଛନ୍ତି, ଯାତ୍ରୀମାନେ ଦେଉଥିବା ସ୍ୱାସ୍ଥ୍ୟ ସମ୍ବନ୍ଧୀୟ ଭୂଲ ସୂଚନାକୁ ରୋକିବାକୁ କେବଳ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶର ମାନ୍ୟତାପ୍ରାପ୍ତ ଡାକ୍ତର ଓ ମେଡିକାଲ ତରଫରୁ ଜାରି କରାଯାଇଥିବା ସାର୍ଟିଫିକେଟ୍ ଗ୍ରହଣ କରାଯିବ । ୨୦୨୧ ମାର୍ଚ୍ଚ ମାସ ୧୫ ତାରିଖ ପରେ ସାର୍ଟିଫିକେଟ ଇସ୍ୟୁ ହୋଇଥିବା ଆବଶ୍ୟକ ।
ଏହି ଯାତ୍ରା ବାବଦରେ ଅଧିକ ସୂଚନା ମନ୍ଦିର ବୋର୍ଡ ଅଧିକାରୀଙ୍କ ୱେବସାଇଟ୍ www.shriamarnathjishrine.com ରେ ଉପଲବ୍ଧ କରାଯାଇଛି । ନିତୀଶ୍ୱର କୁମାର ଆହୁରି କହିଛନ୍ତି କି ଏ ବର୍ଷ ୧୩ ବର୍ଷରୁ କମ୍ ଓ ୭୫ ବର୍ଷରୁ ଅଧିକ ବୟସର ଲୋକ ଓ ଗର୍ଭବତୀ ମହିଳାମାନଙ୍କୁ ଯାତ୍ରା ପାଇଁ ଅନୁମତି ମିଳିବ ନାହିଁ ।
ସପ୍ତାହର ପ୍ରତ୍ୟେକ ଦିନ ଓ ଅଲଗା ଅଲଗା ରାସ୍ତା ପାଇଁ ଅଲଗା ଅଲଗା ପରମିଟ୍ ମିଳିବ । ଏହି ପରମିଟ୍ ପେପରର ରଙ୍ଗ ବି ଅଲଗା ରହିବ, ଯାହା ଫଳରେ ଯାତ୍ରୀଙ୍କ ସୁରକ୍ଷା ପାଇଁ ନିୟୋଜିତ ହେଉଥିବା ସୁରକ୍ଷାକର୍ମୀମାନଙ୍କୁ ସୁରକ୍ଷା ଦେବାରେ ସହଜ ହେବ ।