ମୋ ଶିକ୍ଷକଙ୍କୁ ଆଜି ମନେପକାଉଛି: ରାଷ୍ଟ୍ରପତି
ନୂଆଦିଲ୍ଲୀ : ଜାତୀୟ ଶିକ୍ଷକତା ଦିବସ-୨୦୨୨ରେ କୃତୀ ଶିକ୍ଷକ ଓ ଶିକ୍ଷୟିତ୍ରୀମାନଙ୍କୁ ସମ୍ବୋଧନ କରିବା ଅବସରରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ନିଜ ସଂଘର୍ଷ ଜୀବନ ଯାତ୍ରାରେ ତାଙ୍କ ଶିକ୍ଷକମାନଙ୍କ ପ୍ରେରଣାକୁ ମନେ ପକାଇଥିଲେ। ସେ କହିଲେ, ଆଜିର ଦିବସରେ ମୁଁ ମୋ ଶିକ୍ଷକମାନଙ୍କୁ ମନେ ପକାଉଛି ଯେଉଁମାନେ ମୋତେ କେବଳ ଶିକ୍ଷାଦାନ କରିନଥିଲେ ବରଂ ସ୍ନେହ କରିଥିଲେ ଓ ସଂଘର୍ଷ କରିବା ପାଇଁ ପ୍ରେରଣା ଯୋଗାଇଥିଲେ। ମୋ ପରିବାର ଓ ଶିକ୍ଷକଙ୍କ ମାର୍ଗଦର୍ଶନ ବଳରେ ମୁଁ କଲେଜରେ ପାଠ ପଢ଼ିବାରେ ଗାଆଁର ପ୍ରଥମ ଝିଅ ଥିଲି। ଆଜି ମୋ ଜୀବନଯାତ୍ରା ଯେଉଁଠି ପହଞ୍ଚିଛି ସେଥିପାଇଁ ମୁଁ ସେହି ଶିକ୍ଷକଙ୍କ ପ୍ରତି କୃତଜ୍ଞତା ଜଣାଉଛି। ଯେଉଁ କ୍ଷେତ୍ର ଶିକ୍ଷା ସହ ଜଡ଼ିତ ତାକୁ ମୁଁ ଅଧିକ ମହତ୍ବ ଦେଉଛି।
Sambad is now on WhatsApp
Join and get latest news updates delivered to you via WhatsApp
ରାଇରାଙ୍ଗପୁରସ୍ଥିତ ଶ୍ରୀଅରବିନ୍ଦ ଇଣ୍ଟିଗ୍ରାଲ୍ ସ୍କୁଲରେ ଶିକ୍ଷୟିତ୍ରୀ ଭାବେ ଯୋଗଦାନର ସୁଯୋଗ ମୋତେ ମିଳିଥିଲା। ମୁଁ ପାହାଡ଼ପୁରରେ ଗୋଟିଏ ଆବାସିକ ବିଦ୍ୟାଳୟ ସ୍ଥାପନ କରିଥିଲି ଯେଉଁଠାରେ ଗରିବ ବିଦ୍ୟାର୍ଥୀମାନଙ୍କୁ ଶିକ୍ଷା ପ୍ରଦାନ କରାଯାଉଛି। ଉପେକ୍ଷିତ ବର୍ଗର ପିଲା ଓ ଦିବ୍ୟାଙ୍ଗ ପିଲାମାନଙ୍କ ପାଇଁ ଉତ୍ତମ ଶିକ୍ଷା କିଭଳି ସୁଲଭ ହୋଇପାରିବ ସେଥିପ୍ରତି ବିଶେଷ ପ୍ରାଥମିକତା ଦେବାର ଆବଶ୍ୟକତା ରହିଛି ବୋଲି ରାଷ୍ଟ୍ରପତି ଶ୍ରୀମତୀ ମୁର୍ମୁ ସମ୍ବୋଧନରେ ଉଲ୍ଲେଖ କହିଥିଲେ।