ନୂଆଦିଲ୍ଲୀ: ଖ୍ୟାତନାମା ଜ୍ୟୋତିର୍ପଦାର୍ଥବିଜ୍ଞାନୀ ପଦ୍ମବିଭୂଷଣ ଡ. ଜୟନ୍ତ ବିଷ୍ଣୁ ନାର୍ଲିକରଙ୍କର ମଙ୍ଗଳବାର ପୁଣେଠାରେ ପରଲୋକ ହୋଇଛି। ତାଙ୍କୁ ୮୭ ବର୍ଷ ବୟସ ହୋଇଥିଲା। ସେ ଛାଡ଼ି ଯାଇଥିବା ଛାପ ଅନେକ ପିଢ଼ିର ବୈଜ୍ଞାନିକଙ୍କୁ ପ୍ରେରଣା ଦେଇଛି। ଜୟନ୍ତ ନାର୍ଲିକରଙ୍କ ବିୟୋଗ ବୈଜ୍ଞାନିକ ସମୁଦାୟ ପାଇଁ ଏକ ବଡ଼ କ୍ଷତି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିବା ସହିତ ଶୋକ ପ୍ରକାଶ କରିଛନ୍ତି। ଡ. ନାର୍ଲିକରଙ୍କ ସବୁଠାରୁ ପ୍ରସିଦ୍ଧ ଅବଦାନ ହେଉଛି ହୋଏଲ-ନାର୍ଲିକର ସିଦ୍ଧାନ୍ତ, ଯାହା ୧୯୬୦ ଦଶକରେ ବ୍ରିଟିସ ଜ୍ୟୋତିଃପଦାର୍ଥବିଜ୍ଞାନୀ ସାର୍ ଫ୍ରେଡ୍ ହୋଏଲଙ୍କ ସହଯୋଗରେ ବିକଶିତ ହୋଇଥିଲା। ଏହି ଗୁରୁତ୍ବପୂର୍ଣ୍ଣ ଥିଓରି ବିଗ୍ ବ୍ୟାଙ୍ଗ ମଡେଲର ଏକ ବିକଳ୍ପ ପ୍ରଦାନ କରିଥିଲା।

Advertisment

ଗବେଷଣା ବ୍ୟତୀତ ଡକ୍ଟର ନାର୍ଲିକର ଜଣେ ଉତ୍ସାହୀ ଅଧ୍ୟାପକ ଓ ଅନୁଷ୍ଠାନ ନିର୍ମାତା ଥିଲେ। ସେ ପୁଣେରେ ଇଣ୍ଟର-ୟୁନିଭର୍ସିଟି ସେଣ୍ଟର ଫର୍ ଆଷ୍ଟ୍ରୋନୋମି ଆଣ୍ଡ ଆଷ୍ଟ୍ରୋଫିଜିକ୍ସ (ଆଇୟୁସିଏଏ) ପ୍ରତିଷ୍ଠା କରିଥିଲେ। ଜଣେ ପ୍ରଖ୍ୟାତ ଲେଖକ ଭାବେ ଡକ୍ଟର ନାର୍ଲିକର ଅନେକ ପୁସ୍ତକ ଓ ପ୍ରବନ୍ଧ ରଚନା ବି କରିଥିଲେ, ଯାହା ଜଟିଳ ବୈଜ୍ଞାନିକ ଚିନ୍ତାଧାରାକୁ ଜନସାଧାରଣଙ୍କ ନିକଟରେ ପହଞ୍ଚାଇଥିଲା ଏବଂ ଅଗଣିତ ଯୁବ ମନକୁ ବିଜ୍ଞାନ ପଢ଼ିବା ପାଇଁ ପ୍ରେରଣା ଦେଇଥିଲା। ୧୯୩୮ ମସିହା ଜୁଲାଇ ୧୯ରେ ଡ ନାର୍ଲିକର ଜନ୍ମ ହୋଇଥିଲେ। ବନାରସ ହିନ୍ଦୁ ବିଶ୍ବବିଦ୍ୟାଳୟରୁ ଶିକ୍ଷା ସମାପ୍ତ କରିବା ପରେ ଉଚ୍ଚଶିକ୍ଷା ପାଇଁ କେମ୍ବ୍ରିଜ ଯାଇଥିଲେ। ୨୬ ବର୍ଷ ବୟସରେ ଲାର୍ଲିକର ପଦ୍ମଭୂଷଣ ଏବଂ ୨୦୦୪ ମସିହାରେ ପଦ୍ମବିଭୂଷଣ ସମ୍ମାନରେ ସମ୍ମାନିତ ହୋଇଥିଲେ।