ଏହି ବ୍ୟାଙ୍କ ଉପରେ ୬ ମାସ ନିଷେଧାଜ୍ଞା ଲଗାଇଲା ରିଜର୍ଭ ବ୍ୟାଙ୍କ

ନୂଆଦିଲ୍ଲୀ: ଭାରତୀୟ ରିଜର୍ଭ ବ୍ୟାଙ୍କ ମହାରାଷ୍ଟ୍ରରେ ସକ୍ରିୟ ଥିବା ନ୍ୟୁ ଇଣ୍ଡିଆ କୋ-ଅପରେଟିଭ୍ ବ୍ୟାଙ୍କକୁ ୬ ମାସ ପାଇଁ ନିଷିଦ୍ଧ କରିଛି। ରିଜର୍ଭ ବ୍ୟାଙ୍କର ଏହି ପଦକ୍ଷେପ ପରେ ବ୍ୟାଙ୍କରୁ ଟଙ୍କା ଉଠାଣ ଏବଂ ନୂଆ ବ୍ୟବସାୟିକ କାରବାର ମଧ୍ୟ ବନ୍ଦ ହୋଇଯାଇଛି। 

କେତେକ ଅନିୟମିତତା ଧରା ପଡ଼ିଥିବାରୁ ରିଜର୍ଭ ବ୍ୟାଙ୍କ ନ୍ୟୁ ଇଣ୍ଡିଆ କୋଅପରେଟିଭ୍ ବ୍ୟାଙ୍କ ଉପରେ ଏହି କଟକଣା ଲଗାଯାଇଛି। ଫଳରେ ବ୍ୟାଙ୍କ ନିଜ ଗ୍ରାହକଙ୍କୁ ଋଣ ପ୍ରଦାନ କରିପାରିବ ନାହିଁ କି ଜମାକାରୀମାନେ ବ୍ୟାଙ୍କରୁ ଟଙ୍କା ଉଠାଇ ପାରିବେ ନାହିଁ। ରିଜର୍ଭ ବ୍ୟାଙ୍କର ଏହି ନିଷ୍ପତ୍ତି ଜଣାପଡ଼ିବା ପରେ ପୁଣେରୁ ପାଲଘର ପର୍ଯ୍ୟନ୍ତ ଏହି ବ୍ୟାଙ୍କର ଶାଖା ଆଗରେ ଗ୍ରାହକଙ୍କ ଲମ୍ବା ଲାଇନ ଦେଖିବାକୁ ମିଳିଥିଲା । ଲୋକମାନେ ନିଜ ନିଜର ଜମା ଉଠାଇବାକୁ ଲାଇନରେ ଅପେକ୍ଷା କରିଥିଲେ । 

ସାରା ଦେଶରେ ଏହି ବ୍ୟାଙ୍କର ୨୬ଟି ଶାଖା ରହିଛି ଯେଉଁଠାରେ ଲକ୍ଷ ଲକ୍ଷ ଆକାଉଣ୍ଟଧାରୀ ସେମାନଙ୍କ ଟଙ୍କା ଜମା କରିଛନ୍ତି । ଫଳରେ ସେମାନେ ଏବେ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ଲକ୍ଷ ଲକ୍ଷ ଲୋକ ଏହି ବ୍ୟାଙ୍କରୁ ଋଣ ମଧ୍ୟ ନେଇଛନ୍ତି । ଯଦି ବ୍ୟାଙ୍କ ଅନ୍ୟ କୌଣସି ସଂସ୍ଥା ହାତକୁ ଯାଏ ତେବେ ଏସବୁ ଋଣ ନୂଆ ସଂସ୍ଥା ଆଦାୟ କରିପାରିବ ।