ଟ୍ରେନ ଟେକିଲେ ହିଁ ଜଣାପଡିବ, ଆମ କ୍ରେନ ଟେକିପାରୁନି ଟ୍ରେନ: ଅଗ୍ନିଶମ ଡିଜି ସୁଧାଂଶୁ ଷଡ଼ଙ୍ଗୀ
ବାହାନଗା: ବାଲେଶ୍ବର ଜିଲ୍ଲାର ବାହାନଗା ନିକଟରେ ଶୁକ୍ରବାର ସନ୍ଧ୍ୟାରେ କରମଣ୍ଡଳ ଏକ୍ସପ୍ରେସ୍ (୧୨୮୪୧) ଓ ବେଙ୍ଗାଲୁରୁ-ହାୱଡା ଏକ୍ସପ୍ରେସ୍ (୧୨୮୬୪) ଧକ୍କା ହୋଇ ଭୟାବହ ଦୁର୍ଘଟଣାରେ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି | ଏଯାବତ ଏହି ଭୟାବହ ଦୁର୍ଘଟଣାରେ ୨୮୮ଜଣଙ୍କ ମୃତ୍ୟୁ ହୋଇଥିବା ବେଳେ ୮୦୩ ଜଣ ଲୋକଙ୍କ ଚିକିତ୍ସା ଜାରି ରହିଥିବା ଜଣାପଡ଼ିଛି। ଆହତ ୮୦୩ ଜଣଙ୍କ ମଧ୍ୟରେ ୫୬ ଜଣଙ୍କ ଅବସ୍ଥା ଗୁରୁତର ଥିବାବେଳେ ୭୪୭ ଜଣ ଆହତ ଅବସ୍ଥାରେ ଅଛନ୍ତି | ଗତକାଲି ରାତି ସାଢ଼େ ୮ଟାରୁ ଉଦ୍ଧାର କାର୍ଯ୍ୟ ଆରମ୍ଭ ହୋଇ ଶନିବାର ଅପରାହ୍ନରେ ଶେଷ ହୋଇଥିବାର ରେଳ ମନ୍ତ୍ରୀ କହିଥିଲେ ବି ଏଯାଏଁ କିଛି ବଗି ଉଠାଯାଇପାରିନାହିଁ । ତେଣୁ ବଗି ଉଠାଗଲେ ମୃତ୍ୟୁ ସଂଖ୍ୟା ବଢିପାରେ ବୋଲି କୁହାଯାଉଛି |
Sambad is now on WhatsApp
Join and get latest news updates delivered to you via WhatsApp
ବଡ଼କଥା ଯେ ଏବେ ଗୋଟିଏ ପରେ ଗୋଟିଏ ବଗି ଉଠାଯାଉଥିବାବେଳେ ଏହାତଳେ ଚାପି ହୋଇ ରହିଥିବା ମୃତଦେହ ମିଳିବାରେ ଲାଗିଛି | ବିଶେଷ କରି ଜାତୀୟ ଗଣମାଧ୍ୟମକୁ ଏକ ସାକ୍ଷାତକାର ଦେଇ ଅଗ୍ନିଶମ ଡିଜି ସୁଧାଂଶୁ ଷଡ଼ଙ୍ଗୀ କହିଛନ୍ତି ଯେ ଟ୍ରେନ ବଗି ଉଠିପାରିଲେ ହିଁ କହିହେବ ତଳେ କଣ ଅଛି | ବଗି ତଳେ ଯଦି କେହି ରହିଯାଇଥିବେ ଆଶା ନାହିଁ କି ବଞ୍ଚିଥିବେ | ଏତେ ସଂଖ୍ୟକ ମୃତଦେହ ଜୀବନରେ କେବେ ଦେଖିନଥିଲୁ | ବହୁତ ଦୁଃଖ ଲାଗୁଛି, ଚେଷ୍ଟା ଜାରି ରଖିଛୁ | ବିଶେଷ କରି ଗତକାଲିଠାରୁ ଆମେ କ୍ରେନ ଲଗାଇ ଟ୍ରେନ ବଗି ଉଠାଇବାକୁ ଚେଷ୍ଟା କରିଥିଲୁ କିନ୍ତୁ ସଫଳ ହୋଇପାରିନୁ | ଏବେ ରେଳର ଇଂଜିନିୟରମାନେ ଆସି ଟ୍ରେନ ଉଠାଇବାରେ ଲାଗିପଡିଛନ୍ତି | ବଗି ଉଠାଗଲେ ହିଁ ଜଣାପଡିବ |