ବିଜେପି ଉପରେ ନୀତୀଶ କୁମାର ରାଗିଛନ୍ତି କି ?
ନୂଆଦିଲ୍ଲୀ : ବିହାରରେ ମେଣ୍ଟ ସରକାର ଚଳାଉଥିବା ଜେଡିୟୁ ଓ ବିଜେପି ମଧ୍ୟରେ ଯେ ସବୁକିଛି ଠିକ ନାହିଁ ତାହା ନୀତୀଶଙ୍କ କାର୍ଯ୍ୟକଳାପରୁ ସ୍ପଷ୍ଟ ମନେହେଉଛି । ଆଜି ନୂଆଦିଲ୍ଲୀରେ ଅନୁଷ୍ଠିତ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଶପଥ ଗ୍ରହଣ ସମାରୋହରେ ରାଜ୍ୟ ମୁଖ୍ୟମନ୍ତ୍ରୀମାନେ ଯୋଗ ଦେଇଥିଲେ ବି ନୀତୀଶ ଯୋଗ ଦେଇନଥିଲେ ।
Sambad is now on WhatsApp
Join and get latest news updates delivered to you via WhatsApp
ଗତ କିଛି ସପ୍ତାହ ମଧ୍ୟରେ କେନ୍ଦ୍ର ସରକାରଙ୍କ ପକ୍ଷରୁ ଆୟୋଜିତ ତିନି ତିନିଟି ହାଇପ୍ରୋଫାଇଲ କାର୍ଯ୍ୟକ୍ରମରେ ନୀତୀଶ ବିଭିନ୍ନ ଆଳ ଦେଖାଇ ଯୋଗ ଦେଇନାହାନ୍ତି । ଗତ ୧୭ ତାରିଖରେ ଗୃହ ମନ୍ତ୍ରାଳୟ ପକ୍ଷରୁ ଆୟୋଜିତ ଏକ ଗୁରୁତ୍ବପୂର୍ଣ୍ଣ ବୈଠକରେ ଓ ଜୁଲାଇ ୨୨ରେ ବିଦାୟୀ ରାଷ୍ଟ୍ରପତି ରାମନାଥ କୋବିନ୍ଦଙ୍କ ସମ୍ମାନରେ ଆୟୋଜିତ ରାତ୍ରଭୋଜନରେ ବି ନୀତୀଶ ଯୋଗ ଦେଇନଥିଲେ । ଏଥିରୁ ନୀତୀଶଙ୍କ ଅସନ୍ତୋଷ ସ୍ପଷ୍ଟ ବାରି ହୋଇଯାଉଛି ।
ନୀତୀଶଙ୍କ ଅସନ୍ତୋଷର ପ୍ରକୃତ କାରଣ ଜଣାପଡ଼ିନଥିଲେ ବି ଦୁଇ ସପ୍ତାହ ତଳେ ଘଟିଥିବା ଏକ ଘଟଣା ଏହାର କାରଣ ହୋଇପାରେ ବୋଲି କୁହାଯାଉଛି । ବିହାର ବିଧାନସଭାର ଶତବାର୍ଷିକ ସମାରୋହ ଉପଲକ୍ଷେ ଆୟୋଜିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କାର୍ଯ୍ୟକ୍ରମ ପାଇଁ ଉଦ୍ଦିଷ୍ଟ ନିମନ୍ତ୍ରଣ ପତ୍ରରେ ନୀତୀଶଙ୍କ ନାମ ବାଦ ଦିଆଯାଇଥିଲା । ଏହାକୁ ନେଇ ଜେଡିୟୁ କ୍ଷୁବଧ ଥିବା ମନେକରାଯାଉଛି ।
ଗତ ଜୁନ ମାସରେ ହୋଇଥିବା ଅଗ୍ନିପଥ ଆନ୍ଦୋଳନ ବେଳେ ବି ବିଜେପି ଜେଡିୟୁ ମୁହାଁମୁହିଁ ହୋଇଥିଲେ । ବିଜେପି ନେତାଙ୍କ ସୁରକ୍ଷାରେ ରାଜ୍ୟ ସରକାର ବିଫଳ ହୋଇଥିବା ବିଜେପି ଅଭିଯୋଗ କରିଥିଲା ।