ଭାରତୀୟ ଜନତା ପାର୍ଟିରେ ଯୋଗ ଦେଲେ କ୍ରିକେଟ୍‌ ତାରକା ରବୀନ୍ଦ୍ର ଜାଡେଜାଙ୍କ ପତ୍ନୀ

ନୂଆଦିଲ୍ଲୀ: ଲୋକପ୍ରିୟ ଭାରତୀୟ କ୍ରିକେଟ୍‌ ତାରକା ରବୀନ୍ଦ୍ର ଜାଡେଜାଙ୍କ ପତ୍ନୀ ରିଭାବା ଜାଡେଜା ଭାରତୀୟ ଜନତା ପାର୍ଟିରେ ଯୋଗ ଦେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋମବାର ଦିନ ଜାମନଗରକୁ ଆସିବା ପୂର୍ବରୁ ରିଭାବା ଭାଜପାରେ ସାମିଲ ହୋଇଛନ୍ତି। ସେ ଗୁଜୁରାଟର କୃଷି ମନ୍ତ୍ରୀ ଆସି ଫାଲଦୁ ଓ ସାଂସଦ ପୁନମ୍‌ ମହାଜନଙ୍କ ଉପସ୍ଥିତିରେ ଭାଜପାରେ ଯୋଗ ଦେଇଛନ୍ତି। ଏଠାରେ ସୂଚନାଯୋଗ୍ୟ ଯେ ରିଭାବା ଗୁଜୁରାଟ ମହିଳା କରଣୀ ସେନାର ଅଧ୍ୟକ୍ଷା ଥିଲେ।
ରବୀନ୍ଦ୍ର ଜାଡେଜାଙ୍କ ଘର ଗୁଜୁରାଟର ଜାମନଗରରେ। ସେ ଅଷ୍ଟ୍ରେଲିଆ ବିପକ୍ଷ ଖେଳାଯାଉଥିବା ଦିନିକିଆ କ୍ରିକେଟ୍‌ ଭାରତୀୟ ଟିମ୍‌ରେ ସାମିଲ ଅଛନ୍ତି। ରିଭାବା ଓ ରବୀନ୍ଦ୍ରଙ୍କର ବାହାଘର ୨୦୧୬ରେ ହୋଇଥିଲା। ଗତ ବର୍ଷ ମଇ ମାସରେ ରିଭାବା ସେତେବେଳେ ଚର୍ଚ୍ଚାକୁ ଆସିଥିଲେ, ଯେତେବେଳେ ଜଣେ କନେଷ୍ଟବଳଙ୍କ ସହିତ ତାଙ୍କର ବିବାଦ ହୋଇଥିଲା। ପୁଲିସ ଏହି ମାମଲାରେ କନେଷ୍ଟବଳ ସଜାୟ ଅହୀରଙ୍କୁ ଗିରଫ କରିଥିଲା।

ଭାଜପା ଯୋଗ ଦେବାପରେ ଗୁଜୁରାଟର ପ୍ରଦେଶ ଅଧ୍ୟକ୍ଷ କହିଛନ୍ତି ଯେ, ରିଭାବାଙ୍କ ଯୋଗଦାନ ଦଳକୁ ଅଧିକ ଶକ୍ତିଶାଳୀ କରିବ। ଆଜି ପ୍ରଧାନମନ୍ତ୍ରୀଙ୍କ ଜାମନଗର କାର୍ଯ୍ୟକ୍ରମରେ ରିଭାବା ଜାଡେଜା ସାମିଲ ହେବେ ବୋଲି ଜଣାଯାଇଛି।