ବିବାହ ସାରି ଫେରୁଥିବା ବେଳେ ଧକ୍କା ଦେଲା ଟ୍ରକ୍, ଚାଲିଗଲା ୪ଜଣକ ଜୀବନ

ମିର୍ଜାପୁର: ବିବାହ ସାରି ଫେରୁଥିବା ବେଳେ ଧକ୍କା ଦେଲା ଟ୍ରକ୍। ଚାଲିଗଲା ୪ଜଣକ ଜୀବନ। ଉତ୍ତରପ୍ରଦେଶର ମିର୍ଜାପୁରରେ ଘଟିଛି ଏହି ଭୟଙ୍କର ସଡ଼କ ଦୁର୍ଘଟଣା। କାର ଏବଂ ଟ୍ରକ ମୁହାଁମୁହିଁ ଧକ୍କା ହେବା ଫଳରେ କାରରେ ଥିବା ଚାରି ଜଣଙ୍କର ମୃତ୍ୟୁ ଘଟିଛି। ଏହା ସହ ତିନି ଜଣ ଗୁରୁତର ଆହତ ହୋଇଛନ୍ତି। ଆହତଙ୍କୁ ଏବେ ବାରାଣସୀର ଚିକିତ୍ସା କେନ୍ଦ୍ରରେ ଭର୍ତ୍ତି କରାଯାଇଛି। କାରରେ ଥିବା ଲୋକମାନେ ଏକ ବିବାହ ଉତ୍ସବରୁ ଫେରୁଥିଲେ ବୋଲି ଜଣାପଡ଼ିଛି।

ମିଳିଥିବା ସୂଚନା ମୁତାବକ, ଶନିବାର ବିଳମ୍ବିତ ରାତିରେ ଅଦଲହାଟ ପୁଲିସ ଷ୍ଟେସନ ଅଞ୍ଚଳର ନାରାୟଣପୁରର ଅଙ୍କିତ ହସ୍ପିଟାଲ ସମ୍ମୁଖରେ ଏହି ଭୟଙ୍କର  ଦୁର୍ଘଟଣା ଘଟିଥିଲା। ଦୁର୍ଘଟଣା‌ ପରେ କାରରେ ଥିବା ୭ଜଣ ଗୁରୁତର ଆହତ ହୋଇଯାଇଥିଲେ। ସୂଚନା ପାଇବା ମାତ୍ରେ ପୁଲିସ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଲୋକଙ୍କ ସାହାଯ୍ୟରେ କାରରେ ଫସି ରହିଥିବା ଲୋକଙ୍କୁ ବାହାର କରିଥିଲା। ଏହା ପରେ ଆମ୍ବୁଲାନ୍ସ ସହାୟତାରେ ସେମାନଙ୍କୁ ପ୍ରଥମେ ବାରାଣସୀର ଲାଲ ବାହାଦୂର ଶାସ୍ତ୍ରୀ ଡାକ୍ତରଖାନାକୁ ନିଆଯାଇଥିଲା। ସେଠାରୁ ଗୁରୁତର ଅବସ୍ଥା ଦେଖି ଡାକ୍ତରମାନେ ଅଧିକ ଚିକିତ୍ସା ପାଇଁ ଆହତଙ୍କୁ ବିଏଚୟୁ ଟ୍ରମା ସେଣ୍ଟରକୁ ପଠାଇଥିଲେ। ହେଲେ ଚିକିତ୍ସା ସମୟରେ ବିଏଚୟୁର ଡାକ୍ତରମାନେ ତିନିଜଣ ମହିଳା ଏବଂ ଜଣେ ଶିଶୁକୁ ମୃତ ଘୋଷଣା କରିଥିଲେ।

କୁହାଯାଉଛି ଯେ କାରରେ ଥିବା ସମସ୍ତ ଲୋକ ବାରାଣସୀରେ ଏକ ବିବାହ ଉତ୍ସବରେ ଯୋଗ ଦେଇ ସୋନଭଦ୍ରକୁ ଫେରୁଥିଲେ।