ମହାରାଷ୍ଟ୍ରରେ ସରକାର ଗଠନ ଆଶା ବଢିଲା, ସର୍ବନିମ୍ନ ସାଧାରଣ କାର୍ଯ୍ୟକ୍ରମ ପାଇଁ ଶିବସେନା,କଂଗ୍ରେସ ଓ ଏନସିପି ମଧ୍ୟରେ ସହମତି
ମୁମ୍ବାଇ : ମହାରାଷ୍ଟ୍ରରେ ରାଜନୈତିକ ଅସ୍ଥିରତା ଶେଷ ହେବାର ଆଶା ସୃଷ୍ଟି ହୋଇଛି । ଏକ ସର୍ବନିମ୍ନ ସାଧାରଣ କାର୍ଯ୍ୟକ୍ରମ ପାଇଁ ତିନି ଦଳ ଶିବସେନା, କଂଗ୍ରେସ ଓ ଏନସିପି ରାଜି ହୋଇଥିବା ଜଣାପଡିଛି । ପ୍ରାୟ ୪୮ ଘଣ୍ଟାଧରି ବିଚାରବିମର୍ଷ ପରେ ତିନି ଦଳ ଏହି କାର୍ଯ୍ୟକ୍ରମ ଉପରେ ସହମତି ପ୍ରକାଶ କରିଛନ୍ତି । ଏହି ସର୍ବନିମ୍ନ ସାଧାରଣ କାର୍ଯ୍ୟକ୍ରମରେ କୃଷି ଋଣଛାଡ, ଫସଲ ବୀମା ଯୋଜନାର ସମୀକ୍ଷା, ବେରୋଜଗାରୀ, ଏମଏସପି ବୃଦ୍ଧି, ଶିବାଜୀ ଓ ଆମ୍ବେଦକର ମେମୋରିଆର ନିର୍ମାଣ ଆଦି ପ୍ରସଙ୍ଗ ରହିଛି । ସହମତି ପରେ ଏହି ଚିଠା ସର୍ବନିମ୍ନ ସାଧାରଣ କାର୍ଯ୍ୟକ୍ରମକୁ ତିନି ଦଳର ଅଧ୍ୟକ୍ଷଙ୍କ ମଂଜୁରୀ ପାଇଁ ପଠାଯିବ । ଔପଚାରିକ ସହମତି ପରେ ତିନି ଦଳ ମିଶି ରାଜ୍ୟପାଳଙ୍କ ନିକଟକୁ ଯାଇ ସରକାର ଗଠନ ପାଇଁ ଦାବି କରିବେ ।
Sambad is now on WhatsApp
Join and get latest news updates delivered to you via WhatsApp
ତେବେ ଏହି ମେଣ୍ଟ ସରକାରରେ ମୁଖ୍ୟମନ୍ତ୍ରୀ କିଏ ହେବ ତାହାକୁ ନେଇ ଏପର୍ଯ୍ୟନ୍ତ ସ୍ଥିତି ସ୍ପଷ୍ଟ ହୋଇନାହିଁ। ଗତ ୧୨ ତାରିଖରେ ମହାରାଷ୍ଟ୍ରରେ ରାଷ୍ଟ୍ରପତି ଶାସନ ପାଇଁ ରାଜ୍ୟପାଳ ଭଗତ ସିଂ କୋସ୍ୟାରୀ ସୁପାରିଶ କରିଥିଲେ । ଏହାକୁ ରାଷ୍ଟ୍ରପତି ମଂଜୁରୀ ଦେବା ପରେ ରାଜ୍ୟରେ ଏବେ ରାଷ୍ଟ୍ରପତି ଶାସନ ଚାଲିଛି ।