କଂଗ୍ରେସ ସାଂସଦଙ୍କ ‘ଅଲଗା ଦେଶ’ ମନ୍ତବ୍ୟକୁ ନେଇ ବିବାଦ, ଭାଇ ଡିକେ ଶିବକୁମାର ଦେଲେ ଏପରି ପ୍ରତିକ୍ରିୟା

ବେଙ୍ଗାଲୁରୁ: କର୍ଣ୍ଣାଟକ କେନ୍ଦ୍ରଠାରୁ ପର୍ଯ୍ୟାପ୍ତ ପାଣ୍ଠି ପାଉନାହିଁ ବୋଲି ଅଭିଯୋଗ କରି କଂଗ୍ରେସର ଲୋକସଭା ସାଂସଦ ଡିକେ ସୁରେଶ ଦକ୍ଷିଣ ଭାରତ ପାଇଁ ‘ଅଲଗା ଦେଶ’ ଦାବି କରିବା ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ ବୋଲି କହିବା ଘଟଣାକୁ କେନ୍ଦ୍ରକରି ବିବାଦ ସୃଷ୍ଟି ହୋଇଛି।

ଅର୍ଥମନ୍ତ୍ରୀ ନିର୍ମଳା ସୀତାରମଣ ଆଜି ସଂସଦରେ ଉପସ୍ଥାପିତ କରିଥିବା କେନ୍ଦ୍ର ବଜେଟ୍‌ ଉପରେ ପ୍ରତିକ୍ରିୟା ରଖି ଡିକେ ସୁରେଶ କହିଛନ୍ତି ଯେ ବଜେଟ୍‌ରେ ଦକ୍ଷିଣ ଭାରତ ପ୍ରତି ଅନ୍ୟାୟ କରାଯାଉଛି। ଦକ୍ଷିଣରେ ପହଞ୍ଚିବାକୁ ଥିବା ପାଣ୍ଠିକୁ ଉତ୍ତର ଭାରତକୁ ବଣ୍ଟନ କରାଯାଉଛି ବୋଲି ସେ ଅଭିଯୋଗ କରିଛନ୍ତି।

ଡିକେ ସୁରେଶ କହିଛନ୍ତି ଯେ ଦକ୍ଷିଣ ଭାରତ ଉପରେ ହିନ୍ଦୀ ଅଞ୍ଚଳ ଯେଉଁ ପରିସ୍ଥିତି ସୃଷ୍ଟି କରିଛି, ସେଥିପାଇଁ ଏକ ସ୍ୱତନ୍ତ୍ର ଦେଶ ମାଗିବା ବ୍ୟତୀତ ଅନ୍ୟ କୌଣସି ବିକଳ୍ପ ନାହିଁ।

ଡିକେ ସୁରେଶଙ୍କ ବୟାନ ଉପରେ ପ୍ରତିକ୍ରିୟା ରଖି ବିଜେପି ସାଂସଦ ତେଜସ୍ୱୀ ସୂର୍ଯ୍ୟ କହିଛନ୍ତି, କଂଗ୍ରେସ ପାର୍ଟିର ‘ବିଭାଜନ ଓ ଶାସନ’ର ଇତିହାସ ଥିବା ବେଳେ ଏହାର ସାଂସଦ ଡିକେ ସୁରେଶ ଏବେ ପୁଣି ଥରେ ଏହି କୌଶଳ ଖେଳୁଛନ୍ତି ଏବଂ ଉତ୍ତର ଓ ଦକ୍ଷିଣକୁ ବିଭାଜିତ କରିବାକୁ ଚାହୁଁଛନ୍ତି।

କର୍ଣ୍ଣାଟକ ବିଜେପିର ଅନ୍ୟ ଜଣେ ନେତା ଆର ଅଶୋକ କହିଛନ୍ତି, କଂଗ୍ରେସ ନେତା ରାହୁଲ ଗାନ୍ଧି ‘ଭାରତ ଯୋଡୋ’ ଯାତ୍ରା କରୁଥିବା ବେଳେ କର୍ଣ୍ଣାଟକ କଂଗ୍ରେସ ନେତା ତଥା ସାଂସଦ ଡିକେ ସୁରେଶ ‘ଭାରତ ତୋଡୋ’ ବିଷୟରେ କହୁଛନ୍ତି। କଂଗ୍ରେସ ଦଳର ବିଭାଜନ ଓ ଶାସନ ନୀତି ଯୋଗୁଁ ଦେଶରେ ଥରେ ବିଭାଜନ ହୋଇ ସାରିଛି ଏବଂ ଏବେ ସେମାନେ ଭାରତକୁ ପୁଣି ଥରେ ବିଭାଜନ କରିବା କଥା କହୁଛନ୍ତି।

ତେବେ, କର୍ଣ୍ଣାଟକ କଂଗ୍ରେସ ମୁଖ୍ୟ ତଥା ରାଜ୍ୟ ଉପମୁଖ୍ୟମନ୍ତ୍ରୀ ଡିକେ ଶିବକୁମାର କହିଛନ୍ତି ଯେ ଡିକେ ସୁରେଶ, ଯିଏ କି ତାଙ୍କ ଭାଇ, କେବଳ ଲୋକଙ୍କ ମତାମତ ପ୍ରକାଶ କରିଛନ୍ତି। ‘ମୁଁ ଅଖଣ୍ଡ ଭାରତ ସପକ୍ଷରେ ଅଛି। ସେ କେବଳ ଲୋକଙ୍କ ମତାମତ ପ୍ରକାଶ କରିଛନ୍ତି। ଲୋକମାନେ ଏପରି ଚିନ୍ତା କରୁଛନ୍ତି କାରଣ ସେମାନଙ୍କୁ ଅବହେଳା କରାଯାଉଛି। ଦେଶ ଗୋଟିଏ। ଲୋକଙ୍କ ପ୍ରତି ଅନ୍ୟାୟ ହେଉଥିବାରୁ ସେ (ଡିକେ ସୁରେଶ) ଏହା କହିଛନ୍ତିଯ ଭାରତ ଏକାଠି ଓ ଏକ ହେବା ଦରକାର। ଆମେ ସମସ୍ତେ ଏକ। କଶ୍ମୀରରୁ କନ୍ୟାକୁମାରୀ ପର୍ଯ୍ୟନ୍ତ ଆମେ ଏକ। ପ୍ରତ୍ୟେକ ଗାଁକୁ ନ୍ୟାୟ ମିଳିବା ଦରକାର’।