ଆଇପିଏଲ ନିଲାମ : ୧୩ ବର୍ଷୀୟ ବୈଭବଙ୍କୁ କିଣିଲା ରାଜସ୍ଥାନ ରୟାଲ୍ସ

ନୂଆଦିଲ୍ଲୀ: ଇତିହାସ ସୃଷ୍ଟି କରିଛନ୍ତି ବିହାରର ବୈଭବ ସୂର୍ଯ୍ୟବଂଶୀ । ସେ ମାତ୍ର ୧୩ ବର୍ଷ ବୟସରେ ବିଶ୍ୱର ସର୍ବବୃହତ କ୍ରିକେଟ ଲିଗ୍ ଆଇପିଏଲର ଚୁକ୍ତି ହାସଲ କରିଛନ୍ତି। ଆଇପିଏଲ୍ ନିଲାମର ଦ୍ୱିତୀୟ ଦିନରେ ରାଜସ୍ଥାନ ରୟାଲ୍ସ ୧.୧୦ କୋଟି ଟଙ୍କାର ବିଡ୍ କରି ବୈଭବଙ୍କୁ କିଣିଛି। ଏହି ବିସ୍ଫୋରକ ଓପନର ଆଇପିଏଲ ନିଲାମ ଇତିହାସରେ ସର୍ବକନିଷ୍ଠ କୋଟିପତି ହୋଇଛନ୍ତି।

ସମସ୍ତିପୁରର ବୈଭବ ସୂର୍ଯ୍ୟବଂଶୀ ଏତେ କମ୍ ବୟସରେ ଅନେକ ରେକର୍ଡ ସୃଷ୍ଟି କରିଛନ୍ତି। ସେ ୧୨ ବର୍ଷ ୨୮୪ ଦିନ ବୟସରେ ୨୦୨୩-୨୪ ରଣଜୀ ଟ୍ରଫି ଋତୁରେ ମୁମ୍ବାଇ ବିପକ୍ଷରେ ପଦାର୍ପଣ କରିଥିଲେ। ରଣଜୀରେ ପଦାର୍ପଣ କରିବାରେ ସେ ସର୍ବକନିଷ୍ଠ ଖେଳାଳି। ଏହି ସମୟରେ ସେ କିମ୍ବଦନ୍ତୀ ଯୁବରାଜ ସିଂହ ଓ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିଛନ୍ତି, ଯିଏ କି ଯଥାକ୍ରମେ ୧୫ ବର୍ଷ ୫୭ ଦିନ ଏବଂ ୧୫ ବର୍ଷ ଓ ୨୩୦ ଦିନ ବୟସରେ ରଣଜୀରେ ଡେବ୍ୟୁ କରିଥିଲେ।
ବୈଭବ ୟୁଥ ଟେଷ୍ଟ ସିରିଜରେ ଅଷ୍ଟ୍ରେଲିଆ ବିରୋଧରେ ମାତ୍ର ୬୪ ବଲରେ ଶତକ ହାସଲ କରିଥିଲେ ।  ବାମହାତୀ ବ୍ୟାଟ୍ସମ୍ୟାନ୍ ବୈଭବ ସୂର୍ଯ୍ୟବଂଶୀ ଆଇପିଏଲ୍ ନିଲାମ ପାଇଁ ମନୋନୀତ ଖେଳାଳି ତାଲିକାରେ ୪୯୧ତମ ସ୍ଥାନରେ ଥିଲେ।