ସଂସାର ମୋହମାୟା ତ୍ୟାଗ କରି ସନ୍ନ୍ୟାସୀ ହୋଇ ଚାଲିଗଲେ ୨୫ ବର୍ଷୀୟ ଋଷଭ ବୋଥ୍ରା
ପାଟନା: ଯୁବ ପିଢ଼ି ଯେତେବେଳେ ଧର୍ମ ଏବଂ ଆଧ୍ୟାତ୍ମିକତାଠାରୁ ଧୀରେ ଧୀରେ ଦୂରେଇ ଯାଉଛନ୍ତି, ବିହାରର ସମ୍ଭ୍ରାନ୍ତ ଘରର ଜଣେ ଯୁବକ ମୋହ ମାୟାକୁ ପର କରି ସନ୍ନ୍ୟାସୀ ହୋଇ ଚାଲିଯାଇଛନ୍ତି | ଆଉ ଯୁବକଙ୍କ ବିଦାୟକାଳୀନ ଦୃଶ୍ୟ ସମସ୍ତଙ୍କୁ କନ୍ଦାଇଦେଇଥିଲା | ବିହାର ଫରବିସଗଞ୍ଜର ୨୫ ବର୍ଷୀୟ ଯୁବକ ପରିବାର ସହ ମୋହ ମାୟା ତୁଟାଇ ଜୈନ ଧର୍ମ ଗ୍ରହଣ କରି ସାଧୁ ହୋଇ ଚାଲିଯାଇଛନ୍ତି | ଏହି ଯୁବକ ଜଣକ ହେଉଛନ୍ତି ପ୍ରଦୀପ ବୋଥ୍ରା ଏବଂ ମାତା ସୁରଜ ଦେବୀଙ୍କ ୨୫ ବର୍ଷର ପୁଅ ଋଷଭ ବୋଥ୍ରା |
Sambad is now on WhatsApp
Join and get latest news updates delivered to you via WhatsApp
ଋଷଭ ବୋଥ୍ରାଙ୍କ ଜେଜେବାପା ସ୍ୱର୍ଗତ ବୁଲାକି ଚାନ୍ଦ ବୋଥ୍ରା ଫରବିସଗଞ୍ଜର ସବୁଠାରୁ ବଡ ବ୍ୟବସାୟୀ ଥିଲେ ଏବଂ ଋଷଭଙ୍କ ବାପା ଏବେ ବ୍ୟବସାୟ ସମ୍ଭାଳୁଥିବାବେଳେ ଋଷଭ ସାଂସାରିକ ମୋହ ତ୍ୟାଗ କରି ସତ୍ୟ ଏବଂ ସଂଯମତାର ପଥ ଆପଣାଇଛନ୍ତି | ଋଷଭଙ୍କର ପ୍ରାଥମିକ ଶିକ୍ଷା ଫରବିସଗଞ୍ଜରେ ହୋଇଥିଲା | ଏହା ପରେ ସେ କୋଲକାତା ବିଶ୍ୱବିଦ୍ୟାଳୟରୁ ବାଣିଜ୍ୟରେ ସ୍ନାତକ ଡିଗ୍ରୀ ହାସଲ କରିଥିଲେ। ଏହା ପରେ ଋଷଭ ଜୈନ ସାଧୁମାନଙ୍କ ସଂସ୍ପର୍ଶରେ ଆସିଥିଲେ |
ସାଧୁମାନଙ୍କ ସେବା କରିବାବେଳେ ସାଧୁ ହୋଇଯିବାକୁ ନିଷ୍ପତ୍ତି ନେଇଥିଲେ | ସୂଚନା ମୁତାବକ ଋଷଭଙ୍କ ଭଉଣୀ ଗାରିମା ବୋଥ୍ରା ୨୦୧୨ ମସିହାରେ ସାଧବୀ ହୋଇ ଚାଲିଯାଇଥିଲେ | ଋଷଭ ଆଜି ଘରୁ ଚାଲିଯାଇଥିବାବେଳେ ଆସନ୍ତା ଫେବୃୟାରୀ ୨ ତାରିଖରେ ରାଜସ୍ଥାନର ଯୋଧପୁରରେ ସେ ଦୀକ୍ଷା ଗ୍ରହଣ କରିବେ | ତେବେ ଋଷଭଙ୍କ ପାଇଁ ଆଜି ପରିବାର ପକ୍ଷରୁ ବିଶାଳ ଶୋଭାଯାତ୍ରା ଆୟୋଜନ କରାଯାଇଥିଲା | ଶହ ଶହ ସଂଖ୍ୟାରେ ଜୈନ ଶ୍ରଦ୍ଧାଳୁ ଏଥିରେ ଯୋଗ ଦେଇଥିଲେ | ଆଉ ଋଷଭଙ୍କ ପରିବାର ତାଙ୍କୁ ବିଦାୟ ଦେଇଥିଲେ |