ମସ୍କୋ : ୟୁକ୍ରେନର ବୁଚା ଗଣହତ୍ୟାକୁ ନେଇ ସାରା ବିଶ୍ବରେ ଚିନ୍ତା ପ୍ରକାଶ ପାଇଛି । ତେବେ ଏହି ଗଣହତ୍ୟା କିଏ କରିଛି ତାହାକୁ ନେଇ ସଂଦେହ ଏବେ ବି ଅବ୍ୟାହତ ରହିଛି । ଗୋଟିଏ ପଟେ ୟୁକ୍ରେନ, ଆମେରିକା ଓ ପାଶ୍ଚାତ୍ୟ ଦେଶ ଏଥିପାଇଁ ରୁଷକୁ ଦାୟୀ କରୁଥିବାବେଳେ ଅନ୍ୟପକ୍ଷରେ ରୁଷ ଏହି ଅଭିଯୋଗକୁ ଖଣ୍ଡନ କରିଛି । ଆଜି ରୁଷ ଆଉ ଗୋଟିଏ ପାଦ ଆଗେଇଯାଇ ଏହି ଗଣହତ୍ୟାକୁ ନିନ୍ଦା କରିଛି ।
Sambad is now on WhatsApp
Join and get latest news updates delivered to you via WhatsApp
ଭାରତରେ ଥିବା ରୁଷ ଦୂତାବାସ ପକ୍ଷରୁ ଏକ ବୟାନ ଜାରି କରି ଏହାକୁ ନିନ୍ଦା କରିବା ସହ ଏହା ନାଜି ସମୟର ଗଣହତ୍ୟାକୁ ମନେ ପକାଇଦେଇଛି ବୋଲି କହିଛି । ଏହି ଘଟଣାକୁ ନେଇ ରୁଷ, ଭାରତ ଓ ବିଶ୍ବରେ ନିନ୍ଦା ପ୍ରକାଶ ପାଇଛି ବୋଲି ଦୂତାବାସ କହିଛି ।
ୟୁକ୍ରେନ ରାଜଧାନୀ କିବଠାରୁ ୩୭ କିଲୋମିଟର ଉତ୍ତର-ପୂର୍ବରେ ଥିବା ବୁଚା ସହରରେ ଏସବୁ ଗଣହତ୍ୟା ହୋଇଛି । ଏପର୍ଯ୍ୟନ୍ତ ପ୍ରାୟ ୩୦୦ ଲୋକଙ୍କ ଶବ ଚିହ୍ନଟ ହୋଇଛି । ଅଧିକାଂଶ ଲୋକଙ୍କ ହାତଗୋଡ଼ ବାନ୍ଧି ଅତି ନିକଟରୁ ଗୁଳି କରାଯାଇଛି । ଏହି ଗଣହତ୍ୟା ସମଗ୍ର ବିଶ୍ବରେ ଚହଳ ପକାଇଦେଇଛି । ଭାରତ ସମେତ ଆମେରିକା ଓ ପାଶ୍ଚାତ୍ୟ ଦେଶ ଏହାକୁ ନିନ୍ଦା କରିଛନ୍ତି । ଏଥିପାଇଁ ରୁଷକୁ ଦାୟୀ କରାଯାଉଛି କାରଣ ଗତ ପ୍ରାୟ ୧ ମାସ ହେବ ବୁଚା ରୁଷ କବଜାରେ ରହିଥିଲା । ମାତ୍ର ରୁଷ ଏହି ଘଟଣା ପଛରେ ହାତ ଥିବା କଥାକୁ ଅସ୍ବୀକାର କରିଛି ।