ଭାରତ-ଚୀନ ବିବାଦରେ ମୁଣ୍ଡ ପୁରାଇବ ନାହିଁ ଋଷିଆ : ଋଷୀୟ ସାଂସଦ
ନୂଆଦିଲ୍ଲୀ : ଭାରତ ଓ ଚୀନ ମଧ୍ୟରେ ଚାଲିଥିବା ସୀମା ବିବାଦରେ କୌଣସି ହସ୍ତକ୍ଷେପ କରିବାକୁ ଚାହୁଁନାହିଁ ଋଷିଆ । କିନ୍ତୁ ଏହି ବିବାଦ ଯଦି ଯୁଦ୍ଧ ଆଡ଼କୁ ଗତି କରେ ତେବେ ଋଷିଆ ଦୁଇପକ୍ଷ ମଧ୍ୟରେ ଏକ ମଧ୍ୟସ୍ଥିପରି ରହି ବିବାଦର ସମାଧାନ କରିବାକୁ ଉଦ୍ୟମ କରିବ ବୋଲି ଜଣେ ଋଷୀୟ ସାଂସଦ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ସାମ୍ବାଦିକମାନଙ୍କ ସହ ଭିଡିଓକନଫରେନ୍ସିଂ ମାଧ୍ୟମରେ ଆଲୋଚନା କରି ବୈଦେଶିକ ବ୍ୟାପାର ସମ୍ପର୍କିତ ଋଷିଆର ଫେଡେରେସନ କାଉନସିଲ କମିଟିର ସଭାପତି କନଷ୍ଟାଣ୍ଟିନ କୋସାଚେଭ କହିଛନ୍ତି ଯେ ଆମେ ଉଭୟ ଭାରତ ଓ ଚୀନର ସାର୍ବଭୌମତ୍ୱକୁ ସମ୍ମାନ ଜଣାଉ । ଆପୋସ ଆଲୋଚନା ମାଧ୍ୟମରେ ଦୁଇ ଦେଶ ମଧ୍ୟରେ ଥିବା ସୀମା ବିବାଦର ସମାଧାନ କରିହେବ । ଏଣୁ ଋଷିଆ ଏହି ବିବାଦରେ କୌଣସି ହସ୍ତକ୍ଷେପ କରିବା ଚାହେଁନାହିଁ । କିନ୍ତୁ ଏହି ବିବାଦ ଯଦି ଯୁଦ୍ଧ ଆଡ଼କୁ ଯାଏ ତେବେ ସେଥିରେ ହସ୍ତକ୍ଷେପ କରିବାକୁ ହେବ ।
ସେ କହିଛନ୍ତି ଯେ ଉଭୟ ଚୀନ ଓ ଭାରତ ଋଷିଆର ବନ୍ଧୁରାଷ୍ଟ୍ର । ଏଣୁ ଦୁଇଦେଶ ଆଲୋଚନା ମାଧ୍ୟମରେ ବିବାଦର ସମାଧାନ କରନ୍ତୁ ବୋଲି ମସ୍କୋ ଚାହେଁ ।
ଭାରତ ଆଫଗାନିସ୍ତାନର ପଡ଼ୋଶୀ ରାଷ୍ଟ୍ର ହୋଇଥିବାରୁ ଆଫଗାନ ଶାନ୍ତି ପ୍ରକ୍ରିୟାରେ ଭାରତର ଏକ ମହତ୍ତ୍ୱପୂର୍ଣ୍ଣ ଭୂମିକା ରହିଛି । ଭାରତ ଯେପରି ଆଫଗାନିସ୍ତାନରେ ବଡ଼ ଭୂମିକା ନିଭାଏ ତାହା ଋଷିଆ ଉଦ୍ୟମ କରିବ ବୋଲି ସେ କହିଛନ୍ତି ।