ଋଷର ମଜଭୁତ ସୁରକ୍ଷା ବ୍ୟବସ୍ଥା ଯୋଗୁ ବିଶେଷ କ୍ଷତି କରି ପାରିଲାନି ସୁନାମୀ

ନୂଆଦିଲ୍ଳୀ: ଋଷରେ ଶକ୍ତିଶାଳୀ ଭୂମିକମ୍ପ ଅନୁଭୂତ ହେବାପରେ ପ୍ରଶାନ୍ତ ମହାସାଗରୀୟ କ୍ଷେତ୍ରର ୧୨ଟି ରାଷ୍ଟ୍ର ପାଇଁ ବିପଦ ବଢ଼ିଯାଇଛି । ଆଜିଠାରୁ ଆରମ୍ଭ ହୋଇଥିବା ସୁନାମୀ ବିପର୍ଯ୍ୟୟ ଥମିବ ନାହିଁ ଏବଂ  ୧ ମାସ ପର୍ଯ୍ୟନ୍ତ ପରବର୍ତ୍ତୀ କମ୍ପନ ଜାରି ରହିବ ବୋଲି ଆମେରିକାର ଚେତାବନୀ ଲୋକଙ୍କୁ ଆତଙ୍କିତ କରିଛି । ଜାପାନ ପାଇଁ ସବୁଠାରୁ ବଡ଼ ବିପଦ ଆଶଙ୍କା ରହିଥିବାରୁ ସବୁ ଅଞ୍ଚଳରେ ସର୍ବାଧିକ ସତର୍କତା ଅବଲମ୍ବନ କରାଯାଉଛି । ଋଷର କାମ୍‌ଚାଟ୍‌କାରେ ଆସିଥିବା ଭୂମିକମ୍ପ ପ୍ୟାସିଫିକ୍‌ ପ୍ଲେଟ୍‌ ଓ ୟୁରେସିଆନ ପ୍ଲେଟ୍‌ ମଧ୍ୟରେ ଥିବା  ଜୋନ୍‌ରେ ଘଟିଥିଲା । ଯାହା ଏକ ଭୂମିକମ୍ପପ୍ରବଣ ବିପଦପୂର୍ଣ୍ଣ ଅଞ୍ଚଳ । ଏହା ପ୍ରଶାନ୍ତ ମହାସାଗରରେ ଅବସ୍ଥିତ  ୧୨ଟି ଦେଶରେ ସୁନାମୀ ବିପଦ ସୃଷ୍ଟି କରିଥିବା ବେଳେ ଜାପାନ ହିଁ ସର୍ବାଧିକ ପ୍ରଭାବିତ ହେବା ଆଶଙ୍କା ରହିଛି ।

 ଆମେରିକାର ହାଓ୍ୱାଇରେ ୫ ଦଶମିକ ୭ ଫୁଟ ଉଚ୍ଚ ସୁନାମୀ ଆସିଥିବା ବେଳେ କାଲିଫର୍ଣ୍ଣିଆ, ଓରେଗନ୍‌  ଓ ଆଲାସ୍କାରେ ବ୍ୟାପକ ସତର୍କତା ପଦକ୍ଷେପ ଗ୍ରହଣ କରାଯାଇଛି । ତେବେ ଏତେ ବଡ଼ ସୁନାମୀ ବିପଦ ଭିତରେ ରୁଷରେ କୌଣସି ଜୀବନ ହାନି ଘଟିନାହିଁ । ଋଷର ମଜଭୁତ ସୁରକ୍ଷା ବ୍ୟବସ୍ଥା ଯୋଗୁ ଏହା ସମ୍ଭବ ହୋଇଛି ।