ଟଙ୍କାରେ କାରବାର ପାଇଁ ରୁଷ୍, ଇରାନ, ୟୁଏଇ ଆଗ୍ରହୀ
ନୂଆଦିଲ୍ଲୀ : ଆମେରିକୀୟ ଡଲାରର ବୃଦ୍ଧି ପାଉଥିବା ଆଧିପତ୍ୟର ମୁକାବିଲା କରିବା ଲାଗି ଟଙ୍କା ଜରିଆରେ କାରବାର କରିବାକୁ ଭାରତ ସରକାର ବିଭିନ୍ନ ଦେଶକୁ ପ୍ରସ୍ତାବ ଦେଇଥିଲେ। ତିନିଟି ଦେଶ ସେଥିପ୍ରତି ଆଗ୍ରହ ପ୍ରକାଶ କରିଛନ୍ତି। ରୁଷ୍, ୟୁଏଇ ଓ ଇରାନ ଭାରତ ସହ ଟଙ୍କାରେ କାରବାର କରିବାକୁ ଚାହୁଛନ୍ତି। ବର୍ତ୍ତମାନ ପରିସ୍ଥିତିରେ ଭାରତରୁ ଚା’ ଆମଦାନି କରୁଥିବା ଏହି ତିନି ଦେଶ ଟଙ୍କାରେ ପେମେଣ୍ଟ୍ କରିବା ଲାଗି ରାଜି ହୋଇଛନ୍ତି। ଶ୍ରୀଲଙ୍କାରୁ ଚା’ କିଣୁଥିବା ଇରାକ, ସିରିଆ, ତୁର୍କୀ ଓ ପୋଲାଣ୍ଡ ଏବେ ଭାରତର ଚା’କ କିଣିବା ଲାଗି ଆଗ୍ରହ ପ୍ରକାଶ କରିଛନ୍ତି। ଶ୍ରୀଲଙ୍କା ଘୋର ଅର୍ଥନୈତିକ ସଙ୍କଟ ଦେଇ ଗତି କରୁଥିବାରୁ ଏହି ଦେଶଗୁଡ଼ିକ ତାହାର ବିକଳ୍ପ ବିଷୟରେ ଚିନ୍ତା କରିବା ଆରମ୍ଭ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଆନ୍ତର୍ଜାତିକ କାରବାରରେ ଟଙ୍କାକୁ ବ୍ୟବହାର କରିବା ଲାଗି ଗତ ଜୁଲାଇରେ ଭାରତୀୟ ରିଜର୍ଭ ବ୍ୟାଙ୍କ ଏହାର ଯୋଜନା ଘୋଷଣା କରିଥିଲା। ଯେଉଁ ସବୁ ଦେଶ ଉପରେ ଆମେରିକା କଟକଣା ଲଗାଇଛି ସେଭଳି ଦେଶ ସହ ଭାରତୀୟ କଂପାନିଗୁଡ଼ିକ ଯେଭଳି ଟଙ୍କା ବିନିମୟରେ ସହଜରେ କାରବାର କରିପାରିବେ ତାହା ଥିଲା ଏହି ଯୋଜନା ପଛର ମୁଖ୍ୟ ଉଦ୍ଦେଶ୍ୟ। ସେଭଳି ଦୁଇ ପ୍ରମୁଖ ଦେଶ ହେଉଛନ୍ତି ରୁଷ୍ ଓ ଇରାନ। ଉଭୟ ଦେଶରୁ ଭାରତ ବିପୁଳ ପରିମାଣର ତେଲ କିଣୁଥିବା ବେଳେ ରୁଷ୍ରୁ ସାର ମଧ୍ୟ ମଗାଯାଉଛି। ଯଦିଓ ଚା’ ମଗାଉଥିବା ତିନି ଦେଶ ଟଙ୍କାରେ କାରବାର କରିବାକୁ ଆଗ୍ରହ ପ୍ରକାଶ କରିଛନ୍ତି ତାହା ଆନ୍ତର୍ଜାତିକ ବଜାରରେ ଟଙ୍କାର ଗ୍ରହଣୀୟତା ବୃଦ୍ଧିରେ ବିଶେଷ ସହାୟକ ହେବନାହିଁ ବୋଲି ବଜାର ବିଶେଷଜ୍ଞମାନେ ମତ ଦେଇଛନ୍ତି। କିନ୍ତୁ କଟକଣା ଲାଗିଥିବା ଦେଶଗୁଡ଼ିକ ସହ ଭାରତ ସହଜରେ ଏହାର କାରବାରକୁ ତ୍ବରାନ୍ବିତ କରିପାରିବ।