ମସ୍କୋ : ରୁଷ ଓ ନାଟୋ ମଧ୍ୟରେ ଥିବା ଅହି-ନକୁଳ ସଂପର୍କ ଦିନକୁ ଦିନ ଆହୁରି ଖରାପ ହେବାରେ ଲାଗିଛି । ଫିନଲାଣ୍ଡ୍ ଓ ଆଉ କେତେକ ୟୁରୋପୀୟ ଦେଶ ନାଟୋରେ ମିଶିବାକୁ ନିଷ୍ପତ୍ତି ନେବା ପରେ ରୁଷ ଚିନ୍ତିତ ହୋଇପଡ଼ିଛି । ଏହା ସହିତ ରୁଷ ପକ୍ଷରୁ ପରୋକ୍ଷରେ ନାଟୋକୁ ଚେତାବନୀ ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ରୁଷର ଉପ ବୈଦେଶିକ ମନ୍ତ୍ରୀ ଆଲେକଜାଣ୍ଡାର ଗ୍ରୁସକୋ କହିଛନ୍ତି ଯେ ନାଟୋ ଯଦି ରୁଷର ସୀମା ନିକଟରେ ନ୍ୟୁକ୍ଲିଅର ଫୋର୍ସ ଓ ଭିତ୍ତିଭୂମି ନିର୍ମାଣ କଲେ ରୁଷ ତାହାର ଜବାବ ଦେବ । ନ୍ୟୁକ୍ଲିଅର ଫୋର୍ସର ମୁକାବିଲା ପାଇଁ ରୁଷ ଆବଶ୍ୟକ ସତର୍କତାମୂଳକ ପଦକ୍ଷେପ ଗ୍ରହଣ କରିବ ।
ୟୁରୋପୀୟ ଦେଶ ଫିନଲାଣ୍ଡ ନିଜର ନିରପେକ୍ଷତା ନୀତି ପରିତ୍ୟାଗ କରି ନାଟୋର ସଦସ୍ୟ ହେବାକୁ ନିଷ୍ପତ୍ତି ନେଇଛି । ଏହାର ପ୍ରତିକ୍ରିୟାରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି ଯେ, ଫିନଲାଣ୍ଡ ନିଜର ନିରପେକ୍ଷତା ନୀତି ପରିତ୍ୟାଗ କରିବା ଭୁଲ ନିଷ୍ପତ୍ତି । ରୁଷ ତରଫରୁ ଫିନଲାଣ୍ଡ ପ୍ରତି କୌଣସି ବିପଦ ନାହିଁ । ଏହା ସତ୍ତ୍ବେ ଫିନଲାଣ୍ଡ ନିକଟ ନିରପେକ୍ଷ ବୈଦେଶିକ ନୀତି ପରିତ୍ୟାଗ କରିବା ଦ୍ବାରା ରୁଷ ସହ ସଂପର୍କ ପ୍ରଭାବିତ ହେବ ବୋଲି ଫିନଲାଣ୍ଡର ରାଷ୍ଟ୍ରପତି ସାଉଲି ନିନିଷ୍ଟୋଙ୍କ ସହ ଟେଲିଫୋନ ଆଲୋଚନା ବେଳେ ପୁଟିନ କହିଛନ୍ତି ।