ଆମେରିକୀୟ ହାଇପରସୋନିକ୍ କ୍ଷେପଣାସ୍ତ୍ର ପ୍ରଯୁକ୍ତିବିଦ୍ୟା ଚୋରି କରିଛି ରୁଷିଆ: ଟ୍ରମ୍ପ୍

ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ରୁଷିଆ ଉପରେ ଆମେରିକୀୟ ହାଇପରସୋନିକ୍ କ୍ଷେପଣାସ୍ତ୍ର ପ୍ରଯୁକ୍ତିବିଦ୍ୟା ଚୋରି କରିବାର ଅଭିଯୋଗ ଆଣିଛନ୍ତି। ରାଷ୍ଟ୍ରପତି ଟ୍ରମ୍ପ୍ ଏକ ସାମରିକ ସମାବର୍ତ୍ତନ ସମାରୋହରେ ଏହା କହିଛନ୍ତି। ସେ କହିଛନ୍ତି, ଆଜି ଏଠାରେ ଆଠ ଜଣ କ୍ୟାଡେଟ୍ ନିଜର ହାଇପରସୋନିକ୍ ରକେଟ୍ ଡିଜାଇନ୍ କରିବାର ଚ୍ୟାଲେଞ୍ଜ ଗ୍ରହଣ କରିଛନ୍ତି। ଆମେ ଏବେ ସେଗୁଡ଼ିକୁ ତିଆରି କରୁଛୁ।

ଆମର ରକେଟ୍ ଜ୍ଞାନକୌଶଳ ଚୋରି ହୋଇଥିଲା। ଆମେ ଏହାର ଡିଜାଇନର୍। ରାଷ୍ଟ୍ରପତି ବାରାକ ଓବାମା ପ୍ରଶାସନ ସମୟରେ ଏହା ଚୋରି ହୋଇଥିଲା। ୱେଷ୍ଟ ପଏଣ୍ଟର ମିଚି ଷ୍ଟାଡିୟମରେ ଭାଷଣ ଦେଇ ଟ୍ରମ୍ପ୍ ରୁଷିଆ ଉପରେ ଏହାକୁ ଚୋରି କରିବାର ଅଭିଯୋଗ ଆଣିଛନ୍ତି।

ରାଷ୍ଟ୍ରପତି ଟ୍ରମ୍ପ୍ କହିଛନ୍ତି, କିଛି ଖରାପ ଘଟଣା ଘଟିଛି, ରୁଷୀୟମାନେ ଏହାକୁ ଚୋରି କରି ନେଇଛନ୍ତି। କିନ୍ତୁ ଏବେ ଆମେ ସେଗୁଡ଼ିକ ତିଆରି କରୁଛୁ। ଏହି ସମୟରେ, ସେ ଆମେରିକା ସାମରିକ ଏକାଡେମୀରେ ସ୍ନାତକ କ୍ୟାଡେଟମାନଙ୍କୁ କହିଛନ୍ତି ଯେ, ସେ ତାଙ୍କ ପ୍ରଥମ କାର୍ଯ୍ୟକାଳ ମଧ୍ୟରେ ଆମେରିକୀୟ ସଶସ୍ତ୍ର ବାହିନୀକୁ ପୁନଃନିର୍ମାଣ କରିଛନ୍ତି । ସେ ଏହା ମଧ୍ୟ କହିଛନ୍ତି, ଆମେରିକୀୟ ସେନା ନିଜର ମୂଳ ଜାତୀୟ ପ୍ରତିରକ୍ଷା ମିସନକୁ ଫେରିଯିବା ଉଚିତ୍।

କ୍ୟାଡେଟମାନଙ୍କୁ ସମ୍ବୋଧିତ କରି ସେ କହିଛନ୍ତି, ତୁମେ ବିଶ୍ୱର ସବୁଠାରୁ ମହାନ ଏବଂ ଶକ୍ତିଶାଳୀ ସେନାର ଅଧିକାରୀ ହେବ, ଏବଂ ମୁଁ ଏହା ଜାଣେ କାରଣ ମୁଁ ସେହି ସେନାକୁ ପୁନଃନିର୍ମାଣ କରିଛି। ଆମେ ଆମର ପ୍ରଥମ କାର୍ଯ୍ୟକାଳରେ ଏହାକୁ ଏପରି ନବୀକରଣ କରିଥିଲୁ ଯେପରି ପୂର୍ବରୁ କେହି କରି ନଥିଲେ।

ସେ କହିଛନ୍ତି, ସେନାର ଧ୍ୟାନ ଶତ୍ରୁକୁ ପରାସ୍ତ କରିବା ଏବଂ ଆମେରିକୀୟ ମୂଲ୍ୟବୋଧକୁ ସୁରକ୍ଷା ଦେବା ଉପରେ ହେବା ଉଚିତ୍।  ଆମେ ବିଭ୍ରାନ୍ତି ଦୂର କରୁଛୁ ଏବଂ ଆମର ସେନାକୁ ନିଜର ମୂଳ ମିସନ ଉପରେ ଧ୍ୟାନ ଦେବାକୁ କହି ଆମେରିକାର ବିରୋଧୀମାନଙ୍କୁ ଦମନ କରିବା, ଆମେରିକାର ଶତ୍ରୁମାନଙ୍କୁ ହତ୍ୟା କରିବା ଏବଂ ଆମର ମହାନ ଆମେରିକୀୟ ପତାକାକୁ ପୂର୍ବ ପରି ରକ୍ଷା କରିବା ବୋଲି ଟ୍ରମ୍ପ୍ କହିଛନ୍ତି।

ସେ ତାଙ୍କ ପୂର୍ବବର୍ତ୍ତୀ, ରାଷ୍ଟ୍ରପତି ଜୋ ବାଇଡେନ ପ୍ରଶାସନ ଅଧୀନରେ ସାମରିକ ନୀତିକୁ ଟାର୍ଗେଟ କରିଥିଲେ। ସାମରିକ ଘାଟିରେ ଅତୀତର ଘଟଣାବଳୀ ସମ୍ପର୍କରେ ଉଲ୍ଲେଖ କରି ସେ କହିଛନ୍ତି, ବିଦେଶୀ ସଂସ୍କୃତିକୁ ପରିବର୍ତ୍ତନ କରିବା ଆମେରିକୀୟ ସଶସ୍ତ୍ର ବାହିନୀର କାମ ନୁହେଁ।

donald-trump | USA | Russia