ମସ୍କୋ : ବୁଧବାରଦିନ ରୁଷ ପକ୍ଷରୁ ସରମତ୍ ଅନ୍ତଃମହାଦେଶୀୟ ବାଲିଷ୍ଟିକ୍ ମିସାଇଲର ପରୀକ୍ଷଣ କରାଯାଇଛି । ଆଣବିକ କ୍ଷମତା ସଂପନ୍ନ ଏହି ମିସାଇଲ ବିଶ୍ବର ଯେକୌଣସି ସ୍ଥାନରେ ଥିବା ଟାର୍ଗେଟକୁ ଧ୍ବଂସ କରିପାରିବ । ଏହି ମିସାଇଲର ବିଧ୍ବଂସକାରୀ କ୍ଷମତାକୁ ଦେଖି ଏହାକୁ ପାଶ୍ଚାତ୍ୟ ଦେଶମାନେ ସୈତାନ-୨ ବୋଲି ନାମ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ପରୀକ୍ଷଣ ପରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି ଯେ, ଶତ୍ରୁମାନେ ରୁଷ ଉପରେ ଆକ୍ରମଣ କରିବାପୂର୍ବରୁ ଦୁଇଥର ଭାବିବେ ।
ଏହି ମିସାଇଲ ପରୀକ୍ଷଣ ପୂର୍ବରୁ ରୁଷ ଆମେରିକାକୁ ସୂଚୀତ କରିଥିଲା । ଏଣୁ ଏହା ଏକ ପୂର୍ବ ନିର୍ଦ୍ଧାରିତ ପରୀକ୍ଷଣ ବୋଲି ଆମେରିକା କହିଛି । ତେବେ ୟୁକ୍ରେନ ଯୁଦ୍ଧ ଚାଲିଥିବାବେଳେ ଏହି ପରୀକ୍ଷଣକୁ ନେଇ ବିଶେଷଜ୍ଞମାନେ ଚିନ୍ତା ପ୍ରକଟ କରିଛନ୍ତି । ଏହି ପରୀକ୍ଷଣ କରି ରୁଷ ୟୁକ୍ରେନକୁ ସହାୟତା କରୁଥିବା ନାଟୋ ଦେଶମାନଙ୍କୁ ଚେତାବନୀ ଦେଇଛି ବୋଲି କୁହାଯାଉଛି । ଅର୍ଥାତ ଯେଉଁ ଦେଶମାନେ ୟୁକ୍ରେନକୁ ଅସ୍ତ୍ରଶସ୍ତ୍ର ଯୋଗାଉଛନ୍ତି ସେମାନଙ୍କ ଉପରେ ଆଣବିକ ମିସାଇଲ ମାଡ କରାଯିବ ବୋଲି ପୁଟିନ ପରୋକ୍ଷରେ ଧମକ ଦେଉଛନ୍ତି ବୋଲି ମନେ କରାଯାଉଛି ।
ସୂଚନାଯୋଗ୍ୟ ଯେ, ୟୁକ୍ରେନକୁ ଆମେରିକା ଓ ଅନ୍ୟ ପାଶ୍ଚାତ୍ୟ ଦେଶମାନେ ସାମରିକ ଅସ୍ତ୍ରଶସ୍ତ୍ର ଯୋଗାଉଛନ୍ତି । ଏସବୁ ଅସ୍ତ୍ରର ବ୍ୟବହାର କରି ୟୁକ୍ରେନର ରୁଷର ମୁକାବିଲା କରିଚାଲିଛି ।