ଆସନ୍ତା କିଛି ଦିନ ମଧ୍ୟରେ ୟୁକ୍ରେନ ଉପରେ ଆକ୍ରମଣ କରିପାରେ ଋଷିଆ : ବାଇଡେନ
ଓ୍ବାସିଂଟନ : ୟୁକ୍ରେନ ସଂକଟକୁ ନେଇ ଜଟିଳତା ବଢିଚାଲିଛି । ଗୋଟିଏ ପଟେ ଋଷିଆ ସୈନ୍ୟ ପ୍ରତ୍ୟାହାର ଘୋଷଣା କରିଥିବାବେଳେ ଅନ୍ୟପଟେ ଆମେରିକା କହୁଛି ଯେ ଋଷିଆ ଯେକୌଣସି ସମୟରେ ଆକ୍ରମଣ କରିପାରେ ।
Sambad is now on WhatsApp
Join and get latest news updates delivered to you via WhatsApp
ଆମେରିକା ରାଷ୍ଟ୍ରପତି ଜୋ ବାଇଡେନ କହିଛନ୍ତି ଯେ ଆମକୁ ଯେଉଁସବୁ ସଂକେତ ମିଳୁଛି ତାହା ଦର୍ଶାଉଛି ଯେ ଋଷିଆ ଆସନ୍ତା କିଛି ଦିନ ଭିତରେ ୟୁକ୍ରେନ ଉପରେ ଆକ୍ରମଣ କରିପାରେ । ତେବେ ଏହି ପ୍ରସଙ୍ଗରେ ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଫୋନ କରିବାର କୌଣସି ଯୋଜନା ନାହିଁ । ତେବେ ଏହି ସମସ୍ୟାର ସମାଧାନ ପାଇଁ ଏବେ ବି କୂଟନୈତିକ ପନ୍ଥା ଖୋଲା ରହିଛି । ଆଜି ଋଷିଆର ବୈଦେଶିକ ମନ୍ତ୍ରାଳୟ ପକ୍ଷରୁ କୁହାଯାଇଥିଲା ଯେ ୟୁକ୍ରେନ ଉପରେ ଆକ୍ରମଣ କରିବାର କୌଣସି ଯୋଜନା ନାହିଁ । ସୀମାରୁ ସୈନ୍ୟ ପ୍ରତ୍ୟାହାର ଆରମ୍ଭ ହୋଇଯାଇଛି । କିନ୍ତୁ ସଂପୂର୍ଣ୍ଣ ପ୍ରତ୍ୟାହାର ପାଇଁ ଆହୁରି ସମୟ ଲାଗିବ ।
ତେବେ ଋଷିଆର ସୈନ୍ୟ ପ୍ରତ୍ୟାହାରକୁ ପାଶ୍ଚାତ୍ୟ ଦେଶ ସଂଦେହ ଦୃଷ୍ଟିରେ ଦେଖୁଛନ୍ତି । ଆଜି ନିଜର ନାମ ଗୋପନ ରଖି ଜଣେ ଆମେରିକୀୟ ଅଧିକାରୀ କହିଥିଲେ ଯେ, ସୈନ୍ୟ ପ୍ରତ୍ୟାହାର ତ ଦୂରର କଥା, ଋଷିଆ ୟୁକ୍ରେନ ସୀମାରେ ପ୍ରାୟ ୭ ହଜାର ଅତିରିକ୍ତ ସୈନ୍ୟ ମୁତୟନ କରିଛି । ସୈନ୍ୟ ପ୍ରତ୍ୟାହାର ସମ୍ପର୍କରେ ମସ୍କୋ ମିଛ, କହୁଛି ଓ ଗୋପନରେ ଯୁଦ୍ଧ ପାଇଁ ପ୍ରସ୍ତୁତ ହେଉଛି ।