ମସ୍କୋ : ନାଟୋ ପଟୁ ଥିବା ବିପଦ ଦୂର କରିବା ଓ ନାଟୋ ନିୟନ୍ତ୍ରଣରୁ ୟୁକ୍ରେନକୁ ମୁକ୍ତ କରିବା ପରେ ହିଁ ସାମରିକ ଅଭିଯାନ ଶେଷ କରାଯିବ । ଏପର୍ଯ୍ୟନ୍ତ ଏହି ସାମରିକ ଅଭିଯାନର ଅଗ୍ରଗତି ସନ୍ତୋଷଜନକ ରହିଛି ବୋଲି ରୁଷ କହିଛି ।
Sambad is now on WhatsApp
Join and get latest news updates delivered to you via WhatsApp
ରୁଷର ସରକାରୀ ନିୟନ୍ତ୍ରଣାଧିନ ସମ୍ବାଦ ସରବରାହ ସଂସ୍ଥା ଟାସରେ ପ୍ରକାଶିତ ରିପୋର୍ଟ ଅନୁସାରେ ନିଜର ଲକ୍ଷ୍ୟ ହାସଲ ପରେ ୟୁକ୍ରେନରେ ଚାଲିଥିବା ମିଲିଟାରୀ ଅପରେସନ ଶେଷ ହେବ । ପ୍ରମୁଖ ଲକ୍ଷ୍ୟ ହେଉଛି ନାଟୋ ପଟୁ ଥିବା ବିପଦ ଦୂର କରିବା ଓ ନାଟୋ ନିୟନ୍ତ୍ରଣରୁ ୟୁକ୍ରେନକୁ ମୁକ୍ତ କରିବା । ରୁଷ ବୈଦେଶିକ ମନ୍ତ୍ରାଳୟ ତରଫରୁ ଆଲେକ୍ସି ପୋଲିସଚୁକ୍ କହିଛନ୍ତି ଯେ ଏହି ମିଲିଟାରୀ ଅପରେସନର ଆଉ କେତେକ ଲକ୍ଷ୍ୟ ହେଉଛି ଡୋନବାସର ଶାନ୍ତିପୂର୍ଣ୍ଣ ଜନତାଙ୍କ ସୁରକ୍ଷା, ୟୁକ୍ରେନର ବେସାମରିକରଣ ।
ଏଠାରେ ଉଲ୍ଲେଖଯୋଗ୍ୟ ଯେ, ୟୁକ୍ରେନ ଉପରେ ଚାଲିଥିବା ଆକ୍ରମଣକୁ ରୁଷ ଏକ ମିଲିଟାରୀ ଅପରେସନ ବୋଲି କହୁଛି । କିନ୍ତୁ ସମଗ୍ର ବିଶ୍ବରେ ଏହାକୁ ୟୁକ୍ରେନ ବିରୋଧରେ ରୁଷର ଯୁଦ୍ଧ ବୋଲି କୁହାଯାଉଛି । ଗତ ଫେବ୍ରୁଆରି ୨୪ ତାରିଖରେ ରୁଷ ୟୁକ୍ରେନ ଉପରେ ଆକ୍ରମଣ ଆରମ୍ଭ କରିଥିଲା । ଏବେ ଏହି ଯୁଦ୍ଧ ୫୭ ତମ ଦିନରେ ପହଞ୍ଚିଛି । ଏହି ଯୁଦ୍ଧ ଯୋଗୁଁ ଆମେରିକା ଓ ପାଶ୍ଚାତ୍ୟ ଦେଶମାନେ ରୁଷ ଉପରେ କଠୋର ଆର୍ଥିକ କଟକଣା ଲଗାଇଛନ୍ତି ।