ଋଷିଆର ହ୍ୟାକରମାନେ ଚୋରାଉଛନ୍ତି କରୋନା ଟୀକା ତଥ୍ୟ : ବ୍ରିଟେନର ସାଂଘାତିକ ଅଭିଯୋଗ
ନୂଆଦିଲ୍ଲୀ : ବିଶ୍ୱରେ କରୋନା ମହାମାରୀର ମୁକାବିଲା କରିବାକୁ ବୈଜ୍ଞାନିକମାନେ ଗବେଷଣା ଜାରି ରଖିଛନ୍ତି । ଏସବୁ ଗବେଷଣା ଉପରେ ମାନବ ଜାତିର ଭବିଷ୍ୟତ ନିର୍ଭର କରୁଛି । କିନ୍ତୁ ଏସବୁ ଗବେଷଣାକୁ ନେଇ ଦେଶ ଦେଶ ମଧ୍ୟରେ କାଦୁଅ ଫିଙ୍ଗା ଆରମ୍ଭ ହୋଇଯାଇଛି ।
କରୋନା ଟୀକା ବାହାର କରିବା କ୍ଷେତ୍ରରେ ସଫଳତା ଆଡ଼କୁ ଅଗ୍ରସର ହେଉଛି ବୋଲି କିଛିଦିନ ତଳେ ଦାବି କରିଥିବା ଋଷିଆ ବିରୁଦ୍ଧରେ ଏକ ସାଂଘାତିକ ଅଭିଯୋଗ କରିଛି ବ୍ରିଟେନ ।
Sambad is now on WhatsApp
Join and get latest news updates delivered to you via WhatsApp
ବ୍ରିଟେନର ଜାତୀୟ ସାଇବର ସୁରକ୍ଷା କେନ୍ଦ୍ର (ଏନସିଏସସି) କହିଛି ଯେ ଋଷିଆର ହ୍ୟାକର ମାନେ ବ୍ରିଟେନର କରୋନା ଟୀକା ସଂପର୍କିତ ଗବେଷଣା ତଥ୍ୟ ଚୋରାଇ ନେଇଛନ୍ତି । କେବଳ ବ୍ରିଟେନ ନୁହେଁ, ଆମେରିକା ଓ କାନାଡା ମଧ୍ୟ ଏହି ଅଭିଯୋଗ କରିଛନ୍ତି । ଏହି ସାଇବର ଚୋରୀ ପଛରେ ଋଷିଆର ଗୁଇନ୍ଦା ସଂସ୍ଥାର ହାତ ଥିବା ସେମାନେ ଅଭିଯୋଗ କରିଛନ୍ତି ।
ଏନସିଏସସି ମୁଖ୍ୟ ପଲ ଚିଚେଷ୍ଟର କହିଛନ୍ତି ଯେ ଯେଉଁମାନେ କରୋନା ମହାମାରୀ ବିରୁଦ୍ଧରେ ଲଢୁଛନ୍ତି ଏହା ସେମାନଙ୍କ ବିରୁଦ୍ଧରେ ଏକ ଆକ୍ରମଣ ସଦୃଶ । ସେହିପରି ବ୍ରିଟିଶ ବିଦେଶ ମନ୍ତ୍ରୀ ଡୋମିନିକ ରାବ କହିଛନ୍ତି ଯେ କରୋନା ଗବେଷଣାକୁ ଋଷିଆ ଟାର୍ଗେଟ କରିବା ଆଦୌ ଗ୍ରହଣୀୟ ନୁହେଁ । ସେ ଆହୁରି ମଧ୍ୟ କହିଛନ୍ତି ଯେ ଅନ୍ୟମାନେ ନିଜ ନିଜର ସ୍ୱାର୍ଥରକ୍ଷା ପାଇଁ ଉଦ୍ୟମ ଚଳାଇଥିବାବେଳେ ବ୍ରିଟେନ ମାନବ ଜାତିକୁ ସୁରକ୍ଷିତ ରଖିବାକୁ ଉଦ୍ୟମ ଚଳାଇଛି ।