ଓଡ଼େଶାରେ ରୁଷ୍ର ମିସାଇଲ ମାଡ଼, ୨୧ ମୃତ
କିବ୍ : ଦକ୍ଷିଣ ୟୁକ୍ରେନର ଓଡ଼େଶାରେ ଶୁକ୍ରବାର ଦିନ ରୁଷ୍ ଭୟଙ୍କର ଆକ୍ରମଣ କରିଛି। ରୁଷ୍ର ମିସାଇଲ ମାଡ଼ ଯୋଗୁ ଓଡ଼େଶାରେ ୨୧ ଜଣଙ୍କ ମୃତ୍ୟୁ ହୋଇଯାଇଛି। ସାଧାରଣ ଜନବସତି ଅଞ୍ଚଳକୁ ଟାର୍ଗେଟ୍ କରି ରୁଷ୍ ୩ଟି କେଏଚ୍-୨୨ ମିସାଇଲ୍ ମାଡ଼ କରିଛି। ଏକ ଆପାର୍ଟମେଣ୍ଟ୍ ବିଲ୍ଡିଂରେ ମିସାଇଲ ମାଡ଼ ଯୋଗୁ ଏକାବେଳେ ୧୬ ଜଣଙ୍କ ମୃତ୍ୟୁ ହୋଇଛି। ଅନ୍ୟ ଏକ କମ୍ୟୁନିଟି ସେଣ୍ଟରରେ ମିସାଇଲ ମାଡ଼ ଯୋଗୁ ଜଣେ ଶିଶୁ ସମେତ ୪ ଜଣଙ୍କ ମୃତ୍ୟୁ ହୋଇଛି। ତୃତୀୟ ମିସାଇଲ୍ଟି ଏକ ବଡ଼ ପଡ଼ିଆରେ ମାଡ଼ ହୋଇଛି। ରୁଷ୍ର ମିସାଇଲ ମାଡ଼ ଯୋଗୁ ୬ ଶିଶୁ ସମେତ ମୋଟ୍ ୩୮ ଜଣ ଆହତ ହୋଇଛନ୍ତି। ରୁଷ୍ ପୂର୍ବ ୟୁକ୍ରେନରେ ମଧ୍ୟ ଆକ୍ରମଣ ଜାରି ରଖିଛି। ଇତି ମଧ୍ୟରେ ରୁଷ୍ ଆଜି ଏକ ଘୋଷଣା କରି କହିଛି ଯେ ଏହା ଲିସିଚାନସ୍କ ଅଏଲ୍ ରିଫାଇନରିକୁ ସମ୍ପୂର୍ଣ୍ଣ ନିୟନ୍ତ୍ରଣକୁ ନେଇଛି।