ଜଳିଗଲା ୬୫ ଯୁଦ୍ଧବନ୍ଦୀ ଥିବା ରୁଷୀୟ ବିମାନ

ନୂଆଦିଲ୍ଲୀ: ୬୫ ୟୁକ୍ରେନୀୟ ଯୁଦ୍ଧବନ୍ଦୀଙ୍କୁ ନେଇ ଯାଉଥିବା ରୁଷର ଏକ ଆଇଏଲ-୭୬ ପରିବହନ ବିମାନ ଦୁର୍ଘଟଣାଗ୍ରସ୍ତ ହୋଇଛି । ବିମାନଟି ବେଲଗୋରୋଡ୍ ଅଂଚଳରେ ଦୁର୍ଘଟଣାଗ୍ରସ୍ତ ହୋଇଥିଲା । ଏଥିରେ ମଧ୍ୟ ୬ ଜଣ କ୍ରିଉ ମେମ୍ବର ଓ ୩ ଜଣ ସୁରକ୍ଷା କର୍ମୀ ଥିବା ରୁଷର ସରକାରୀ ନ୍ୟୁଜ ଏଜେନ୍ସି ଟାସ୍ କହିଛି । ଦୁର୍ଘଟଣାର କାରଣ ଜଣାପଡ଼ିନାହିଁ । ଏହି ଦୁର୍ଘଟଣାର ତଦନ୍ତ ନିର୍ଦ୍ଦେଶ ଦେଇଛି ରୁଷ ବାୟୁସେନା ଓ ଘଟଣାସ୍ଥଳରେ ତଦନ୍ତକାରୀ ଅଧିକାରୀମାନେ ପହଞ୍ଚିଛନ୍ତି ।

ଦୁର୍ଘଟଣାର ଏକ ଭିଡିଓରେ ଦେଖିବାକୁ ମିଳୁଛି ଯେ ବିମାନଟି ଦ୍ରୁତ ଗତିରେ ତଳକୁ ଖସି ପଡୁଛି। ଭିଡିଓକୁ ଦେଖିଲେ ସ୍ପଷ୍ଟ ଜଣାପଡ଼ୁଛି ଯେ ପାଇଲଟ୍ ବିମାନ ଉପରୁ ନିୟନ୍ତ୍ରଣ ହରାଇ ଆବାସିକ ଅଞ୍ଚଳରେ ଖସି ପଡ଼ିଥିଲେ। ବିମାନଟି ଏହାର ଡାହାଣ ପଙ୍ଖା ଉପରେ ପଡ଼ିଥିଲା ଏବଂ ସଙ୍ଗେ ସଙ୍ଗେ ନିଆଁରେ ଜଳି ଯାଇଥିଲା।

ଏଏଫ୍ ପି ନ୍ୟୁଜ୍ ଏଜେନ୍ସି ରୁଷୀୟ ପ୍ରତିରକ୍ଷା ମନ୍ତ୍ରଣାଳୟକୁ ଉଦ୍ଧୃତ କରି କହିଛି, ମସ୍କୋ ସମୟ ପୂର୍ବାହ୍ନ ପ୍ରାୟ ୧୧ଟା ବେଳେ ବେଲଗୁରୁଦ ଅଞ୍ଚଳରେ ଏକ ନିୟମିତ ବିମାନ ଚଳାଚଳ ସମୟରେ ଆଇଏଲ୍-୭୬ ଦୁର୍ଘଟଣାଗ୍ରସ୍ତ ହୋଇଥିଲା।

ରିୟା-ନୋଭୋସ୍ତି ନ୍ୟୁଜ୍ ଏଜେନ୍ସି ପ୍ରତିରକ୍ଷା ମନ୍ତ୍ରଣାଳୟକୁ ଉଦ୍ଧୃତ କରି କହିଛି, ଏହି ବିମାନରେ ୬୫ ଜଣ ୟୁକ୍ରେନ୍ ସୈନ୍ୟ ଥିଲେ, ଯେଉଁମାନଙ୍କୁ ବିନିମୟ ପାଇଁ ବେଲଗୁରୁଦ ଅଞ୍ଚଳକୁ ନିଆଯାଉଥିଲା।