ମସ୍କୋ: ଏକ ଯାତ୍ରୀବାହୀ ଜେଟ୍ ବିମାନ ରୁଷିଆରେ ଦୁର୍ଘଟଣାର ଶିକାର ହୋଇଛି। ଶୁକ୍ରବାର ଦିନ ଘଟିଥିବା ଏହି ଘଟଣାଟି ବିମାନ ଉଡ଼ାଣ ବେଳେ ଘଟିଥିଲା। ଏହି ଦୁର୍ଘଟଣାରେ ୩ ଜଣ କ୍ରୁ ସଦସ୍ୟଙ୍କ ମୃତ୍ୟୁ ଖବର ରହିଛି। ଏହି ବିମାନରେ କୌଣସି ଯାତ୍ରୀ ନ ଥିଲେ। ରୁଷିଆର ଜରୁରୀକାଳୀନ ଅଧିକାରୀଙ୍କ ଅନୁଯାୟୀ ଏହି ବିମାନଟି ସୁଖୋଇ ସୁପରଜେଟ୍ ୧୦୦ ଥିଲା ଏବଂ ମସ୍କୋ ଅଞ୍ଚଳରେ ଏହି ଦୁର୍ଘଟଣା ଘଟିଥିଲା।

Advertisment

ଖବର ଅନୁଯାୟୀ, ଏହି ବିମାନଟି ଗାଜପ୍ରୋମ ଏଭିୟା ବିମାନର ଥିଲା। କୁହାଯାଉଛି ଏହି ବିମାନ ରୁଷିଆର ରାଜଧାନୀ ମସ୍କୋଠାରୁ ୧୧୦ କିଲୋମିଟର ଦୂରରେ ଥିବା ଲୁଖୋଭିଟସିରେ ଥିବା ବିମାନ ତିଆରି କାରଖାନାରୁ ଉଡ଼ାଣ କରିଥିଲା। ଏହି ବିମାନଟି ଏଠାରେ ମରାମତି କରାଯାଇଥିଲା। ଏଠାରୁ ଯିବା ପରେ ଏହା ମସ୍କୋର ଭ୍ନୁକିଭ ବିମାନବନ୍ଦରକୁ ଯାଇଥାନ୍ତା। କିନ୍ତୁ ଏକ ଦୁର୍ଘଟଣାର ସମ୍ମୁଖୀନ ହୋଇଥିଲା।

ଏପର୍ଯ୍ୟନ୍ତ ମିଳିଥିବା ସୂଚନା ଅନୁଯାୟୀ, ଏହି ଦୁର୍ଘଟଣା କୋଲୋମନା ସହର ନିକଟ ଜଙ୍ଗଲ ଅଞ୍ଚଳରେ ଘଟିଛି। ବିମାନ ଦୁର୍ଘଟଣାର କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ। ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମରାମତି ପରେ ବିମାନର ପରୀକ୍ଷା ଫ୍ଲାଇଟ୍ କରାଯାଇଥିଲା। କିନ୍ତୁ ଏହି ପରୀକ୍ଷଣ ବିମାନ ବିଫଳ ହୋଇଥିଲା ଯେଉଁଥିରେ ୩ ଜଣଙ୍କର ମୃତ୍ୟୁ ହୋଇଥିଲା। ଏହି ଘଟଣାର ତଦନ୍ତ ଆରମ୍ଭ ହୋଇଛି। ରୁଷିଆର ସର୍ବବୃହତ ଅପରାଧିକ ଅନୁସନ୍ଧାନକାରୀ ସଂସ୍ଥା 'ଅନୁସନ୍ଧାନ କମିଟି' ଏହି ଘଟଣାର ତଦନ୍ତ ଆରମ୍ଭ କରିଛି।

ମେ’ ୨୦୧୯ରେ ଏକ ସୁଖୋଇ ସୁପରଜେଟ୍ ମଧ୍ୟ ଦୁର୍ଘଟଣାଗ୍ରସ୍ତ ହୋଇଥିଲା । ଏହି ଘଟଣାରେ ୪୧ ଜଣ ପ୍ରାଣ ହରାଇଥିଲେ। ଏହି ଘଟଣାର ଅନୁସନ୍ଧାନରେ ପାଇଲଟ୍‌ଙ୍କ ଭୁଲ ସାମ୍ନାକୁ ଆସିଥିଲା। ସେ ଉଚ୍ଚ ବେଗରେ ଇନ୍ଧନ ଭର୍ତ୍ତି ବିମାନକୁ ଅବତରଣ କରିବାକୁ ଚେଷ୍ଟା କରିଥିଲେ ।