ଡିସେମ୍ବର ୬ ତାରିଖ ଦିନ ଭାରତ ଆସି ପାରନ୍ତି ରୁଷ୍ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍
ନୂଆଦିଲ୍ଲୀ: ଡିସେମ୍ବର ୬ରେ ଭାରତ ଓ ରୁଷ୍ ମଧ୍ୟରେ ହେବାକୁ ଥିବା ବାର୍ଷିକ ଶିଖର ବୈଠକରେ ଯୋଗ ଦେବାକୁ ରୁଷୀୟ ରାଷ୍ଟ୍ରପତି ଭ୍ଲାଦିମିର୍ ପୁଟିନ୍ ଡିସେମ୍ବର ପ୍ରଥମ ସପ୍ତାହରେ ଭାରତ ଗସ୍ତରେ ଆସିବାର ଯଥେଷ୍ଟ ସମ୍ଭାବନା ରହିଛି।
ଏହି ଦିନିକିଆ ଗସ୍ତରେ ରୁଷୀୟ ରାଷ୍ଟ୍ରପତି ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହ ଆଳାପ ଆଲୋଚନା କରିବେ। ଦୁଇ ଦେଶ ମଧ୍ୟରେ କେତେଗୁଡ଼ିଏ ରାଜିନାମା ସ୍ବାକ୍ଷର କରାଯିବାର ଅଛି। ଚଳିତ ବର୍ଷ ଶେଷ ସୁଦ୍ଧା ‘ଏସ୍-୪୦୦ ଏୟାର୍ ଡିଫେନ୍ସ୍ ସିଷ୍ଟମ୍’ର ପ୍ରଥମ ଛେକ ଭାରତରେ ପହଞ୍ଚୁଥିବା ବେଳେ ରୁଷ୍ ରାଷ୍ଟ୍ରପତିଙ୍କ ଭାରତ ଗସ୍ତ ଗୁରୁତ୍ବପୂର୍ଣ୍ଣ ମନେହୁଏ।
୨୦୧୮ ବାର୍ଷିକ ଶିଖର ବୈଠକରେ ଯୋଗ ଦେବା ଲାଗି ପୁଟିନ୍ ଶେଷ ଥର ପାଇଁ ଭାରତ ଗସ୍ତରେ ଆସିଥିଲେ। ତାଙ୍କରି ଗସ୍ତ କାଳରେ ହିଁ ଭାରତ ଓ ରୁଷ୍ ମଧ୍ୟରେ ‘ଏସ୍-୪୦୦’ ମିସାଇଲ୍ ସିଷ୍ଟମ୍ ରାଜିନାମା ସ୍ବାକ୍ଷରିତ ହୋଇଥିଲା।
ଯଦି ରାଷ୍ଟ୍ରପତି ପୁଟିନ୍ ଭାରତ ଗସ୍ତରେ ଆସନ୍ତି, ଏହା ହେବ ଚଳିତ ବର୍ଷ ତାଙ୍କର ଦ୍ବିତୀୟ ବିଦେଶ ଗସ୍ତ। ପ୍ରଥମ ବିଦେଶ ଗସ୍ତରେ ସେ ଜିନିଭାରେ ଆୟୋଜିତ ଯୁକ୍ତରାଷ୍ଟ୍ର ଆମେରିକାର ରାଷ୍ଟ୍ରପତି ଜୋ ବାଇଡେନ୍ଙ୍କ ସହ ଶିଖର-ସ୍ତରୀୟ ବୈଠକରେ ଯୋଗ ଦେଇଥିଲେ। କିନ୍ତୁ, କୋଭିଡ୍-୧୯ ସଙ୍କଟ ସମୟରେ ଇଟାଲିରେ ଆୟୋଜିତ ‘ଜି୨୦’ ଶିଖର ବୈଠକରେ ସେ ସ୍ବଦେଶରେ ଥାଇ ଭର୍ଚ୍ୟୁଆଲ୍ ମାଧ୍ୟମରେ ଯୋଗ ଦେଇଥିଲେ।
