ୟୁକ୍ରେନ ସଂକଟର ସମାଧାନ ଆଶା : ବାରାକକୁ ଫେରିବା ଆରମ୍ଭ କଲେ ଋଷୀୟ ସେନା
ମସ୍କୋ : ୟୁକ୍ରେନକୁ ଯୁଦ୍ଧ ଆଶଙ୍କା ମଧ୍ୟରେ ଏକ ଆଶାଜନକ ଖବର ମିଳିଛି । ୟୁକ୍ରେନ ସୀମାରେ ମୁତୟନ ହୋଇଥିବା କିଛି ଋଷୀୟ ସୈନ୍ୟ ନିଜ ନିଜ ବାରାକକୁ ଫେରିବା ଆରମ୍ଭ କରିଛନ୍ତି । ଏ ନେଇ ଖୋଦ ଋଷିଆର ପ୍ରତିରକ୍ଷା ମନ୍ତ୍ରାଳୟ ଘୋଷଣା କରିଛି ।
Sambad is now on WhatsApp
Join and get latest news updates delivered to you via WhatsApp
ଋଷୀୟ ପ୍ରତିରକ୍ଷା ମନ୍ତ୍ରାଳୟକୁ ଉଦ୍ଧାର କରି ସମ୍ବାଦ ସରବରାହ ସଂସ୍ଥା ଇଣ୍ଟରଫାକ୍ସ କହିଛି ଯେ, ୟୁକ୍ରେନ ସୀମାକୁ ଲାଗିଥିବା ଋଷୀୟ ମିଲିଟାରୀ ଡିଷ୍ଟ୍ରିକ୍ଟର ସୈନ୍ୟମାନେ ନିଜ ନିଜ ବାରାକକୁ ଫେରିଛନ୍ତି । ସେମାନେ ନିଜର ସମରାଭ୍ୟାସ ଶେଷ କରି ଫେରୁଥିବା କୁହାଯାଉଛି । ତେବେ ୟୁକ୍ରେନ ସୀମାରେ ଏବେ ବି ୧ ଲକ୍ଷରୁ ଅଧିକ ଋଷ ସୈନ୍ୟ ଅଛନ୍ତି ।
ଋଷିଆର ଏହି ଘୋଷଣା ପରେ ପୂର୍ବ ୟୁରୋପରେ ହେବାକୁ ଥିବା ସମ୍ଭାବ୍ୟ ଯୁଦ୍ଧ ପରିସ୍ଥିତି ଏଡ଼ାଇବାକୁ ଚାଲିଥିବା କୂଟନୈତିକ ଉଦ୍ୟମ ସଫଳ ହେଉଥିବା କୁହାଯାଉଛି । ଜର୍ମାନ ଚ୍ୟାନସେଲର ଓଲାଫ ସ୍କୋଲଜ୍ ଆଜି ମସ୍କୋରେ ପହଞ୍ଚିଛନ୍ତି । ଯୁଦ୍ଧ ଏଡ଼େଇବାକୁ ସେ ପୁଟିନଙ୍କୁ ସାକ୍ଷାତ କରି ପ୍ରବର୍ତ୍ତାଇବାର ସମ୍ଭାବନା ରହିଛି ।
ସେ କହିଛନ୍ତି ଯେ ଋଷିଆର ସୁରକ୍ଷା ଚିନ୍ତାଗୁଡ଼ିକ ସମ୍ପର୍କରେ ଆଲୋଚନା ପାଇଁ ପାଶ୍ଚାତ୍ୟ ଦେଶମାନେ ରାଜି ଅଛନ୍ତି । କିନ୍ତୁ ଏହା ସତ୍ତ୍ବେ ଯଦି ଋଷିଆ ୟୁକ୍ରେନ ଉପରେ ଆକ୍ରମଣ କରେ ତେବେ ମସ୍କୋ ଉପରେ କଠୋର ଆର୍ଥିକ କଟକଣା ଲଗାଯିବ । ପୂର୍ବରୁ ଆମେରିକାର ରାଷ୍ଟ୍ରପତି ଜୋ ବାଇଡେନ ବି ଋଷିଆକୁ କଟକଣା ଧମକ ଦେଇସାରିଛନ୍ତି ।