କର୍ଣ୍ଣାଟକ ଗୁମ୍ଫାରୁ ୨ ଝିଅଙ୍କ ସହ ରୁଷୀୟ ମହିଳା ଉଦ୍ଧାର

ନୂଆଦିଲ୍ଲୀ: କର୍ଣ୍ଣାଟକର ଗୋକର୍ନରେ ରାମତୀର୍ଥ ପର୍ବତ ଉପରେ ଏକ ନିର୍ଜନ ତଥା ବିପଜ୍ଜନକ ଗୁମ୍ଫାରୁ ପୁଲିସ ଜଣେ ରୁଷୀୟ ମହିଳା ଏବଂ ତାଙ୍କର  ୨ ଝିଅଙ୍କୁ ପାଇଛି।  ଜୁଲାଇ ୯ ତାରିଖ ସନ୍ଧ୍ୟା ୫ଟାରେ  ପାଟ୍ରୋଲ ସମୟରେ ଗୋକର୍ନ ପୁଲିସ ଘଞ୍ଚ ଜଙ୍ଗଲ ମଧ୍ୟରୁ ଏକ ଅସ୍ଥାୟୀ ଆବାସସ୍ଥଳରୁ ୩ ଜଣଙ୍କୁ ଠାବ କରିଥିଲା।  ପର୍ଯ୍ୟଟକମାନଙ୍କର ସୁରକ୍ଷା ସୁନିଶ୍ଚିତ କରିବାପାଇଁ ଗୋକର୍ନ ପୁଲିସ ଷ୍ଟେସନ୍‌ର ଇନ୍ସପେକ୍ଟର ଶ୍ରୀଧର ଏସ୍‌ଆର ଏବଂ ତାଙ୍କ ଟିମ୍‌ ରାମତୀର୍ଥ ପର୍ବତ ଅଞ୍ଚଳରେ ପାଟ୍ରୋଲିଂ କରୁଥିବା ବେଳେ ସେମାନେ ଏକ ଗୁମ୍ଫା ନିକଟରେ ଲୋକଙ୍କ ଯାତାୟତ ଜାଣିପାରିଥିଲେ।  ଏହାପରେ ତଲାସୀ କରିବାପରେ ପୁଲିସ ଟିମ୍‌ ଜଣେ ରୁଷୀୟ ମହିଳା ନିନା କୁଟିନା (୪୦) ଏବଂ ତାଙ୍କ ୨ ଝିଅ ପ୍ରେମା (୬ ବର୍ଷ ) ଏବଂ ଆମା ( ୪ ବର୍ଷ)ଙ୍କୁ ପାଇଥିଲେ। 

ଗୁମ୍ଫାରେ କାହିଁକି ରହୁଛନ୍ତି ପ୍ରଶ୍ନ କରିବାରୁ ନିନା ଦାବି କରିଥିଲେ ଯେ ସେ ଏକାନ୍ତରେ ଧ୍ୟାନ କରିବାପାଇଁ ଗୋଆରୁ ଗୋକର୍ନ ଆସିଛନ୍ତି।  ସହରାଞ୍ଚଳର କୋଳାହଳ ଠାରୁ ଦୂରରେ ରହି ସେ ଗୁମ୍ଫାରେ ଧ୍ୟାନ ଓ ପ୍ରାର୍ଥନା କରିବାପାଇଁ ପସନ୍ଦ କରିଥିବା କହିଛନ୍ତି।  ତେବେ ଉକ୍ତ ରୁଷୀୟ ମହିଳାଙ୍କ ଉଦ୍ଦେଶ୍ୟ ଆଧ୍ୟାତ୍ମିକ ହୋଇଥିଲେ ସୁଦ୍ଧା‌ ମହିଳା ଜଣଙ୍କ ନିଜ ପିଲାମାନଙ୍କୁ ନେଇ ଉକ୍ତ ସ୍ଥାନରେ ରହିବା ଅତି ବିପଜ୍ଜନକ। ପୁଲିସ ଏଥିପାଇଁ ଚିନ୍ତା ପ୍ରକଟ କରିବା ସହ ମହିଳାଙ୍କୁ ଗୁମ୍ଫା ଛାଡ଼ିବାପାଇଁ ବୁଝାଇବାରେ ସକ୍ଷମ ହୋଇଥିଲା ଏବଂ ତାଙ୍କୁ ପାହାଡ଼ ତଳକୁ ଆଣିଥିଲା। ମହିଳାଙ୍କ ଅନୁରୋଧକ୍ରମେ ତାଙ୍କୁ କୁମତା ତଲୁକର ବାଙ୍କିକୋଡ଼ଲା ଗ୍ରାମରେ ଜଣେ ୮୦ ବର୍ଷୀୟା ମହିଳା ସା‌ଧୁ  ଯୋଗରତ୍ନ ସରସ୍ବତୀଙ୍କ ଦ୍ବାରା ପରିଚାଳିତ ଏକ ଆଶ୍ରମରେ ରଖାଯାଇଥିଲା।  ପୁଲିସ ଟିମ୍‌ ଉକ୍ତ ଘଟଣାରେ ଅଧିକ ତଦନ୍ତ ଜାରି ରଖିଛି।  ତେବେ ନିନା ତାଙ୍କ ପାସପୋର୍ଟ ଏବଂ ଭିସା ସଂକ୍ରାନ୍ତରେ କିଛି କହିବାପାଇଁ  ଆଗ୍ରହପ୍ରକାଶ କରିନାହାନ୍ତି।  ସେସବୁକୁ ସେ ଘଞ୍ଚ ଜଙ୍ଗଲରେ ଛାଡ଼ି ଆସିଥିବା କହିଥିଲେ। ପରେ ଗୋକର୍ନ ପୁଲିସ  ଏବଂ ଜଙ୍ଗଲ ଅଧିକାରୀଙ୍କ ମିଳିତ ତଦନ୍ତ ପରେ ଜଣାପଡ଼ିଲା  ଯେ ନିନା ଭିସା ନିୟମ ଉଲ୍ଳଂଘନ କରିଛନ୍ତି।  ଭିସା ଉଲ୍ଲଂଘନ ପାଇଁ ଉକ୍ତ ମହିଳା ଏବଂ ତାଙ୍କ ୨ ଝିଅଙ୍କୁ ମହିଳା ଏବଂ ଶିଶୁ ବିକାଶ ବିଭାଗ ଦ୍ବାରା  ପରିଚାଳିତ ଏକ ମହିଳା ‌ରିସେପସନ୍‌ ସେଣ୍ଟର୍‌ର ସୁରକ୍ଷାମୂଳକ ହେପାଜତରେ ରଖାଯାଇଛି। ଉକ୍ତ ପରିବାରକୁ ଖୁବ୍‌ଶୀଘ୍ର ରୁଷ୍‌ ପଠାଇବାପାଇଁ ପ୍ରକ୍ରିୟା ଆରମ୍ଭ ହୋଇଛି।  ତାଙ୍କୁ ଖୁବ୍‌ଶୀଘ୍ର ବେଙ୍ଗାଲୁରୁର ଏଫ୍‌ଆର୍‌ଆର୍‌ଓ କର୍ତ୍ତୃପକ୍ଷଙ୍କ ନିକଟରେ ହାଜର କରାଯିବ।