କେନ୍ଦ୍ର ପ୍ରତିରକ୍ଷା ମନ୍ତ୍ରାଳୟର ଅନୁମୋଦନ: ଢେଙ୍କାନାଳରେ ପ୍ରତିଷ୍ଠା ହେବ ସୈନିକ ସ୍କୁଲ
ନୂଆଦିଲ୍ଲୀ : ଆସନ୍ତା ଶିକ୍ଷା ବର୍ଷରେ ଢେଙ୍କାନାଳରେ ସୈନିକ ସ୍କୁଲ ପ୍ରତିଷ୍ଠା ହେବ । ଏଥି ପାଇଁ ପ୍ରତିରକ୍ଷା ମନ୍ତ୍ରାଳୟ ଅନୁମୋଦନ ପ୍ରଦାନ କରିଛନ୍ତି। ଓଡ଼ିଶାର ଢେଙ୍କାନାଳ ସହ ଦେଶର ୨୧ ଟି ରାଜ୍ୟରେ ୨୧ ଟି ନୂଆ ସୈନିକ ସ୍କୁଲ ମଧ୍ୟ ଆସନ୍ତା ଶିକ୍ଷା ବର୍ଷରୁ କାର୍ଯ୍ୟ ଆରମ୍ଭ କରିବ। ଏହି ସବୁ ସୈନିକ ସ୍କୁଲ ବିଭିନ୍ନ ଏନ୍ଜିଓ, ଘରୋଇ ଓ ସରକାରୀ ସ୍କୁଲ ସହଭାଗିତାରେ ପ୍ରତିଷ୍ଠା ହେବ।
Sambad is now on WhatsApp
Join and get latest news updates delivered to you via WhatsApp
ପ୍ରତିରକ୍ଷା ମନ୍ତ୍ରାଳୟର ସୂଚନା ଅନୁସାରେ ଢେଙ୍କାନାଳରେ ପ୍ରସ୍ତାବିତ ନୂଆ ସୈନିକ ସ୍କୁଲ ‘ସଂସ୍କାର ପବ୍ଲିକ ସ୍କୁଲ’ (ଅବକାଶ ଫାଉଣ୍ଡେସନ) ନାମରେ ଚାଲିବ। ଦେଶର ପୁରୁଣା ସୈନିକ ସ୍କୁଲମାନଙ୍କ ଠାରୁ ନୂଆ ସୈନିକ ସ୍କୁଲ ଭିନ୍ନ ହେବେ। ଏହା ମାଧ୍ୟମରେ ବିଦ୍ୟାର୍ଥୀମାନଙ୍କୁ ନୂତନ ଶିକ୍ଷା ନୀତି ଆଧାରରେ ଗୁଣାତ୍ମକ ଶିକ୍ଷା ପ୍ରଦାନ ସହ ଉତ୍ତମ କ୍ୟାରିୟର ସୁଯୋଗ ଓ ସେନାବାହିନୀ ପାଇଁ ଆବଶ୍ୟକ ହେଉଥିବା ଜ୍ଞାନ ଓ ପ୍ରଶିକ୍ଷଣ ପ୍ରଦାନ କରାଯିବ। ସୈନିକ ସ୍କୁଲ ସୋସାଇଟି ତତ୍ତ୍ବାବଧାନରେ ଏହି ସବୁ ସ୍କୁଲ ଚାଲିବ। ଦେଶରେ ଶହେଟି ନୂଆ ସୈନିକ ସ୍କୁଲ ଖୋଲିବା ପାଇଁ କେନ୍ଦ୍ର ସରକାରଙ୍କ ଯୋଜନା ଥିବାବେଳେ ବର୍ତ୍ତମାନ ୨୧ ଟି ଖୋଲିବାକୁ ଅନୁମୋଦନ ମିଳିଛି।