ନକଲି ଗାନ୍ଧୀଙ୍କ ପାଇଁ ଅସଲି ଗାନ୍ଧୀ ଲଜ୍ଜିତ ଅନୁଭବ କରିବେ: ବିଜେପି ମୁଖପାତ୍ର ସମ୍ବିତ ପାତ୍ର

ନୂଆଦିଲ୍ଲୀ: ‘ନ୍ୟାସ୍‌ନାଲ୍‌ ହେରାଲ୍‌ଡ୍‌’ ଖବରକାଗଜ ସହିତ ସଂଶ୍ଳିଷ୍ଟ ଥିବା ‘ମନି ଲଣ୍ଡରିଙ୍ଗ୍‌’ ମାମଲାରେ ଜେରା ପାଇଁ ସ‌ୋମବାର ଦିନ ସାଂସଦ ରାହୁଲ୍‌ ଗାନ୍ଧୀ ପ୍ରବର୍ତ୍ତନ ନିର୍ଦେଶାଳୟରେ ହାଜର ହେବା ବେଳେ ବ୍ୟାପକ ପ୍ରତିବାଦ ପ୍ରଦର୍ଶନ ନିମନ୍ତେ କଂଗ୍ରେସ କର୍ମୀମାନେ ଯୋଜନା କରୁଛନ୍ତି। କଂଗ୍ରେସ ନେତା ମଣିକମ୍‌ ଠାକୁର କହିଛନ୍ତି ଯେ, କେନ୍ଦ୍ର ସରକାର କେନ୍ଦ୍ରୀୟ ତଦନ୍ତକାରୀ ଏଜେନ୍‌ସିମାନଙ୍କର ଦୂରୁପଯୋଗ କରୁଛି ବୋଲି ଦର୍ଶାଇ ସମଗ୍ର ଦେଶରେ ଥିବା ପ୍ରବର୍ତ୍ତନ ନିର୍ଦେଶାଳୟ ପ୍ରାୟ ୨୫ଟି କାର୍ଯ୍ୟାଳୟରେ କଂଗ୍ରେସ ପାର୍ଟିର କର୍ମୀମାନେ ପ୍ରତିବାଦ ପ୍ରଦର୍ଶନ କରିବେ। ତେବେ ଏହାକୁ ନେଇ ବିଜେପି କହିଛି ଯେ ଉଭୟ ରାହୁଲ ଗାନ୍ଧୀ ଏବଂ ସୋନିଆ ଗାନ୍ଧୀ ଜାମିନରେ ଆସିଛନ୍ତି | ଆସନ୍ତାକାଲି ରାହୁଲ ଗାନ୍ଧୀଙ୍କୁ ଇଡି ଆଗରେ ହାଜର ହେବାକୁ ପଡିବ ଏବଂ ଏହା ପୂର୍ବରୁ କଂଗ୍ରେସ ନାଟକ କରୁଛି।

ସେମାନେ ସେମାନଙ୍କର ସମସ୍ତ ନେତାଙ୍କୁ ଦିଲ୍ଲୀ ଡାକୁଛନ୍ତି। ଏହି ନାଟକ କରିବା ଅର୍ଥ କ’ଣ? ବିଜେପି ଜାତୀୟ ମୁଖପାତ୍ର ସମ୍ବିତ ପାତ୍ର କହିଛନ୍ତି ଇଡି ସାମ୍ନାରେ ନିଜକୁ ଠିକ୍ ବୋଲି ପ୍ରମାଣ କର | କଂଗ୍ରେସ ପକ୍ଷରୁ ଏହାକୁ ସତ୍ୟାଗ୍ରହ ଆଖ୍ୟା ଦିଆଯାଇଥିବାବେଳେ ସମ୍ବିତ କହିଛନ୍ତି ଯେ ଏହି ନକଲି ଗାନ୍ଧୀମାନଙ୍କ ଦ୍ୱାରା ନକଲି ସତ୍ୟାଗ୍ରହ ଦେଖି ଗାନ୍ଧିଜୀ ମଧ୍ୟ ଲଜ୍ଜିତ ଅନୁଭବ କରିବେ |

ରାହୁଲ ଗାନ୍ଧୀ ଆଇନ ଉଲ୍ଲଂଘନ କରିବା ଉଚିତ ନୁହେଁ କାରଣ ଏହା ରାଜନୀତିର ବିଷୟ ନୁହେଁ। ସୂଚନା ଥାଉ କି ଯେ ରାହୁଲ ଗାନ୍ଧୀଙ୍କୁ ଜୁନ୍ ୨ରେ ପଚରାଉଚରା ପାଇଁ ଡକାଯାଇଥିଲା କିନ୍ତୁ ସେହି ସମୟରେ ସେ ଦେଶ ବାହାରେ ଥିବାରୁ ଆଉ ଏକ ତାରିଖ ଦାବି କରିଥିଲେ। ଅନ୍ୟପକ୍ଷରେ ସୋନିଆ ଗାନ୍ଧୀଙ୍କୁ ୮ ଜୁନରେ ଡକାଯାଇଥିଲା। କିନ୍ତୁ କରୋନା ହେତୁ ତାଙ୍କର ତାରିଖ ମଧ୍ୟ ଜୁନ ୨୩କୁ ବୃଦ୍ଧି କରାଯାଇଛି | ମିଳିଥିବା ସୂଚନା ଅନୁଯାୟୀ ବର୍ତ୍ତମାନ ତାଙ୍କ ସ୍ୱାସ୍ଥ୍ୟ ଅବସ୍ଥା ଭଲ ଅଛି ଏବଂ ତାଙ୍କୁ ଶୀଘ୍ର ଡାକ୍ତରଖାନାରୁ ଡିସଚାର୍ଜ କରାଯିବ ।

ସମ୍ବନ୍ଧିତ ଖବର