ଛାତ୍ରୀଙ୍କୁ ଯୌନ ନିର୍ଯାତନା ଦେଇ ଗିରଫ ହେଲେ କଣ୍ଠଶିଳ୍ପୀ

ମୁମ୍ବାଇ: ଗତ ବୁଧବାର ମୁମ୍ବାଇରୁ କଣ୍ଠଶିଳ୍ପୀ ସଞ୍ଜୟ ଚକ୍ରବର୍ତ୍ତୀଙ୍କୁ କୋଲକାତା ପୁଲିସ ଗିରଫ କରିଛି। ଗିରଫ ହୋଇଥିବା କଣ୍ଠଶିଳ୍ପୀଙ୍କ ବିରୋଧରେ ଜଣେ ନାବାଳିକା ଛାତ୍ରୀଙ୍କୁ ‌ଯୌନ ନିର୍ଯାତନା ଦେଇଥିବା ଘଟଣା ସାମ୍ନାକୁ ଆସିଛି।

କୋଲକାତା ପୁଲିସ ସୂତ୍ରରୁ ପ୍ରକାଶ, କଣ୍ଠଶିଳ୍ପୀଙ୍କୁ ଗିରଫ କରି ନିମ୍ନ ଅଦାଲତରେ ହାଜର କରାଯାଇଛି। ଅଦାଲତ ତାଙ୍କୁ  ନଭେମ୍ବର ୧୮ ତାରିଖ ପର୍ଯ୍ୟନ୍ତ ପୁଲିସ ହେପାଜତକୁ ପଠାଇ ଦେଇଛି। ତାଙ୍କ ବିରୋଧରେ ପୋ‌କ୍ସୋ ଆକ୍ଟ ଆଧାରରେ  ମାମଲା ରୁଜୁ କରାଯାଇଛି। 

ସଞ୍ଜୟ ଚକ୍ରବର୍ତ୍ତୀ ଲୋକପ୍ରିୟ କଣ୍ଠଶିଳ୍ପୀ ପଣ୍ଡିତ ଅଜୟ ଚକ୍ରବର୍ତ୍ତୀଙ୍କ ଛୋଟ ଭାଇ। କିଛିଦିନ ପୂର୍ବରୁ ସଞ୍ଜୟ ଚକ୍ରବର୍ତ୍ତୀଙ୍କ କୋଲକାତାସ୍ଥିତ ସଙ୍ଗୀତ ଶିକ୍ଷା କେନ୍ଦ୍ରର ଜଣେ ଛାତ୍ରୀ କଣ୍ଠଶିଳ୍ପୀଙ୍କ ବିରୋଧରେ ଅଭିଯୋଗ ଆଣି କହିଥିଲେ, ‘ସଙ୍ଗୀତ ଶିକ୍ଷା କେନ୍ଦ୍ରରେ ସଞ୍ଜୟ ଚକ୍ରବର୍ତ୍ତୀ ଦ୍ବାରା ସେ ‌ଯୌନ ନିର୍ଯାତନାର ଶିକାର ହୋଇଛନ୍ତି।’

ଛାତ୍ରୀଙ୍କ ସଙ୍ଗୀନ ଅଭିଯୋଗ ପରେ କଣ୍ଠଶିଳ୍ପୀ ସଞ୍ଜୟ ଚକ୍ରବର୍ତ୍ତୀ କୋଲକାତା ଛାଡ଼ି ମୁମ୍ବାଇ ଚାଲି ଯାଇଥଲେ। ମୁମ୍ବାଇରେ ସେ ତାଙ୍କର ଜଣେ ସାଙ୍ଗ ଘରେ ଲୁଚି ରହିଥିଲେ। ମୁମ୍ବାଇ ପୁଲିସ ଅଧିକାରୀଙ୍କ ସହଯୋଗ କ୍ରମେ କୋଲକାତା ପୁଲିସ ସଞ୍ଜୟ ଚକ୍ରବର୍ତ୍ତୀଙ୍କୁ ତାଙ୍କ ସାଙ୍ଗଙ୍କ ଘରୁ ଗିରଫ କରିବାରେ ସଫଳ ହୋଇଥିଲା।