ଓଡ଼ିଶା ହାଇକୋର୍ଟର ନୂଆ ବିଚାରପତି ସଂଜୟ କୁମାର ମିଶ୍ର
ନୂଆଦିଲ୍ଲୀ/କଟକ : ଓଡ଼ିଶା ହାଇକୋର୍ଟର ନୂଆ ବିଚାରପତି ଭାବେ ସଂଜୟ କୁମାର ମିଶ୍ରଙ୍କୁ ନିଯୁକ୍ତି ମିଳିଛି। ୨୦୨୨, ଜାନୁଆରି ୨୯ରେ ଓଡ଼ିଶା ହାଇକୋର୍ଟର ବିଚାରପତି ଭାବେ ନିଯୁକ୍ତି ପାଇଁ ଶ୍ରୀ ମିଶ୍ରଙ୍କ ନାଁ ସୁପ୍ରିମକୋର୍ଟ କଲେଜିୟମ୍ ସୁପାରିସ କରିଥିବା ବେଳେ ଆଜି ତାଙ୍କ ନିଯୁକ୍ତି ନେଇ କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଶ୍ରୀ ମିଶ୍ରଙ୍କୁ ଓଡ଼ିଶା ହାଇକୋର୍ଟର ବିଚାରପତି ଭାବେ ରାଷ୍ଟ୍ରପତି ନିଯୁକ୍ତି ପ୍ରଦାନ କରିଥିବା ନେଇ ବିଜ୍ଞପ୍ତିରେ ଉଲ୍ଲେଖ କରାଯାଇଛି। ସେ ଖୁବ୍ଶୀଘ୍ର ଓଡ଼ିଶା ହାଇକୋର୍ଟର ବିଚାରପତି ଭାବେ ଶପଥ ଗ୍ରହଣ କରିବେ ବୋଲି ସୂଚନା ମିଳିଛି।
Sambad is now on WhatsApp
Join and get latest news updates delivered to you via WhatsApp
ଏଠାରେ ଉଲ୍ଲେଖଯୋଗ୍ୟ ଯେ, ୧୯୬୭, ନଭେମ୍ବର ୧୪ରେ ଶ୍ରୀ ମିଶ୍ର ବୁର୍ଲାରେ ଜନ୍ମ ଗ୍ରହଣ କରିଥିଲେ। ଢେଙ୍କାନାଳ ଜିଲ୍ଲା ମୁକ୍ତାଦେଇପୁର ତାଙ୍କ ମୂଳ ଘର। ଇଂଜିନିୟର ବିଭୂତି ଭୂଷଣ ମିଶ୍ର ଓ ବନଲତା ମିଶ୍ରଙ୍କ ସେ ପୁତ୍ର। ସ୍ବାସ୍ଥ୍ୟ ବିଭାଗର ପୂର୍ବତନ ଯୁଗ୍ମସଚିବ ତଥା ବିଶିଷ୍ଟ ଲେଖକ ପ୍ରଫେସର ଡାକ୍ତର ବିଜୟ କୁମାର ନନ୍ଦ ଓ ସାହିତ୍ୟିକା ଡକ୍ଟର ସୌଦାମିନୀ ନନ୍ଦ ତାଙ୍କ ମାମୁଁ ଓ ମାଇଁ। ୧୯୮୩ରେ ତାଳଚେର ଥର୍ମାଲ ହାଇସ୍କୁଲରୁ ସେ ମାଟ୍ରିକ୍ ପାସ୍ କରିଥିଲେ। ଅନୁଗୁଳ ସରକାରୀ କଲେଜରୁ ବି.କମ୍ ପାସ୍ କରିବା ସହିତ ୧୯୯୦ରେ ମଧୁସୂଦନ ଆଇନ କଲେଜରୁ ଏଲ୍.ଏଲ୍.ବି. ଡିଗ୍ରି ହାସିଲ କରିଥିଲେ। ୧୯୯୦, ନଭେମ୍ବର ୧୮ରେ ସେ ଓଡ଼ିଶା ରାଜ୍ୟ ଆଇନଜୀବୀ ପରିଷଦରେ ଆଇନଜୀବୀ ଭାବେ ପଞ୍ଜିକୃତ ହୋଇଥିଲେ। ବରିଷ୍ଠ ଆଇନଜୀବୀ ଶଶିଭୂଷଣ ନନ୍ଦଙ୍କ ସହଯୋଗୀ ଭାବେ ସେ ହାଇକୋର୍ଟରେ ଓକିଲାତି ଆରମ୍ଭ କରିଥିଲେ। ସାମ୍ବିଧାନିକ, ଶ୍ରମ, ଶିଳ୍ପ, ଚାକିରି ଆଦି ମାମଲା ପରିଚାଳନାରେ ତାଙ୍କର ବିଶେଷ ଦକ୍ଷତା ରହିଥିଲା। ସେ ହାଇକୋର୍ଟରେ ବହୁ ଗୁରୁତ୍ବପୂର୍ଣ୍ଣ ମାମଲା ପରିଚାଳନା କରି ସୁନାମ ଅର୍ଜନ କରିଛନ୍ତି।