ମହାରାଷ୍ଟ୍ରରେ ସରକାର ଗଠନ ନେଇ ଅଚଳାବସ୍ଥା ଜାରି, ରାଜ୍ୟପାଳଙ୍କୁ ଭେଟିଲେ ଶିବସେନା ନେତା ସଂଜୟ ରାଉତ
ମୁମ୍ବାଇ : ମହାରାଷ୍ଟ୍ରରେ ନିର୍ବାଚନ ଫଳାଫଳ ପ୍ରକାଶ ପାଇବାର ୧୦ ଦିନ ବିତିଯାଇଥିଲେ ମଧ୍ୟ ସରକାର ଗଠନକୁ ନେଇ ଏବେ ବି ଅନିଶ୍ଚିତତା ଜାରି ରହିଛି । ବିଜେପି ସରକାର ଗଠନ ଲାଗି ଆଶାବାଦୀ ଥିବାବେଳେ ଆଜି ଅପରାହ୍ଣ ୫ଟା ବେଳେ ଶିବସେନା ନେତା ସଂଜୟ ରାଉତ ଓ ରାମଦାସ କଦମ ମହାରାଷ୍ଟ୍ର ରାଜ୍ୟପାଳ ଭଗତ ସିଂ କୋସ୍ୟାରୀଙ୍କୁ ଭେଟିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ସାକ୍ଷାତ ସୌଜନ୍ୟମୂଳକ ଥିଲେ ମଧ୍ୟ ମହାରାଷ୍ଟ୍ରରେ ସରକାର ଗଠନ ନେଇ ଚାଲିଥିବା ଅଚଳାବସ୍ଥା ସଂପର୍କରେ ଆଲୋଚନା ହୋଇଥିଲା ବୋଲି ରାଉତ ସାମ୍ବାଦିକମାନଙ୍କୁ କହିଛନ୍ତି । ସେ କହିଛନ୍ତି ଯେ ରାଜ୍ୟରେ ଯେଉଁ ଦଳ ପାଖରେ ସଂଖ୍ୟା ଗରିଷ୍ଠତା ରହିଛି ସେ ସରକାର ଗଠନ କରିବାରେ କୌଣସି ଅସୁବିଧା ନାହିଁ । ଶିବସେନା କୌଣସି ଦଳର ସରକାର ଗଠନରେ ପ୍ରତିବନ୍ଧକ ସୃଷ୍ଟି କରୁନାହିଁ । ଶିବସେନା ଚାହୁଁଛି ଯଥାଶୀଘ୍ର ସରକାର ଗଠନ ହେଉ । ରାଜ୍ୟପାଳ ଓ ରାଜଭବନ ଏକ ସାମ୍ବିଧାନିକ ଓ ଅଣରାଜନୈତିକ ପଦ । ରାଜ୍ୟପାଳ ସରକାର ଗଠନ ପାଇଁ ଆବଶ୍ୟକ ନିଷ୍ପତ୍ତି ନେବେ ବୋଲି ସେ କହିଛନ୍ତି ।
ଏହା ପୂର୍ବରୁ ଆଜି ମହାରାଷ୍ଟ୍ର ମୁଖ୍ୟମନ୍ତ୍ରୀ ତଥା ବିଜେପି ବିଧାୟକ ଦଳ ନେତା ଦେବେନ୍ଦ୍ର ଫଡନବୀସ ବିଜେପି ଅଧ୍ୟକ୍ଷ ଅମିତ ଶାହାଙ୍କୁ ଭେଟିଛନ୍ତି । ଅନ୍ୟପକ୍ଷରେ ଏନସିପି ନେତା ଶରଦ ପାଓ୍ଵାର ମଧ୍ୟ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧିଙ୍କୁ ଭେଟିଛନ୍ତି ।