ମୁମ୍ବାଇ: ମହାରାଷ୍ଟ୍ରରେ କଂଗ୍ରେସ-ଶିବସେନା-ଏନସିପିର ମିଳିତ ସରକାର ଥିଲେ ବି ମୋଦୀଙ୍କ ମନ୍ତ୍ରିମଣ୍ଡଳରେ ମନ୍ତ୍ରୀ ଥିବା ନିତିନ ଗଡ଼କରୀଙ୍କ କ୍ରେଜ କମିବାର ନାମ ନେଉନାହିଁ | କିଛିଦିନ ପୂର୍ବେ ଶିବସେନା ନେତା ସଞ୍ଜୟ ରାଉତ ଗଡକରୀଙ୍କୁ ପ୍ରଶଂସା କରିଥିବାବେଳେ ଏବେ ଏନସିପି ସୁପ୍ରିମୋ ଶରଦ ପାୱାର ମଧ୍ୟ ତାଙ୍କୁ ପ୍ରଶଂସା କରିଛନ୍ତି | ମହାରାଷ୍ଟ୍ରର ଆଖୁ ଚାଷୀଙ୍କ ସମସ୍ୟାକୁ ନେଇ ସ୍ୱର ଉତ୍ତୋଳନ କରିଥିବାରୁ ପୂର୍ବତନ କେନ୍ଦ୍ର କୃଷି ମନ୍ତ୍ରୀ ତଥା ଏନସିପି ସୁପ୍ରିମୋ ଶରଦ ପାୱାର କେନ୍ଦ୍ର ମନ୍ତ୍ରୀ ନିତିନ ଗଡକରୀଙ୍କୁ ପ୍ରଶଂସା କରିଛନ୍ତି। ପୁଣେରେ ଆୟୋଜିତ ଏକ କାର୍ଯ୍ୟକ୍ରମରେ ଅଭିଭାଷଣ ପ୍ରଦାନ କରୁଥିବାବେଳେ ଶରଦ ପାୱାର ନିତିନ ଗଡକରୀଙ୍କୁ ଚିନି ଶିଳ୍ପରେ ସାହାଯ୍ୟ କରିଥିବାରୁ ପ୍ରଶଂସା କରିଥିଲେ।

Advertisment

ଚିନି ଶିଳ୍ପ ବାଣିଜ୍ୟରେ ସମ୍ମୁଖୀନ ହେଉଥିବା ଆହ୍ୱାନ ଉପରେ ଆଲୋଚନା ପାଇଁ ଆୟୋଜିତ ଦୁଇ ଦିନିଆ ସମ୍ମିଳନୀରେ ଶରଦ ପାୱାର ଏହା କହିଛନ୍ତି। ସେ କହିଛନ୍ତି ଯେ ଚିନି ଶିଳ୍ପ ପାଇଁ ନିତିନ ଗଡକରୀଙ୍କ ପଦକ୍ଷେପ ଏବଂ ବିଶେଷ କରି ଇଥାନଲର ବ୍ୟବହାର ବୃଦ୍ଧି ପାଇଁ ତାଙ୍କ ଦ୍ୱାରା କରାଯାଇଥିବା ପ୍ରୟାସ ପ୍ରଶଂସନୀୟ। ସେ କହିଛନ୍ତି ଯେ ଏହା ଅନେକ ସୁଗାର ମିଲକୁ ଲାଭ ଦେବାରେ ସାହାଯ୍ୟ କରିଛି। ଶରଦ ପାୱାର କହିଛନ୍ତି ଯେ ବିଦର୍ଭ ଅଞ୍ଚଳରେ ଆଖୁ ମୁଖ୍ୟ ଫସଲ ଥିଲା, କିନ୍ତୁ ଗତ କିଛି ବର୍ଷ ମଧ୍ୟରେ କୃଷକମାନେ ଆଖୁ ଚାଷ କମାଇ ଅନ୍ୟ ଫସଲ ଚାଷ କରୁଥିଲେ ।

ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଏବଂ ମନ୍ତ୍ରୀ ଜୟପ୍ରକାଶ ଦାଣ୍ଡେଗାଓଙ୍କାରଙ୍କ ଉପସ୍ଥିତିରେ ମହାରାଷ୍ଟ୍ର ରାଜ୍ୟ ସମବାୟ ଚିନି କାରଖାନା ସଂଘର ସଭାପତି ଶରଦ ପାୱାର ଗଡକରୀକୁ ଚିନି ଶିଳ୍ପର ଦ୍ୱିତୀୟ ସ୍ତମ୍ଭ ବୋଲି କହିଛନ୍ତି। ସୂଚନାଯୋଗ୍ୟ ଯେ ଏହା ପୂର୍ବରୁ ଶିବସେନା ସାଂସଦ ସଞ୍ଜୟ ରାଉତ କହିଥିଲେ ଯେ ମୋଦୀ ସରକାରଙ୍କ କାର୍ଯ୍ୟକାଳ ମଧ୍ୟରେ ନିତିନ ଗଡକରୀ ୯୦% ବିକାଶମୂଳକ କାର୍ଯ୍ୟ କରିଛନ୍ତି। ସଞ୍ଜୟ ରାଉତ କହିଥିଲେ ଯେ ଆଜି ଆମେ ଦେଶରେ ଯାହା ବିକାଶ ଦେଖୁଛୁ, ଏଥିରେ ପ୍ରାୟ ୯୦% ନିତିନ ଗଡକରୀଙ୍କର ହାତ ରହିଛି | ଭଲ ଗୁଣବତ୍ତା ରାଜପଥ ବ୍ୟତୀତ ଦେଶର ସୀମାକୁ ସଡକ ନେଟୱାର୍କ ସହିତ ସଂଯୋଗ କରିବା ପାଇଁ ନିତିନ ଗଡକରୀଙ୍କୁ ଶ୍ରେୟ ଦିଆଯିବା ଉଚିତ ବୋଲି ସେ କହିଥିଲେ।