‘ନିର୍ବାଚନରେ ଜିତିଗଲେ ଭଗବାନଙ୍କ ବିମାନ ପାଇଁ ବିମାନବନ୍ଦର ନିର୍ମାଣ କରିବି’
ଅଲବର: ନିର୍ବାଚନ ଜିତିବାକୁ ପ୍ରାର୍ଥୀମାନେ ଭୋଟରଙ୍କୁ ବଡ଼ ବଡ଼ ପ୍ରତିଶୃତି ଦେଉଥିବାର ଖବର ଆପଣ ଶୁଣିଥିବେ | କିନ୍ତୁ ରାଜସ୍ଥାନର ଜଣେ ନେତା କିଛି ଏମିତି ପ୍ରତିଶୃତି ଦେଇଛନ୍ତି ଯାହାକି ସବୁ ମିଛ ପ୍ରତିଶ୍ରୁତିର ସୀମା ଟପିଯାଇଛି | ଏହି ନେତା ଜଣକ ପଞ୍ଚାୟତ ନିର୍ବାଚନରେ ସରପଞ୍ଚ ପ୍ରାର୍ଥୀ ହୋଇଥିଲେ | ତେବେ ଏହି ନେତା ଜଣକ ଜିତିଲେ ବିମାନବନ୍ଦର ନିର୍ମାଣ କରିଦେବାର ପ୍ରତିଶୃତି ଦେଇଛନ୍ତି | ଯାହାକି ତାଙ୍କ କ୍ଷମତା ବାହାରେ ଥିଲେ ବି ଲୋକଙ୍କୁ ମିଛ ସ୍ୱପ୍ନ ଦେଖାଇଛନ୍ତି | ମିଳିଥିବା ସୂଚନା ମୁତାବକ ରାଜସ୍ଥାନ ଅଲବର ଜିଲ୍ଲାର ମଲଖେଡ଼ାରୁ ରାମବାବୁ ଶର୍ମା ସରପଞ୍ଚ ପଦ ପାଇଁ ନିର୍ବାଚନ ଲଢୁଥିଲେ | ଏଥିପାଇଁ ସେ କର୍ମୀଙ୍କୁ ନେଇ ପ୍ରଚାର ଅଭିଯାନ ମଧ୍ୟ କରିଥିଲେ |
Sambad is now on WhatsApp
Join and get latest news updates delivered to you via WhatsApp
ଲୋକଙ୍କ ପାଖକୁ ଯାଇ ରାମବାବୁ କହିଥିଲେ ଯେ ନିର୍ବାଚନ ଜିତିଲେ ପ୍ରଥମେ ସେ ଆବର୍ଜନା ସଫେଇ କାର୍ଯ୍ୟକୁ ଗୁରୁତ୍ୱ ଦେବେ | ଏହା ପରେ ସେ ଗାଁରେ ବିମାନବନ୍ଦର ନିର୍ମାଣ କରିବେ | କାରଣ ଭଗବାନ ତାଙ୍କୁ ସ୍ୱପ୍ନରେ ଆସି କହିଛନ୍ତି ଯେ ତାଙ୍କର(ଭଗବାନଙ୍କର) ବିମାନ ଯେଭଳି ଗାଁରେ ଓହ୍ଲେଇପାରିବ ସେଥିପାଇଁ ବିମାନବନ୍ଦର ନିର୍ମାଣ କରିବାକୁ ପଡିବ |
୫ ବର୍ଷ ତଳୁ ଭଗବାନ ତାଙ୍କୁ ସ୍ୱପ୍ନରେ ଆସି ବିମାନବନ୍ଦର ନିର୍ମାଣ କରାଇବାକୁ କହିଛନ୍ତି | କିନ୍ତୁ ରାଜନୀତିକୁ ଆସିବା ପାଇଁ ମୁଁ ଏତେ ସମୟ ପ୍ରତୀକ୍ଷା କରିଥିଲି | ସେଥିପାଇଁ ଅଧିକ ଭୋଟ ଦେଇ ମୋତେ ଜିତାନ୍ତୁ ବୋଲି ନେତା ଜଣକ ଗାଁ ରେ ବୁଲି ବୁଲି କହିଥିଲେ | ଏହା ସହ ସେ କହିଛନ୍ତି ଭଗବାନ କହିଛନ୍ତି ଯେ ପିଲାଙ୍କ ପାଇଁ ଷ୍ଟାଡିୟମ ନିର୍ମାଣ ମଧ୍ୟ ଗାଁରେ କରାଯିବ | ବଡ଼ କଥା ଯେ ସରପଞ୍ଚ ପ୍ରାର୍ଥୀଙ୍କ ଏହି ପ୍ରଚାର ଭିଡିଓ ଭାଇରାଲ ହୋଇଥିଲା | ତେବେ ଲୋକଙ୍କ ଉପରେ ଏହାର କୌଣସି ପ୍ରଭାବ ପଡ଼ିନାହିଁ | ଜାନୁୟାରୀ ୨୨ ତାରିଖରେ ନିର୍ବାଚନ ହୋଇଥିଲା ଓ ସନ୍ଧ୍ୟାରେ ଫଳାଫଳ ଆସିଥିଲା | ଏଥିରେ ରାମବାବୁଙ୍କୁ ମାତ୍ର ୫୮ ଖଣ୍ଡ ଭୋଟ ମିଳିଥିଲା ଓ ସେ ଅମାନତ ହରାଇଥିଲେ |