ମସ୍କୋ : ଋଷିଆ ୟୁକ୍ରେନ ସୀମାରୁ ସୈନ୍ୟ ପ୍ରତ୍ୟାହାର କଥା କହୁଥିଲେ ବି ସାଟେଲାଇଟ୍ ଚିତ୍ର ଅଲଗା କଥା କହୁଛି । ସାଟେଲାଇଟ୍ ଚିତ୍ରରୁ ଋଷିଆର ସମରସଜ୍ଜାର ପ୍ରକୃତ ଚିତ୍ର ସାମନାକୁ ଆସିଛି । ଏହି ଚିତ୍ରରୁ ଦେଖାଯାଉଛି ଯେ, ୟୁକ୍ରେନ ସୀମାକୁ ଲାଗି ଋଷିଆ ଲଢୁଆ ବିମାନ, ମିସାଇଲ ଲଞ୍ଚର ସିଷ୍ଟମ, ଡ୍ରୋନ ଆଦି ସଜେଇ ରଖିଛି । ଆଦେଶ ଆସିବା ମାତ୍ରେ ଏମାନେ ଉଭୟ ଆକାଶ ପଥରୁ ଓ ସ୍ଥଳପଥରୁ ୟୁକ୍ରେନ ଉପରେ ଆକ୍ରମଣ କରିବାକୁ ପ୍ରସ୍ତୁତ ହୋଇ ରହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆମେରିକୀୟ ସଂସ୍ଥା ମେକ୍ସାର ଦ୍ବାରା ଜାରି ଚିତ୍ର ଅନୁସାରେ ଋଷିଆ ସୀମାରେ ଲଢୁଆ ହେଲିକାପ୍ଟର, ଏୟାର ଡିଫେନ୍ସ ୟୁନିଟ (ଏସ-୪୦୦) ଆଦି ମଧ୍ୟ ଦେଖାଯାଉଛି ।
ଋଷିଆର ସୋସିଆଲ ମିଡିଆରେ ଅପଲୋଡ୍ ହୋଇଥିବା ଏକ ଭିଡିଓ ଅନୁସାରେ ସୀମାନ୍ତକୁ ଋଷିଆ ଏୟାରବୋର୍ନ କମ୍ବାଟ୍ କ୍ୟାରିୟର ପଠାଉଛି । ଏଗୁଡ଼ିକୁ ଋଷିଆ ମିଲିଟାରୀର ପରିବହନ ବିମାନରେ ନେଇ ୟୁକ୍ରେନ ମଧ୍ୟରେ ଓହ୍ଲାଇ ଦିଆଯିବ ।
ଆଜି ମଧ୍ୟ ଋଷିଆ ପକ୍ଷରୁ ଏକ ବୃହତ ଆଣବିକ ସମରାଭ୍ୟାସ କରି ହାଇପରସୋନିକ, ବାଲିଷ୍ଟିକ ଓ କ୍ରୁଜ ମିସାଇଲର ପରୀକ୍ଷଣ କରାଯାଇଛି । ଖୋଦ୍ ଋଷିଆ ରାଷ୍ଟ୍ରପତି ଭ୍ଲାଦିମିର ପୁଟିନ ନିଜେ ଏସବୁ ମିସାଇଲର ପରୀକ୍ଷଣ ନିରୀକ୍ଷଣ କରିଥିଲେ । ୟୁକ୍ରେନ ସଂକଟକୁ ନେଇ ସମଗ୍ର ବିଶ୍ବ ଚିନ୍ତିତ ଥିବାବେଳେ ଋଷିଆର ଏହି ବୃହତ୍ ସମରାଭ୍ୟାସ ଚିନ୍ତା ବଢାଇଦେଇଛି ।