ନୂଆଦିଲ୍ଲୀ: ମେ ୧୦ରେ ଅପରେସନ୍‌ ସିନ୍ଦୂର ସମୟରେ ଭାରତ ଦ୍ୱାରା ଟାର୍ଗେଟ୍ କରାଯାଇଥିବା ପାକିସ୍ତାନର ବାୟୁସେନା ଘାଟିଗୁଡ଼ିକର ବ୍ୟାପକ କ୍ଷୟକ୍ଷତି ହୋଇଥିବା ଉପଗ୍ରହ ଚିତ୍ରରୁ ଜଣାପଡିଛି। ପାକିସ୍ତାନର ରଣନୈତିକ ସାମରିକ ଘାଟିରେ ହୋଇଥିବା ଆକ୍ରମଣ ଯୋଗୁଁ ତିନିଦିନର ଯୁଦ୍ଧ ପରେ ଅସ୍ତ୍ରବିରତି ପାଇଁ ଭାରତ ନିକଟକୁ ଯିବାକୁ ଶେହବାଜ ସରିଫଙ୍କ ନେତୃତ୍ୱାଧୀନ ସରକାର ବାଧ୍ୟ ହୋଇଥିବା ଅନୁମାନ କରାଯାଉଛି। ମେ ୧୦ ଓ ୧୧ ତାରିଖରେ ମାକ୍ସାର ଦ୍ୱାରା ସଂଗ୍ରହ କରାଯାଇଥିବା ଉପଗ୍ରହ ଚିତ୍ରରେ ସୁକ୍କୁର (ସିନ୍ଧ), ନୁର୍ ଖାନ୍ (ରାୱଲପିଣ୍ଡି), ରହିମ୍ ୟାର୍ ଖାନ୍ (ଦକ୍ଷିଣ ପଞ୍ଜାବ), ସରଗୋଧାର ମୁଶଫ, ଜାକୋବାବାଦ (ଉତ୍ତର ସିନ୍ଧ) ଓ ଭୋଲାରି (ଉତ୍ତର ଥାଟା ଜିଲ୍ଲା)ରେ ଥିବା ବାୟୁସେନା ଘାଟିଗୁଡ଼ିକରେ ହୋଇଥିବା କ୍ଷୟକ୍ଷତି ବିଷୟରେ ବିସ୍ତୃତ ଭାବେ ଦର୍ଶାଯାଇଛି। ଫଟୋରୁ ଜଣାପଡୁଛି ଯେ ଭାରତୀୟ ଏୟାର୍‌ଷ୍ଟ୍ରାଇକ୍ ଯୋଗୁଁ ପାକିସ୍ତାନୀ ଏୟାର୍‌ବେସ୍‌ଗୁଡ଼ିକର ରନ୍‌ୱେରେ ବଡ଼ ବଡ଼ ଗାତ ସୃଷ୍ଟି ହୋଇଥିଲା ଏବଂ ପାକିସ୍ତାନର ପ୍ରମୁଖ ସାମରିକ ଘାଟିରେ ଥିବା ବିମାନ ହ୍ୟାଙ୍ଗର, ପ୍ରଶାସନିକ କୋଠା ଓ ଷ୍ଟୋର୍ ବିଲ୍‌ଡିଂ କ୍ଷତିଗ୍ରସ୍ତ ହୋଇଥିଲା। ମେ ୧୦ରେ ପାକିସ୍ତାନ ୨୬ରୁ ଅଧିକ ସ୍ଥାନରେ ବିମାନ ଆକ୍ରମଣ ଉଦ୍ୟମ କରିବା ପରେ ଭାରତ ପକ୍ଷରୁ ପ୍ରତିଶୋଧ ନିଆଯାଇଥିଲା।

Advertisment

ପିଏଏଫ୍ ବେସ୍, ସୁକୁର
ପାକିସ୍ତାନ ବାୟୁସେନାର ଫରୱାର୍ଡ ଅପରେସନ ବେସ୍ ସୁକୁର ଏୟାର୍‌ବେସ୍‌ ବେଗମ ନୁସରତ ଭୁଟ୍ଟୋ ଅନ୍ତର୍ଜାତୀୟ ବିମାନବନ୍ଦର ଭାବରେ ମଧ୍ୟ କାର୍ଯ୍ୟ କରେ, ଯାହା କରାଚୀର ଜିନ୍ନା ଅନ୍ତର୍ଜାତୀୟ ବିମାନବନ୍ଦର ପରେ ସିନ୍ଧ୍‌ର ଦ୍ୱିତୀୟ ପ୍ରମୁଖ ବେସାମରିକ ବିମାନ ବନ୍ଦରରେ ପରିଣତ ହୋଇଛି। ଉପଗ୍ରହ ଚିତ୍ରରେ ଏହି ଘାଟିରେ ଥିବା ଦୁଇଟି ବିମାନ ଆଶ୍ରୟସ୍ଥଳୀ ମଧ୍ୟରୁ ଗୋଟିଏ ସମ୍ପୂର୍ଣ୍ଣ ଭାବେ କ୍ଷତିଗ୍ରସ୍ତ ହୋଇଥିବା ଦେଖିବାକୁ ମିଳିଛି।
ନୁର୍ ଖାନ୍ ଏୟାରବେସ୍
ରାୱଲପିଣ୍ଡିସ୍ଥିତ ପାକିସ୍ତାନ ସେନା ମୁଖ୍ୟାଳୟ (ଜେନେରାଲ ହେଡକ୍ୱାର୍ଟର, ଜିଏଚ୍‌କ୍ୟୁ)ର ୧୦ କିଲୋମିଟର ମଧ୍ୟରେ ଅବସ୍ଥିତ ଚକଲାସ୍ଥିତ ନୁର୍ ଖାନ୍ ଏୟାର୍‌ବେସ୍‌ରେ ଲକ୍‌ହିଡ୍ ସି-୧୩୦ ହର୍କୁଲିସ୍, ଇଲିଉସିନ୍ ଇଲ୍-୭୮ ରିଫୁଏଲର୍ ଭଳି ପିଏଏଫ୍ ପରିବହନ ବିମାନ ଏବଂ କାରାକୋରମ୍-୮ ଭଳି ପ୍ରଶିକ୍ଷକ ରହିଛନ୍ତି। ଓପନ୍ ସୋର୍ସ ଗବେଷକ ଡେମିଏନ୍ ସିମୋନଙ୍କ ଦ୍ୱାରା ସାଟେଲାଇଟ୍ ଚିତ୍ରର ବିଶ୍ଳେଷଣରୁ ଅତି କମ୍‌ରେ ଦୁଇଟି ସାମରିକ ପରିବହନ ଯାନ କ୍ଷତିଗ୍ରସ୍ତ ହୋଇଥିବା ଜଣାପଡିଛି।
ରହିମ ୟାର୍ ଖାନ୍ ଏୟାର୍‌ବେସ୍
ରହିମ ୟାର୍ ଖାନ୍‌ର ଏକମାତ୍ର ରନ୍‌ୱେରେ ଭାରତୀୟ ଷ୍ଟ୍ରାଇକ୍ ପ୍ରାୟ ୧୯ ଫୁଟ ବ୍ୟାସାର୍ଦ୍ଧର ଏକ ବିଶାଳ ଗାତ ସୃଷ୍ଟି କରିଥିଲା। ଏହି ଗର୍ତ୍ତ ଚାରିପଟେ ପାଖାପାଖି ୪୩ ଫୁଟ ବ୍ୟାସାର୍ଦ୍ଧ ବ୍ୟାପି ଆବର୍ଜନା ପଡ଼ିଥିବା ଦେଖିବାକୁ ମିଳୁଛି। ଏହି ଆକ୍ରମଣ ପରେ ପାକିସ୍ତାନ ଉକ୍ତ ବିମାନ ବନ୍ଦରରେ ଏକ ସପ୍ତାହ ପାଇଁ ସମସ୍ତ ବିମାନ ଚଳାଚଳକୁ ସ୍ଥଗିତ ରଖିଛି। 
ପିଏଏଫ୍ ବେସ୍ ମୁଶଫ୍, ସରଗୋଧା
ଉପଗ୍ରହ ଚିତ୍ରରୁ ଜଣାପଡିଛି ଯେ, ଭାରତୀୟ କ୍ଷେପଣାସ୍ତ୍ର ଆକ୍ରମଣ ମୁଶଫ ଏୟାର୍‌ବେସ୍‌ର ରନ୍‌ୱେରେ ଦୁଇଟି ବଡ଼ ଗାତ ସୃଷ୍ଟି କରିଥିଲା, ଯାହାର ବ୍ୟାସାର୍ଦ୍ଧ ପ୍ରାୟ ୧୫ ଫୁଟ୍ ଥିଲା। ଏହି ଆକ୍ରମଣ ଯୋଗୁଁ ରନ୍‌ୱେର ଛକରେ ପ୍ରାୟ ୧୦ ଫୁଟ୍ ବ୍ୟାସାର୍ଦ୍ଧର ଖାଲ ହୋଇଥିଲା। କେତେକ ପରିବହନ ଗାଡ଼ି କ୍ଷତିଗ୍ରସ୍ତ ହୋଇ ପଡ଼ିଥିବ‌ା ମଧ୍ୟ ଦେଖିବାକୁ ମିଳିଛି। 
ଜାକୋବାବାଦ ବିମାନ ବନ୍ଦର
ଏକଦା ଆମେରିକା ନେତୃତ୍ବାଧୀନ ଆତଙ୍କବାଦ ବିରୋଧୀ ଯୁଦ୍ଧ ଅପରେସନ୍ ଏନ୍‌ଡିଓରିଂ ଫ୍ରିଡମ୍ ସମୟରେ ନାଟୋର ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର ଭାବେ ଜାକୋବାବାଦ ଏୟାର୍‌ବେସ୍ ପାକିସ୍ତାନ ପାଇଁ ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ। ନୂଆ ସାଟେଲାଇଟ୍ ଫଟୋରୁ ଜଣାପଡ଼ୁଛି ଯେ ଭାରତୀୟ ବାୟୁସେନା ଜାକୋବାବାଦସ୍ଥିତ ପାକିସ୍ତାନ ବାୟୁସେନା ଏୟାର୍‌ବେସ୍ ଶାହବାଜରେ ଏକ ହ୍ୟାଙ୍ଗର ଉପରେ ଆକ୍ରମଣ କରିଛି।
ଭୋଲାରି ଏୟାର୍‌ବେସ୍
ଭୋଲାରି ହେଉଛି ପାକିସ୍ତାନର ନୂଆ ଏୟାର୍‌ବେସ୍ ମଧ୍ୟରୁ ଅନ୍ୟତମ, ଯେଉଁଥିରେ ଜେଏଫ୍-୧୭ ଥଣ୍ଡର ଓ ଏଫ୍-୧୬ ଫାଇଟିଂ ଫାଲ୍କନ୍ ଓ ସାବ ୨୦୦୦ ଏଇଡବ୍ଲ୍ୟୁଏସି ରହିଛି। ହାଇ-ରିଜୋଲ୍ୟୁସନ୍ ସାଟେଲାଇଟ୍ ଫଟୋରେ ଏକ କ୍ଷତିଗ୍ରସ୍ତ ହ୍ୟାଙ୍ଗର୍ ଦେଖିବାକୁ ମିଳୁଛି ଯେଉଁଠାରେ ବିମାନ ରଖାଯାଇଛି। ଭୋଲାରି ଏୟାର୍‌ବେସ୍‌ରେ କିଛି ବିମାନ ମଧ୍ୟ କ୍ଷତିଗ୍ରସ୍ତ ହେବାର ସମ୍ଭାବନା ରହିଛି।