କରୋନାର ଦ୍ୱିତୀୟ ଲହର ନେଇ ଏସବିଆଇର ରିପୋର୍ଟ : ଏପ୍ରିଲ ଦ୍ୱିତୀୟ ସପ୍ତାହରେ ଶୀର୍ଷରେ ପହଞ୍ଚିବ ସଂକ୍ରମଣ
୧୦୦ ଦିନ ପର୍ଯ୍ୟନ୍ତ ରହିବ ପ୍ରଭାବ
ନୂଆଦିଲ୍ଲୀ: ଦେଶର ସବୁଠାରୁ ବଡ଼ ରାଷ୍ଟ୍ରାୟତ୍ତ ବ୍ୟାଙ୍କ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆର କରୋନା ସମ୍ପର୍କିତ ରିପୋର୍ଟ ଆଶ୍ଚର୍ଯ୍ୟ କଲା ଭଳି ତଥ୍ୟ ସାମ୍ନାକୁ ଆଣିଛି । ଯେଉଁଥିରେ କୁହାଯାଇଛି, ଦେଶରେ କରୋନାର ଦ୍ୱିତୀୟ ଲହର ଫେବ୍ରୁଆରି ୧୫ ପରେ ଆସିଥିବାର ସଂକେତ ମିଳିଛି । ଏହି ରିପୋର୍ଟ କହିଛି, ମାର୍ଚ୍ଚ ୨୩ ତାରିଖ ସୁଦ୍ଧା ଦେଖାଦେଇଥିବା ଟ୍ରେଣ୍ଡ ଅନୁସାରେ ଦ୍ୱିତୀୟ ଲହର ଦ୍ୱାରା ଭାରତରେ ୨୫ଲକ୍ଷ ଲୋକ ଆକ୍ରାନ୍ତ ହେବେ । ୨୮ ପୃଷ୍ଠାର ଏହି ରିପୋର୍ଟ କହିଛି, ସ୍ଥାନୀୟ ଲକଡାଉନ କିମ୍ବା ଅନ୍ୟ କଟକଣା ଦ୍ୱାରା ବିଶେଷ କିଛି ଲାଭ ମିଳିବ ନାହିଁ । କେବଳ ତ୍ୱରାନ୍ୱିତ ଟିକାକରଣ ଦ୍ୱାରା ହିଁ ପରିସ୍ଥିତିରେ ସୁଧାର ଆସିପାରିବ।
Sambad is now on WhatsApp
Join and get latest news updates delivered to you via WhatsApp
ଏହି ରିପୋର୍ଟରେ ଉଲ୍ଲେଖ ରହିଛି ଯେ, ଏପ୍ରିଲ ମାସ ଦ୍ୱିତୀୟ ଭାଗରେ ଦ୍ୱିତୀୟ ଲହରର ପିକ୍ ଆସିବ ଅର୍ଥାତ ଦ୍ୱିତୀୟ ଲହରରେ କରୋନା ସଂକ୍ରମିତଙ୍କ ସଂଖ୍ୟା ଶୀର୍ଷରେ ପହଞ୍ଚିବ । ତେଣୁ ଟିକାକରଣକୁ ତ୍ୱରାନ୍ୱିତ କରିବା ପାଇଁ ଏଥିରେ ପରାମର୍ଶ ଦିଆଯାଇଛି । ଅନ୍ୟପଟେ ଗତ ୨୪ ଘଣ୍ଟାରେ ଦେଶରେ ୫୩ ହଜାର ୪୭୬ ଜଣ କରୋନାରେ ସଂକ୍ରମିତ ହୋଇଛନ୍ତି । ଗତ ୫ ମାସରେ ଏହା ସବୁଠାରୁ ବଡ଼ ସଂଖ୍ୟା ।
ସ୍ୱାସ୍ଥ୍ୟ ମନ୍ତ୍ରାଳୟ କହିଛି,କରୋନାର ଏକ ନୂଆ ଡବଲ ମ୍ୟୁଟାଣ୍ଟ ଭାରିଆଣ୍ଟ ଚିହ୍ନଟ ହୋଇଛି । ଏହା ୧୮ଟି ରାଜ୍ୟରେ ରହିଛି । ବର୍ତ୍ତମାନ ଦିନକୁ ୩୪ ଲକ୍ଷ ଲୋକଙ୍କୁ ଟିକା ଦିଆଯାଉଛି । ଏହାକୁ ୪୦ରୁ ୪୫ଲକ୍ଷକୁ ବଢାଇଲେ, ୪୫ବର୍ଷରୁ ଅଧିକ ଲୋକଙ୍କୁ ଟିକା ଦେବା ପାଇଁ ଆହୁରି ୪ମାସ ସମୟ ଲାଗିବ।