ଘୃଣା ସୃଷ୍ଟିକାରୀ ଭାଷଣ ଉପରେ ରୋକ ଲଗାଯିବା ଉଚିତ୍ : ସୁପ୍ରିମକୋର୍ଟ

ନୂଆଦିଲ୍ଲୀ: ସୁପ୍ରିମ୍ କୋର୍ଟ ବୁଧବାର (ନଭେମ୍ବର ୨୯) କହିଛନ୍ତି ଯେକୌଣସି ପ୍ରକାର ଘୃଣ୍ୟ ଭାଷଣ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ। ଘୃଣ୍ୟ ଭାଷଣ ପ୍ରସଙ୍ଗରେ ବ୍ୟକ୍ତି ବିଶେଷ ଓ ଗୋଷ୍ଠୀଙ୍କ ପକ୍ଷରୁ ଦାୟର ଆବେଦନର ଶୁଣାଣି ବେଳେ ଅଦାଲତ ଏଭଳି ମନ୍ତବ୍ୟ ଦେଇଛନ୍ତି। ଘୃଣ୍ୟ ଭାଷଣକୁ ରୋକିବା ପାଇଁ ଏକ ବ୍ୟବସ୍ଥା କରିବାକୁ ଦାବି କରି ଫେବ୍ରୁଆରିରେ ଏକାଧିକ ଆବେଦନର ଶୁଣାଣି କରିବାକୁ କୋର୍ଟ ରାଜି ହୋଇଛନ୍ତି।

ଜଷ୍ଟିସ୍ ସଞ୍ଜୀବ ଖାନ୍ନାଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଛନ୍ତି, ଆମେ ସାରା ଦେଶରେ ଘୃଣ୍ୟ ଭାଷଣ ସମସ୍ୟା ଉପରେ ନଜର ରଖିପାରିବୁ ନାହିଁ। ଭାରତ ଭଳି ବଡ଼ ଦେଶରେ ସମସ୍ୟା ସୃଷ୍ଟି ହେବ, କିନ୍ତୁ ଏହାର ମୁକାବିଲା ପାଇଁ ଆମ ପାଖରେ କୌଣସି ପ୍ରଶାସନିକ ବ୍ୟବସ୍ଥା ଅଛି କି ବୋଲି ପ୍ରଶ୍ନ ପଚରାଯିବା ଦରକାର।

ଏହି ମାମଲାର ଶୁଣାଣି କରୁଥିବା ଖଣ୍ଡପୀଠରେ ଜଷ୍ଟିସ୍ ଏସ୍ ଭିଏନ୍ ଭଟ୍ଟିଙ୍କୁ ମଧ୍ୟ ସାମିଲ କରାଯାଇଥିଲା। ଆସନ୍ତା ବର୍ଷ ଫେବ୍ରୁଆରିରେ ମାମଲାର ଶୁଣାଣି ପାଇଁ ଧାର୍ଯ୍ୟ କରି ଖଣ୍ଡପୀଠ କହିଛନ୍ତି, ସୋସାଇଟି ଜାଣିବା ଦରକାର ଯେ ଯଦି କୌଣସି ଆଇନ ଉଲ୍ଲଂଘନ କରାଯାଏ, ତା'ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆମେ ଦେଶବ୍ୟାପୀ ଏଭଳି ପଦକ୍ଷେପ ନେଇପାରିବୁ ନାହିଁ, ନଚେତ୍ ପ୍ରତିଦିନ ଆବେଦନ ଆସିବ।

୨୦୧୮ରେ ତେହସିନ ପୁନାୱାଲା ମାମଲାରେ ସୁପ୍ରିମକୋର୍ଟ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳଗୁଡ଼ିକୁ ଘୃଣ୍ୟ ଅପରାଧ ରୋକିବା ଏବଂ ପଞ୍ଜୀକରଣ ପାଇଁ ଜଣେ ନୋଡାଲ ଅଫିସର ନିଯୁକ୍ତ କରିବାକୁ ନିର୍ଦ୍ଦେଶ ଦେଇଥିଲେ।