ଆଉ ଦୁଇଜଣ ବିଚାରପତିଙ୍କ ନିଯୁକ୍ତି ପାଇଁ କେନ୍ଦ୍ରକୁ ସୁପାରିଶ କଲେ ସୁପ୍ରିମକୋର୍ଟ କଲେଜିୟମ୍
ନୂଆଦିଲ୍ଲୀ : ବିଚାରପତି ନିଯୁକ୍ତି ପାଇଁ ଥିବା କଲେଜିୟମ ବ୍ୟବସ୍ଥାକୁ ନେଇ ସୁପ୍ରିମକୋର୍ଟ ଓ କେନ୍ଦ୍ର ସରକାରଙ୍କ ମଧ୍ୟରେ ଚାଲିଥିବା ମତଭେଦ ମଧ୍ୟରେ ଆଉ ଦୁଇ ଜଣ ବିଚାରପତିଙ୍କ ନିଯୁକ୍ତି ପାଇଁ ସୁପ୍ରିମକୋର୍ଟ କଲେଜିୟମ କେନ୍ଦ୍ର ସରକାରଙ୍କୁ ଏକ ସୁପାରିଶ ପଠାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଆହ୍ଲାବାଦ ହାଇକୋର୍ଟର ମୁଖ୍ୟ ବିଚାରପତି ରାଜେଶ ବିନ୍ଦଲ ଏବଂ ଗୁଜୁରାଟ ହାଇକୋର୍ଟମୁଖ୍ୟ ବିଚାରପତି ଅରବିନ୍ଦ କୁମାରଙ୍କୁ ସୁପ୍ରିମକୋର୍ଟର ବିଚାରପତି ଭାବେ ନିଯୁକ୍ତି ପାଇଁ କଲେଜିୟମ ସୁପାରିଶ କରିଛନ୍ତି । ତେବେ କଲେଜିୟମର ସଦସ୍ୟ ଥିବା ଜଷ୍ଟିସ କେଏମ ଜୋସେଫ ଅରବିନ୍ଦ କୁମାରଙ୍କ ନାମ ଉପରେ ଆପତ୍ତି ଉଠାଇଥିଲେ ଓ ସୁପ୍ରିମକୋର୍ଟରେ ତାଙ୍କ ନିଯୁକ୍ତିକୁ ବିଳମ୍ବିତ କରିବାକୁ କହିଥିଲେ । କିନ୍ତୁ କଲେଜିୟମ ବହୁମତରେ ତାଙ୍କ ନାମକୁ ସୁପାରିଶ କରିଥିଲା ।
ଗତ ଡିସେମ୍ବର ୧୩, ୨୦୨୨ ରେ କଲେଜିୟମ ରାଜସ୍ଥାନ ହାଇକୋର୍ଟମୁଖ୍ୟ ବିଚାରପତି ପଙ୍କଜ ମିତ୍ତଲ, ପାଟନା ହାଇକୋର୍ଟମୁଖ୍ୟ ବିଚାରପତି ସଞ୍ଜୟ କାରୋଲ, ମଣିପୁର ହାଇକୋର୍ଟ ମୁଖ୍ୟ ବିଚାରପତି ପିଭି ସଞ୍ଜୟ କୁମାର, ପାଟନା ହାଇକୋର୍ଟ ବିଚାରପତି ଜଷ୍ଟିସ ଅହସାନୁଦ୍ଦିନ ଅମାନୁଲ୍ଲା ଏବଂ ଆହ୍ଲାବାଦ ହାଇକୋର୍ଟ ବିଚାରପତି ମନୋଜ ମିଶ୍ରଙ୍କ ନାମ ସୁପ୍ରିମକୋର୍ଟ ବିଚାରପତି ଭାବେ ସୁପାରିଶ କରିଥିଲେ । କେନ୍ଦ୍ର ଏପର୍ଯ୍ୟନ୍ତ ତାଙ୍କ ନିଯୁକ୍ତିକୁ ଅନୁମୋଦନ କରିନାହିଁ । ଏଣୁ ଏହି ନୂଆ ସୁପାରିଶ ଉପରେ କେନ୍ଦ୍ର ସରକାର କଣ ଆଭିମୁଖ୍ୟ ଗ୍ରହଣ କରୁଛନ୍ତି ତାହା ଉପରେ ସମସ୍ତଙ୍କ ନଜର ରହିବ ।