ଜ୍ଞାନବାପି ମସଜିଦର ବ୍ୟାସ ବେସମେଣ୍ଟରେ ଜାରି ରହିବ ପୂଜାର୍ଚ୍ଚନା, ପ୍ରତିବନ୍ଧକ ଲଗାଇବାକୁ ମନାକଲେ ସୁପ୍ରିମକୋର୍ଟ

ନୂଆଦିଲ୍ଲୀ: ଜ୍ଞାନବାପି କମ୍ପ୍ଲେକ୍ସର ବ୍ୟାସ ବେସମେଣ୍ଟରେ ପୂଜା ବିରୋଧରେ ମସଜିଦ୍ କମିଟିର ଆବେଦନର ଶୁଣାଣି ସୋମବାର ସୁପ୍ରିମକୋର୍ଟରେ ହୋଇଥିଲା। ଏହି ସମୟରେ ସୁପ୍ରିମ୍ କୋର୍ଟ ଜ୍ଞାନବାପିର ବ୍ୟାସ ବେସମେଣ୍ଟରେ ପୂଜା ଉପରେ ପ୍ରତିବନ୍ଧକ ଲଗାଇବାକୁ ମନା କରିଦେଇଥିଲେ। ଜାନୁଆରୀ ୩୧ ର ଆଦେଶ ଯୋଗୁଁ ପ୍ରାର୍ଥନା ପ୍ରଭାବିତ ହୋଇନାହିଁ ବୋଲି ସୁପ୍ରିମ୍ କୋର୍ଟ ନିର୍ଦ୍ଦେଶ ଦେଇଛନ୍ତି।

ବେସମେଣ୍ଟରେ ପୂଜା ବିରୋଧରେ ମସଜିଦ୍ ପକ୍ଷର ଆବେଦନ ଉପରେ ସୁପ୍ରିମକୋର୍ଟ ନିମ୍ନ ଅଦାଲତର ଆବେଦନକାରୀ ଶୈଳେନ୍ଦ୍ର ବ୍ୟାସଙ୍କୁ ନୋଟିସ୍ ଜାରି କରିଛନ୍ତି। ଜ୍ଞାନବାପି ପରିସରରେ ଥିବା ବ୍ୟାସ ବେସମେଣ୍ଟରେ ପୂଜା ବିରୋଧରେ ହୋଇଥିବା ଆବେଦନର ଶୁଣାଣି ଜୁଲାଇ ତୃତୀୟ ସପ୍ତାହରେ ହେବ।

ଆଜିର ଶୁଣାଣି ସମୟରେ ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ କହିଛନ୍ତି, ବେସମେଣ୍ଟର ପ୍ରବେଶ ଦ୍ୱାର ଦକ୍ଷିଣରୁ ଏବଂ ମସଜିଦ ଉତ୍ତର ଦିଗରୁ ରହିଛି। ଦୁହେଁ ପରସ୍ପରକୁ ପ୍ରଭାବିତ କରନ୍ତି ନାହିଁ । ବର୍ତ୍ତମାନ ପାଇଁ ଉଭୟ ପୂଜା ଓ ନମାଜ ନିଜ ନିଜ ସ୍ଥାନରେ ଜାରି ରଖିବାକୁ ଆମେ ନିର୍ଦ୍ଦେଶ ଦେଇପାରିବା ।

ଜ୍ଞାନବାପିର ବ୍ୟାସ ବେସମେଣ୍ଟରେ ହୋଇଥିବା ପୂଜା ବିରୋଧରେ ମସଜିଦ କମିଟି ସୁପ୍ରିମକୋର୍ଟରେ ପିଟିସନ ଦାଖଲ କରିଥିଲା। ଶୁଣାଣି ସମୟରେ ମସଜିଦ୍ ପକ୍ଷର ଓକିଲ ହୁଜାଇଫା ଅହମ୍ମଦୀ କହିଥିଲେ ଯେ ନିମ୍ନ ଅଦାଲତ ଏହି ଆଦେଶ କୁ କାର୍ଯ୍ୟକାରୀ କରିବା ପାଇଁ ଏକ ସପ୍ତାହ ସମୟ ଦେଇଥିଲେ, କିନ୍ତୁ ସରକାର ତୁରନ୍ତ ଏହାକୁ କାର୍ଯ୍ୟକାରୀ କରିଥିଲେ। ହାଇକୋର୍ଟ ମଧ୍ୟ ଆମକୁ ଆଶ୍ୱସ୍ତି ଦେଇନଥିଲେ। ଜ୍ଞାନବାପି ମସଜିଦ ପରିସରର ବ୍ୟାସ ବେସମେଣ୍ଟରେ ତୁରନ୍ତ ପୂଜା ବନ୍ଦ କରାଯାଉ ବୋଲି ସେ ସୁପ୍ରିମକୋର୍ଟଙ୍କ ନିକଟରେ ଦାବି କରିଥିଲେ।