କୃଷକଙ୍କ ଆନ୍ଦୋଳନ କରିବାର ଅଧିକାର ଅଛି, କିନ୍ତୁ ଅନିର୍ଦ୍ଦିଷ୍ଟ କାଳ ପାଇଁ ରାସ୍ତା ଅବରୋଧ କରିପାରିବେ ନାହିଁ : ସୁପ୍ରିମକୋର୍ଟ
ନୂଆଦିଲ୍ଲୀ : କୃଷକମାନଙ୍କର ଆନ୍ଦୋଳନ କରିବାର ଅଧିକାର ଅଛି, କିନ୍ତୁ ସେମାନେ ଅନିର୍ଦ୍ଦିଷ୍ଟ କାଳ ପାଇଁ ରାସ୍ତା ଅବରୋଧ କରିପାରିବେ ନାହିଁ । ଏପରି ଗୁରୁତ୍ବପୂର୍ଣ୍ଣ ରାୟ ଶୁଣାଇଛନ୍ତି ସୁପ୍ରିମ କୋର୍ଟ ।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀର ସିଙ୍ଗୁ ସୀମାରେ ଗତ ବର୍ଷଠାରୁ ଚାଲିଥିବା କୃଷକ ଆନ୍ଦୋଳନ ପ୍ରସଙ୍ଗରେ ଦାଏର ଏକ ପିଟିସନର ବିଚାର କରି ସର୍ବୋଚ୍ଚ ନ୍ୟାୟାଳୟ ଏହି ମନ୍ତବ୍ୟ ଦେଇଛନ୍ତି । ଏ ସମ୍ପର୍କରେ ଆସନ୍ତା ତିନି ସପ୍ତାହ ମଧ୍ୟରେ ପକ୍ଷ ରଖିବାକୁ କୃଷକ ୟୁନିୟନଗୁଡ଼ିକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ନୋଇଡାର ଜଣେ ବ୍ୟକ୍ତି ଏହି ପିଟିସନ ଦାଏର କରିଛନ୍ତି । ଆନ୍ଦୋଳନକାରୀଙ୍କୁ ରାସ୍ତାରୁ ହଟାଇବାକୁ ସେ ଆବେଦନ କରିଛନ୍ତି । ମାମଲାର ପରବର୍ତ୍ତୀ ଶୁଣାଣି ଡିସେମ୍ବର ୭ ତାରିଖରେ ହେବ ।
କୋର୍ଟ କହିଛନ୍ତି ଯେ କୃଷି ଆଇନ ସମ୍ପର୍କିତ ମାମଲା ବିଚାରାଧିନ ଥିଲେ ମଧ୍ୟ କୃଷକମାନେ ଆନ୍ଦୋଳନ କରିପାରିବେ, କିନ୍ତୁ ସେମାନେ ଅନିର୍ଦ୍ଦିଷ୍ଟ କାଳ ପାଇଁ ରାସ୍ତା ଅବରୋଧ କରିପାରିବେ ନାହିଁ ।
ଗତ ସପ୍ତାହରେ ମଧ୍ୟ ସୁପ୍ରିମକୋର୍ଟ ସମାନ ମନ୍ତବ୍ୟ ଦେଇ କହିଥିଲେ ଯେ ଆନ୍ଦୋଳନକାରୀମାନେ ଅନିର୍ଦ୍ଦିଷ୍ଟ କାଳ ପାଇଁ ରାସ୍ତା ଅବରୋଧ କରିପାରିବେ ନାହିଁ । କୌଣସି ପ୍ରସଙ୍ଗରେ ଲୋକମାନଙ୍କ ଆପତ୍ତି ଅଭିଯୋଗ ଥିଲେ ତାହା ଆଇନଗତ ଉପାୟ, ସଂସଦୀୟ ବିତର୍କ ଓ ଆନ୍ଦୋଳନ ଆଦି ମାଧ୍ୟମରେ କରାଯାଇପାରିବ । କିନ୍ତୁ ରାଜରାସ୍ତାଗୁଡ଼ିକୁ କିପରି ଦୀର୍ଘ ସମୟ ଧରି ଅବରୋଧ କରାଯାଇପାରିବ ?