ନୂଆଦିଲ୍ଲୀ: ଗୁଜରାଟ ସରକାର ବିଲକିସ୍‌ ବାନୋ ମାମଲାର ଦୋଷୀମାନଙ୍କୁ ଶୀଘ୍ର ମୁକ୍ତ କରିବା ବିରୋଧରେ ଆଗତ ହୋଇଥିବା ଏକାଧିକ ଆବେଦନର ଶୁଣାଣି କରି ସୁପ୍ରିମ୍‌କୋର୍ଟ ଗୁରୁବାର ରାୟ ସଂରକ୍ଷିତ ରଖିଛନ୍ତି।

Advertisment

୨୦୦୨ର ଗୋଧ୍ରା ପରବର୍ତ୍ତୀ ଦଙ୍ଗା ସମୟରେ ବାନୋଙ୍କୁ ଗଣଦୁଷ୍କର୍ମ ଓ ତାଙ୍କ ପରିବାର ସଦସ୍ୟଙ୍କ ହତ୍ୟା ମାମଲାରେ ଦୋଷୀଙ୍କୁ ମୁକ୍ତ କରିବା ପାଇଁ କ୍ଷମା ଆଦେଶର ବୈଧତା ପ୍ରଶ୍ନରେ ସୁପ୍ରିମ୍‌କୋର୍ଟର ବିଚାରପତି ଜଷ୍ଟିସ୍‌ ବିଭି ନାଗରତ୍ନା ଓ ଜଷ୍ଟିସ୍‌ ଉଜ୍ଜଲ ଭୂୟାଁଙ୍କୁ ନେଇ ଗଠିତ ଖଣ୍ଡପୀଠ ଉଭୟ ପକ୍ଷର ଶୁଣାଣି କରି ରାୟ ସଂରକ୍ଷିତ ରଖିଛନ୍ତି। ଏଥିସହ ଅକ୍ଟୋବର ୧୬ ତାରିଖ ସୁଦ୍ଧା ଦୋଷୀଙ୍କ କ୍ଷମା ସମ୍ପର୍କିତ ଆଦେଶର ଅନୁବାଦ ସହ ସମସ୍ତ ରେକର୍ଡ ଦାଖଲ କରିବାକୁ ଖଣ୍ଡପୀଠ କେନ୍ଦ୍ର ଓ ଗୁଜୁରାଟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।

ବରିଷ୍ଠ ଆଇନଜୀବୀ ଇନ୍ଦିରା ଜୟସିଂହ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ ଏହି ମାମଲାରେ ସର୍ବୋଚ୍ଚ ନ୍ୟାୟାଳୟଙ୍କ ରାୟ ସମ୍ବିଧାନର ବିବେକକୁ ପ୍ରତିଫଳିତ କରିବ। ଶୀଘ୍ର ମୁକ୍ତି ପାଇଁ ଆବେଦନ ନିର୍ଦ୍ଧାରଣ କରିବାରେ ସର୍ବୋଚ୍ଚ ନ୍ୟାୟାଳୟଙ୍କ ଦ୍ୱାରା ଧାର୍ଯ୍ୟ ନୀତିକୁ ପ୍ରୟୋଗ କରାଯିବା ଉପରେ ଗୁରୁତ୍ୱାରୋପ କରି କ୍ଷମା ଆଦେଶ ’ଆଇନରେ ଖରାପ’ ବୋଲି ଜୟସିଂହ ଦୋହରାଇଛନ୍ତି।

ବାନୋଙ୍କ ବିରୋଧରେ ହୋଇଥିବା ଅପରାଧ ଏକ ଉଦ୍ଦେଶ୍ୟମୂଳକ ଅପରାଧ ଏବଂ ଦେଶର ବିବେକ ସର୍ବୋଚ୍ଚ ନ୍ୟାୟାଳୟଙ୍କ ରାୟରେ ପ୍ରତିଫଳିତ ହେବ ବୋଲି ସେ କହିଛନ୍ତି। ପୂର୍ବରୁ ହୋଇଥିବା ଶୁଣାଣିରେ ସେ ଯୁକ୍ତି ବାଢ଼ିଥିଲେ ଯେ ୨୦୦୨ ଗୋଧ୍ରା ଦଙ୍ଗା ସମୟରେ ବାନୋଙ୍କ ବିରୋଧରେ ହୋଇଥିବା ଅପରାଧ ଧର୍ମ ଆଧାରରେ କରାଯାଇଥିବା ମାନବିକତା ବିରୋଧୀ ଅପରାଧ।

ପୂର୍ବରୁ ଏକ ଶୁଣାଣିରେ ସର୍ବୋଚ୍ଚ ନ୍ୟାୟାଳୟ କହିଥିଲେ ଯେ ବିଲକିସ୍‌ ବାନୋ ମାମଲାରେ ଦୋଷୀଙ୍କ କ୍ଷମା ଆବେଦନକୁ ଗୁଜୁରାଟ ସରକାର କୌଣସି ଅଗ୍ରାଧିକାର ଦେଇଛନ୍ତି କି ନାହିଁ ତାହା ଯାଞ୍ଚ କରିବା ଆବଶ୍ୟକ। ଅପରପକ୍ଷରେ ଦୋଷୀମାନେ ଯୁକ୍ତି ବାଢ଼ିଥିଲେ ଯେ ସେମାନଙ୍କୁ ଶୀଘ୍ର ମୁକ୍ତି ଦେବା ପାଇଁ ଛାଡ଼ ଆଦେଶ ନ୍ୟାୟିକ ଆଦେଶର ସାର ରହିଛି ଏବଂ ସମ୍ବିଧାନର ଧାରା ୩୨ ଅନୁଯାୟୀ ରିଟ୍‌ ପିଟିସନ୍‌ ଦାଖଲ କରି ଏହାକୁ ଚ୍ୟାଲେଞ୍ଜ କରାଯାଇପାରିବ ନାହିଁ।